E wõila nui ta zaa dɛ? Ani nii ɣavele ʋai ta ɣa ɣɛɛna ga yiɛ, ya ɣɛ ɣi-gaa-ziɛzu: ‘Zɛɓɛi ya ɣɛ ga nu ani ya zaana? E ɣisu ki-to ka na ga da vaazu wɛlɛzu de wõila veai niitiɛ va wɔnɔ?’ Kalabogi nii zu, e vɛɛ na wulu ɣelei va, da vaazu wɛlɛzu velei Gala Kɔlɔi gaa-zaɣa-kɛɛ niitiɛ ɣaa wotega la.

1. Zɛɓɛi ya ɣɛ ga nu ani ya zaana?

Ziizɛ boni ga sai maʋai wulovɛ e ɣɛ nu ɣana ŋiizu. Nu ɣana ŋiizu, ɛ lɛ faa wɛ̃ɛ ga e vile niitiɛ va ta ɣɛ ɣɛɛzu koba. Sai maʋaa wulovɛ ɣɛ le e ɣɛ ŋii? Ani nu ɣa zaana ɛ lɛ sa taɓa ziɣia. Ani ɓalaa wõila ɣɛni zeea na siɛ-puluitiɛ ɓɔga na numaitiɛ ʋaa ma, ɛ lɛ sa te ma wõi-wõi kuloa. Gala Kɔlɔi ɣɛ: “Saa vea tɛ lɛ faa ta nɛpɛ kwɛ̃ni.’’​—Ecclesiastes 9:5 lodo.

2. Da gaamai wɛ̃ɛna e vile saa veaitiɛ va towa ɓɔ de va ɣɛ le?

Nu taniga ta luo sai va​—e vɛɛ ɓalaa saa veaitiɛ va! Kɛ nii Gala Kɔlɔi boga e vile saa va towa e ɣaa-nɛkpɛ. Ziizɛ ɣɛni tea: “Gaamai wɔ ka wo wulo duolai zu.” (Jɔ̃ 8:​32) Gala pɛlɛ lamaa wu, ta numaa ɣalabo ga ani nu ɣa zaana ma wɔʋɛi ɣa wulosu e li ŋada ɓalaa. Kɛ Gala Kɔlɔi faa ɓalaa wogɛ. Nii ɣa dɛɛzu ga nu ɣa zaana ɛ lɛ sa laa-nɔwɔ-woga. Tei saa veaitiɛ tɛ lɛ faa ta nɛpɛ kwɛ̃ni, tɛ lɛ zooga tɔ faa yowũ ɣɛ ga diɛ. Na ma, maa lɛ nɛɛni dɔɔ zalaɣa wulo ga de saa veaitiɛ yii-la ɔ nɔ ɣɛ ga de Gala feli te mawɔʋɛi ʋaa ma.

Nu taniga te ɣɛ ta yɛpɛ saa veaitiɛ wɔ. Kɛ na lɛ ga gaama. E ɣɛ velei nɔ de maa wolia la, saa vea “tɛ lɛ faa ta nɛpɛ kwɛ̃ni.” Taitiɛ ta ɣɛ ɣi-gaa-ziɛzu ga ta yɛpɛ ta numai niitiɛ wɔ te zaa, gaama zu ta yɛpɛzu ŋinɛ yowũitiɛ wɔ, niitiɛ ta ɓɔɔ wulo ga ta numaitiɛ te zaa. Na ma ani da gaamai wɛ̃ɛna e vile saa veaitiɛ va da ɓɔɔ maazu vɛtɛ ŋinɛ yowũitiɛ ya. Jehova de lɛnɛgɛ ga de mɛlɛ yɛpɛ saa vea wɔ, ɓɔvɛlaale e kwɛ̃ni ga ani da ɣɛna na ɣɛɛzu da ɣɛ yɛpɛzu ŋinɛ yowũitiɛ wɔ. Tɔwɔ ta faa yowũ ɣɛ ga diɛ.​—Deuteronomy 18:10-​12 lodo.

