KALABO 41
Zɛɓɛi Gala Kɔlɔi Boga E Vile Ŋii-Pɛlɛ-Wu Ʋaa Va?
Nu lamaa ɣa wũfe ga te yɛpɛ e vile ŋii-pɛlɛ-wu ʋaa va. Kɛ Gala Kɔlɔi gaamai lɛɛvɛ ga diɛ e vile ŋii-pɛlɛ-wu ʋaa va wũfe-ma vele zu. Tɛnɛgi e fea da wulo su-nu-ma. Jehova ɣa e de ɓɛtɛɛ na ma e kwɛ̃ni nii pagɛi de ʋaa ma. E dɛɛvɛ ga velei da zoo de zii-mai ɣɛɛ la. Nii wɔnɔ manɛɛ de kɛ ga de yɛ ŋetea wɔlɔ-wɔlɔ ta wɔlɔ-wɔlɔ e dɛɛvɛ ga diɛ.
1. Zɛɓɛi e ga Jehova na ki-gaa-ziɛi e vile ŋii-pɛlɛ-wu ʋaa va?
Ŋii-pɛlɛ-wu ʋaa ɣa ga faa-nɛɛ kuloai Jehova ya. E wõini ani numaa ta ɣii ʋuluna te maɣaa-nɛɛ wulo. Faa-nɛɛ nii ɣa ɓɔ ʋulu veaitiɛ va te duu ɣa. Ta zoo wɔnɔ te wõilai nii lɛ e te ya ɣiini faa ma. Na ɣa e kɛɛ Gala Kɔlɔi ɣɛ: “Wuuzu nɛɛ e ŋazai ʋaa ma.” (Proverbs 5:18, 19) Jehova bogɛ te ma ga te ɣata ɣii va na ɣa ya kɛ tɛ lɛ wɛ̃ɛ-ziɛ boga.—Hiiɓuluitiɛ 13:4 lodo.
2. Wɛ̃ɛ-ziɛgi zu-wulo-zu ɣa ga zɛɓɛ?
Gala Kɔlɔi bogɛ ga, “ɓaa-wulo-ma wɛ̃ɛ-yeke-kɛɛ vea . . . te weli gɛ lɛ ɣɛɛ ga Gala na masadai.” (1 Kɔlĩitiɛ 6:9, 10) Taitiɛ te Gala Kɔlɔi wonɛni Geliiki woi zu te wɛ̃ɛ-ziɛgi lilini ga por·neiʹa. Woi nii zu-wulo-zu ɣa ga (1) taitiɛ ta ŋii-pɛlɛ-wu a ʋaa ɣɛ tɔwɔ tɛ lɛ ga ʋulu vea, (2) zunu ɓɔga zunu ɔɔ ŋaza nu ɓɔga ŋaza nu ta ŋii-pɛlɛ-wu ʋaa ɣɛɛna, (3) nu ɓuse ɓɔga suo ta ŋii-pɛlɛ-wu ʋaa ɣɛɛna. Da Jehova yii-la, de wulo su-nu-ma wɔnɔ ani da “ɓɔɔ ɓeteve na wɛ̃ɛ-ziɛ boga va.”—1 Tɛsɛlonaikaitiɛ 4:3.
FAA LAMAA MAA WOLI
Wɛlɛ velei va ya maa wooza la wɛ̃ɛ-ziɛ bo fai va. Ani ya ɣaa ɓaana e ɣɛ ga maa ɣele nu wɛlɛ velei va ya wulo la su-nu-ma.
3. Maa wooza wɛ̃ɛ-ziɛ bo fai va
Zoosɛ ɣɛni ga Jehova ʋeli nu vagɔ, e ɣaa ɓaani ga e maa wooza wɛ̃ɛ-ziɛgi va. A Genesis 39:1-12 lodo, wo gaa-zaɣa-kɛɛ niitiɛ ɣaa wote:
-
Zɛɓɛi e ɓɔni Zoosɛ va ga e maa wooza wɛ̃ɛ-ziɛgi va?—Wɛlɛ ma woo 9 va.
-
E ɣisu nii Zoosɛ kɛɛni e ɣɛni ga faa vagɔ? Zɛɓɛi e kɛɛ yiɛ na wo?
Nu niinɛitiɛ ta vile ɣɛ le Zoosɛ na po-kɔ̃ɔ-mai zu ga te maa wooza wɛ̃ɛ-ziɛ bo fai va? ƲILIOGI nii lɛ ga.
Jehova wõini de ɓɔgapɛ de maa wooza wɛ̃ɛ-ziɛ bo fai va. A 1 Kɔlĩitiɛ 6:18 lodo, wo gaa-zaɣa-kɛɛ niitiɛ ɣaa wote:
-
Fai taniga ta ga zɛɓɛ ya kɛ nu yee vili wɛ̃ɛ-ziɛ bo faa zu?
-
Da leve ɣɛ le de maa wooza wɛ̃ɛ-ziɛ bo fai va?
4. Ya zoo e maa wooza wɛ̃ɛ-ziɛgi va
Zɛɓɛi e kɛɛ tanisu na ɣa ɓaa ga nu maa wooza wɛ̃ɛ-ziɛ bo fai va? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Ʋiliogi nii zu, tei de ɣaa yɔwɔ̃i kwɛ̃ni ga velei e ɣɛni ɣi-gaa-ziɛzu la ta velei e ɣɛni luɓozu la ɔ kɛ e wɛ̃ɛ-ziɛ bo zɛɓɛi e kɛɛni?
