KALABO 36
Tele-Bo Tuo Wo Faa Pɛ Su
Nu pɛ ge wõini tele-bo tuo wo bea te ɣɛ ga ta ziɛ-pulua. Jehova tɔ ɓalaa e wõini na siɛ-puluitiɛ te ɣɛ ga tele-bo tuo wo bea. Kɛ tanisu na ɣa ɓaa ga de ɣɛ ga tele-bo tuo wo bea. Ɓɔvɛlaale ŋeteai nii zu nu lamaa ta ga tele-bo-tala luo wo bea. Kulo su-nu-ma zɛɓɛi da maa zɔlɔwo ani da ɣɛna ga tele-bo tuo wo bea faa pɛ su?
1. Zɛɓɛi ɓɔɔ e kɛɛ manɛɛ de ɣɛ ga tele-bo tuo wo bea?
Ani da tele-bo tuo wona ga de vaitiɛ, da dɛ ga Jehova ga wõila ɣa de ya faa ma na ɣa ɣɛɛna da wũfesu ma. Ɣi-gaa-ziɛ nii ma: Jehova kwɛ̃ni nii ɓɔgapɛ da kɛ e vɛɛ niitiɛ va da ɣi-gaa-ziɛ ma. (Hiiɓuluitiɛ 4:13) Towa kwɛ̃ɛ ani da ɣaa ɓaana ga de ɣɛ ga tele-bo tuo wo bea, tɔwɔ na ɣa zii-la. Gala Kɔlɔi ɣɛ: “Jehova lɛ wõini ga niitiɛ ta ʋuulu ʋaa ɣɛ, kɛ tele-bo tuo veaitiɛ ɣa ta ɣɛ ga na siɛ-pulu.”—Proverbs 3:32.
2. Pelei taniga ta ga zɛɓɛ da tele-bo tuo wo la da ŋeteai zu?
Jehova wõini “a diɛ gaamai wo ɣiini ma.” (Zechariah 8:16, 17) Na zu-wulo-zu ɣa ga zɛɓɛ? Ani da ɣɛna yɛpɛzu de ɣaa yɔwɔ̃i ta wɔ, gɔmɛti wũ-tuo veaitiɛ te ta, ɔɔ niitiɛ da tiɛni de tii ɣɛɛzu kii-ma, maa lɛ nɛɛni dɔ zɛɛ ʋaa wo. Tele-bo tuo veaitiɛ tɛ lɛ wũmɔ woga te veaitiɛ ma ɔ nɔ ɣɛ ga te te ʋuulu. (Proverbs 24:28; ɓɔga Ɛfɛsɔitiɛ 4:28 lodo.) Tele-bo tuo veaitiɛ ta nii ʋe gɔmɛtii ɣa bo ga te fe. (Loomɛitiɛ 13:5-7) Da ɣɛna niitiɛ ɣɛɛzu, da “ɓaa-la-ma luo wo faa ɣaazɔ zu.”—Hiiɓuluitiɛ 13:18.
3. Kulo su-nu-ma zɛɓɛi da sɔlɔwo ani da ɣɛna tele-bo tuo wosu?
Ani numaa ta kwɛ̃ɛna ga da ga tele-bo tuo wo bea ta la ga diɛ. Da kɛ wɔnɔ kuuzu nɛɛ ɣɛ nu ɓɔgapɛ zeea kuuwui zu. Da ɓalaa de ɣigii zu ɣa ɣɛ kala, kuuzu nɛɛ ɣɛ de ya. Da ɣɛna ga tele-bo tuo wo bea, da “ɓaa la de valo nui Gala na kala-bogi ma fai ɣaazɔ zu.” Da ɓɔ wɔnɔ numaa va ga te va te Jehova ʋeli.—Taitɔ 2:10
FAA LAMAA MAA WOLI
Wɛlɛ velei da lele-bo tuoi ɣa faa vɛɛ la Jehova na ki-gaa-ziɛi va e vɛɛ da ɣi-gaa-ziɛi va. Faa maa woli wɔnɔ e vile velei va da ɣɛɛ la ga tele-bo tuo wo bea da ŋeteai zu.