3. Gaamai wɛ̃ɛ e vile saa veaitiɛ va

Zui wɔlɔ-kɔlɔ ma numaa ta ɣi-gaa-ziɛ ga ta ɓalaa e vile nii va ya ɣɛ ga nu ani ya zaana. Gaama zu niitiɛ ɓɔgapɛ numaa te laila te pɛ taale te ga gaama.

• Zɛɓɛi numaa te laila e vile saa veaitiɛ va vɛ e na?

 4. Da gaamai wɛ̃ɛna e vile saa va towa ɓɔ de va

Da gaamai wɛ̃ɛna e vile saa va, towa ɓɔ de va ga de mɛlɛ luo saa veaitiɛ va. A Ecclesiastes 9:​10 lodo, wo gaa-zaɣa-kɛɛ nii ɣaa wote:

• E ɣisu saa veaitiɛ ta faa yowũ ɣɛ ga diɛ?

Ani da gaamai wɛ̃ɛna e vile saa veaitiɛ va, towa ɓɔ de va ga de mɛlɛ zalaɣa wulo te vɛ. A Isaiah 8:​19 ɓɔga Faa wuloai kɛnɛ ma 4:​11 lodo, wo gaa-zaɣa-kɛɛ nii ɣaa wote:

• E ɣisu Jehova ɣa ɣi-gaa-ziɛ ɣɛ le e vile nui nii va ya zalaɣa wulo ga e saa veaitiɛ yii-la?

5. Gaamai e vile saa va towa de ɣaa-nɛkpɛ

Ta numaa ɣalabo ga ani ta zaana, Gala ka vaazu te laa-nɔwɔ-wosu faa yowũitiɛ ʋaa ma te kɛɛni. Kɛ Gala Kɔlɔi bogɛ ga ani nu ɣa zaana ɛ lɛ laa-nɔwɔ-woga ani ɓalaa manui faa yowũ lamaa ɣɛɛni, tɔwɔ nii ɣa de ɣaa-nɛkpɛ. A Loomɛitiɛ 6:7 lodo, wo gaa-zaɣa-kɛɛ niitiɛ ɣaa wote:

• E ɣɛ velei Gala Kɔlɔi boga la ga ani nu ɣa zaana wũ-maa-wogɛ sa faa yowũ ya. E ɣisu zɔitiɛ te zaa ta laa-nɔwɔ-wosu faa yowũi niitiɛ ʋaa ma te kɛɛni?

Da faa lamaa maa wolina e vile Jehova va, da kwɛ̃ɛ ɓɔɔ ga ɛ lɛ saa vea laa-nɔwɔ-woga. A Deuteronomy 32:4 ɓɔga 1 Jɔ̃ 4:8 lodo, wo gaa-zaɣa-kɛɛ niitiɛ ɣaa wote:

• E ɣisu Galagi nii tuɓo-vele vapagi niitiɛ te zeea towa numaa laa-nɔwɔ-wo ani ta zaana?

• E ɣisu gaamai e vile saa va towa e ɣaa-nɛkpɛ? Zɛɓɛi e kɛɛ yiɛ na wo?

 NII SA È MAA WOLIA

Ani nu ɣa zaana ɛ lɛ sa faa ta nɛpɛ kɛɛ. Saa vea tɛ lɛ laa-nɔwɔ-woga ɔ nɔ ɣɛ ga te faa yowũ ɣɛ ga diɛ.

Ma-ɓigitiɛ

• Zɛɓɛi ya ɣɛ ga nu ani ya zaana?

• Da gaamai wɛ̃ɛna e vile saa va towa ɓɔ de va ɣɛ le?

• Da gaamai wɛ̃ɛna e vile saa va towa de ɣaa-nɛkpɛ ɣɛ le?