Kolai Maa Vea ɓɔɔɓɔɔgitiɛ ta ɓalaa ta ɣaa-ɓaa ga te ta ɣi-gaa-ziɛi maa ɣele. Zɛɓɛi ya ɓɔ e va e mɛlɛ ɣɛ ɣi-gaa-ziɛzu e vile wɛ̃ɛ-ziɛ bo faa va? A Felepaitiɛ 4:8 lodo, wo gaa-zaɣa-kɛɛ niitiɛ ɣaa wote:
-
Zɛɓɛi manɛɛ diɛ ɣi-gaa-ziɛ e vile ba?
-
Ani da ɣɛna Gala Kɔlɔi lodosu diɛ ɣaa-ɓaa Jehova na tii zu towa ɓɔ de va ɣɛ le de maa wooza faa yowũ va?
5. Da wulo Jehova na tɔgitiɛ zu-nu-ma
Jehova kwɛ̃ni nii pagɛi de ʋaa ma. E bogɛ de ma ga de ɣɛ ga maa ɣele vea. E kulo su-nu-mai lɛɛvɛ wɔnɔ da maa zɔlɔwo ani da na ɣɛɛna. A Proverbs 7:7-27 lodo ɔɔ wo ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Zunui nii dɛɛni ɣɛ le ga kele-ɣele gɛ lɛ ɣɛni zeea?—Wɛlɛ Proverbs 7:8, 9 va.
-
E ɣɛ velei Proverbs 7:23, 26 boga la, wɛ̃ɛ- ziɛ bo fai ɣa va ga zii zuuli lamaa. Ani da ɣɛna ga maa ɣele vea, faa ɓaa sɛɓɛi da maa wooza ba?
-
Ani da ɣɛna ga maa ɣele vea towa ɓɔ de va ɣɛ le ga de ŋetea ɣɛ wɔlɔ-wɔlɔ ta wɔlɔ-wɔlɔ?
Gala Kɔlɔi faa wogɛ e vile zunu ɓɔga zunu ɔɔ ŋaza nu ɓɔga ŋaza nu ŋii-pɛlɛ-wu ʋaa va. Nu taniga ta ɣi-gaa-ziɛ ga nii Gala Kɔlɔi boga ɛ lɛ ga faa vagɔ. Kɛ wõila ɣa Jehova ya nu ɓɔgapɛ faa ma. E wõini de yɛ ŋetea wɔlɔ-wɔlɔ ta wɔlɔ-wɔlɔ kuuzu nɛɛ zu. Kɛ ani de wõini de yɛ ŋetea kɛni da ziɛ ga na tɔgitiɛ. A 1 Kɔlĩitiɛ 6:9-11 lodo, wo gaa-zaɣa-kɛɛ nii ɣaa wote:
-
E ɣisu zunu ɓɔga zunu ɔɔ ŋaza nu ɓɔga ŋaza nu ŋii-pɛlɛ-wu ʋai nɔɣa e ga faa yowũ Jehova ɣaazu?
Ani de wõini de Gala yii-mai ɣɛ kɛni de ɓɔgapɛ da ɣaa-ɓaa de faa taniga maa ʋeli bo da ŋeteai zu. E ɣisu tɔ ga faa vagɔ ga de nii ɣɛ? A Psalm 19:8, 11 lodo, wo gaa-zaɣa-kɛɛ niitiɛ ɣaa wote:
-
E ɣisu Jehova na tɔgitiɛ te vagɛ de ʋaa ma? Zɛɓɛi e kɛɛ yiɛ na wo?
NUMAA TANIGA TA ƔƐ TEA: “Ɛ lɛ ga faa yowũ ga nu ŋii-pɛlɛ-wu ʋaa ɣɛ ga nui nɛpɛ e wõini e kɛɛ la, ani nɔ te wõini ga ɣii.”
-
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Ŋii-pɛlɛ-wu ʋai ɣa ga faa-nɛɛ kuloai Jehova ya, e wõini ʋulu vea te maɣaa-nɛɛ wulo.
Ma-ɓigitiɛ
-
Wɛ̃ɛ-ziɛgi zu-wulo-zu ɣa ga zɛɓɛ?
-
Zɛɓɛi ya ɓɔ de va ga de maa wooza wɛ̃ɛ-ziɛ bo faa va?
-
Ani da ziɛna ga Jehova na tɔgitiɛ da wulo ɣɛ le su-nu-ma?
WƐLƐ FAA LAMAA VA
Wɛlɛ nii va e kɛɛ Gala ge boga ga ani ŋaza nu ɓɔga zunu te wõini te yɛ kii-ma manɛɛ te ɣii ʋulu.
Gala Kɔlɔi bogɛ ga zunu ɓɔga zunu ɔɔ ŋaza nu ɓɔga ŋaza nu ŋii-pɛlɛ-wu ʋai lɛ ga faa vagɔ. Kɛ wɛlɛ nii va e kɛɛ maa lɛ nɛɛni dɔɔ zili ga niitiɛ ta nii maʋai ta ɣɛ.
Wɛlɛ velei Gala na tɔgitiɛ ta de maazu vɛtɛ la e vile ŋii-pɛlɛ-wu ʋaa va.
Po-kɔ̃ɔ-mai nii zu “Te Soni Ɓɔɔ Ga Pagɔ,” wɛlɛ nii va e ɓɔni zunui nii va ɔ la ga bɔlɔ zinaitiɛ ga e luɓo-velei maa ʋeli e Jehova yii-mai ɣɛ.
“Gala Kɔlɔi Ɣa Da Ŋeteai Maa Ʋeli Bo” (The Watchtower, April 1, 2011)
a Tuɓo-vele yowũi nii zu-wulo-zu lamagɛ. Ta ɣa ga wɛ̃ɛ-ziɛgi e vɛɛ sa faa taniga va tɛ lɛ pele ma e vile ŋii-pɛlɛ-wu ʋaa va.