4. Da ɣɛna ga tele-bo tuo wo bea da Jehova wuuzu nɛɛ
A Psalms 44:21 ɓɔga Malachi 3:16 lodo, wo gaa-zaɣa-kɛɛ niitiɛ ɣaa wote:
-
Zɛɓɛi e kɛɛ lɛ vani ga de ɣi-gaa-ziɛ ga da faa ta nɛpɛ doowũ Jehova va?
-
Jehova ɣa ɣi-gaa-ziɛ ɣɛ le ani da ɣaa ɓaana ga de gaamai wo faa pɛ su ani ɓalaa na ɓaavɛ?
Lopaitiɛ ta ɣɛna gaama wosu ta te ɣaa veaitiɛ wuuzu nɛɛ. Da ɓalaa da ɣɛna gaama wosu da Jehova wuuzu nɛɛ
5. Tele-bo tuo wo faa pɛ su
Numaa taniga te laavɛ la ga dɛ lɛ zooga dɔ tele-bo tuo wo faa pɛ su. Kɛ wɛlɛ nii va e kɛɛ manɛɛ de tele-bo tuo wo faa pɛ su. ƲILIOGI nii lɛ ga.
A Hiiɓuluitiɛ 13:18 lodo, wo yɛpɛ e vile velei va da ɣɛɛ la ga tele-bo tuo wo bea . . .
-
kaalai zu.
-
da lii ɣɛɛzu vɛ ɔɔ kɔlɔ vɛlɛi la.
-
faa pɛ su.
6. Da ɣɛna ga tele-bo tuo wo bea da wulo su-nu-ma
Tanisu na ɣa ɓaa ga de ɣɛ ga tele-bo tuo wo bea. Kɛ ani da ɣaa ɓaana da wulo su-nu-ma. A Psalms 34:12-16 lodo, wo gaa-zaɣa-kɛɛ nii ɣaa wote:
-
Ya ɣɛna ga tele-bo tuo wo nu ya wulo su-nu-ma ɣɛ le?
-
Ʋulu veaitiɛ ta ɣɛna tele-bo tuo wosu ta ta wõilai zu-ɓaa ɣiini faa ma
-
Taitiɛ te tii ɣɛɛzu, ta ɣɛna tele-bo tuo wosu ta kɛ ta nu walaitiɛ te la ga tiɛ
-
Ani da ɣɛna ga tele-bo tuo wo bea da kɛ gɔmɛti nu walaitiɛ te la ga diɛ
NUMAA TANIGA TA ƔƐ TEA: “Zɛɛ ʋai taniga tɛ lɛ ga faa yowũ.”
-
Zɛɓɛi e kɛɛ e lai la ga Jehova lɛ wõini ga zɛɛ ʋaa?
NII SA È MAA WOLIA
Jehova wõini na siɛ-puluitiɛ te ɣɛ ga tele-bo tuo wo bea faa pɛ su.
Ma-ɓigitiɛ
-
Pelei taniga ta ga zɛɓɛ da dɛɛ la ga da ga tele-bo tuo wo bea?
-
Zɛɓɛi e kɛɛ lɛ vani ga de ɣi-gaa-ziɛ ga da faa ta nɛpɛ doowũ Jehova va?
-
Zɛɓɛi e kɛɛ e wõini e ɣɛ ga tele-bo tuo wo nu faa pɛ su?
WƐLƐ FAA LAMAA VA
Duu kɛɛ veaitiɛ ta te leaitiɛ ɣalabo ɣɛ le ga te ɣɛ ga tele-bo tuo wo bea?
Ani da ɣɛna numaa ɣi-tosu diɛ kɛ, kulo su-nu-ma zɛɓɛi da sɔlɔwo?
Wɛlɛ nii va e kɛɛ manɛɛ diɛ naʋoloi nii leve gɔmɛtii ɣa bo ga de teve ani ɓalaa dɛ lɛ wulozu su-nu-ma.
“Naʋoloi Gɔmɛti Ɣa Kulo, E Ɣisu Manɛɛ De Teve” (The Watchtower, September 1, 2011)
Zɛɓɛi e ɓɔni zunui nii va e na ŋeteai maa ʋeli bo yiɛ sa tele-bo tuo wo?
“Ge Kwɛ̃ni Ga Jehova Ɣa De Ɣaazu Maa Wõi Zo E De Zu-Ʋaa-Yɛ” (The Watchtower, May 1, 2015)
