Ŋada taniga numaa te laavɛ la ga ani nu wõini e ɣɛ ga kuuzu nɛɛ nu, kɛni ya ʋulu ʋaa ɣɛ. Kɛ ʋulu veaitiɛ te pɛ taale te ga kuuzu nɛɛ vea. Na ɣa ɣɛɛna kaɓawɔitiɛ ɓalaa te pɛ taale te ga kuuzu nɛɛ vea. Gala Kɔlɔi dɛɛvɛ ga kaɓawɔ lai ɓɔga ʋulu ʋai te pɛ ta ga faa-nɛɛ kuloai Jehova ya.

1. Zɛɓɛi e ga kulo su-nu-mai nu ɣa sɔlɔwo ani ya ɣɛna ga kaɓawɔ?

Gala Kɔlɔi ɣɛ: “Nui ta ná tabolo wɛ̃ɛ ta ɣii wulo, manui ɣa kɛ ga pagɔ. Nui nii wɔnɔ yá e ná tabolo wɛ̃ɛ-wulo ʋaa va, ná dɛi ɣa va ga tamaa.” (1 Kɔlĩitiɛ 7:​32, 33, 38 lodo.) Kaɓawɔi na dɛɛ ɣa va ga tamaa ɣɛ le? Kaɓawɔitiɛ tɛ lɛ ɣi-gaa-ziɛa e ɣɛ velei ʋulu veaitiɛ ta ɣi-gaa-ziɛ la ga te te ŋazai ɔɔ te te wɔɔ nu ɓalama ʋaitiɛ ɣa wulo ba. Nii ɣa e kɛɛ siɛ tamaa ɣa ɣɛ te ya. Ma wo-kɔ̃ɔ-mai ta ɣa ga te taniga ta tii lamaa ɣɛ Gala goo wotii zu. Tii nii ta ɣa ga te li zuu ɓalaa su ga te Gala goi wo. Maɓigi ɣa ga, siɛ tamaa ɣa ɣɛ te ya ga te ta ziɛ-pului zu-ɓaa te yɔɔzu ta Jehova.

2. Zɛɓɛi e ga kulo su-nu-mai nu ɣa sɔlɔwo ani ya ʋulu ʋaa ɣɛɛna?

E ɣɛ velei kaɓawɔ lai la, ʋulu ʋai ɣa va ga kulo su-nu-ma lamaa. Gala Kɔlɔi ɣɛ “felegɔ ʋize wogɛ gila ba.” (Ecclesiastes 4:9) Nii ɣa ɓɔɔ ga gaama Kolai Maa Veai niitiɛ ʋaa ma te ga ʋulu vea, tiɛ ziɛ ga tɛnɛgi niitiɛ te Gala Kɔlɔi zu. Taitiɛ ta ʋulu ʋaa ɣɛ ta ɣiini ɣi-to ga te wõi ga ɣii. Ta bo wɔnɔ ga ta wũfe ɣiini ma na ɣa ɣɛɛna te ɣiini so ga pagɔ. Nii ɣa kɛ kuuzu nɛɛ ɣɛ te ya ɣiini faa ma e leve niitiɛ va te kii-ma kɛ tɛ lɛ dɛ ʋulu ʋaa ɣɛɛni. Ʋulu ʋai ɣa ɓɔ duu kɛɛ veaitiɛ va te te leaitiɛ wulosu ɓɔɔ ga pagɔ.

3. Jehova ɣa ɣi-gaa-ziɛ ɣɛ le e vile ʋulu ʋaa va?

Siɛgi ma Jehova ʋulu ʋai maa wũgi ɣɛɛni la, e ɣɛni tea: “Zunui ɣa wulo dee ɓɔga keea ta e ɣata ŋazai va.” (Genesis 2:​24) Jehova wõini ʋulu veaitiɛ te yɛ kii-ma e yɛsu te za. Nii nɔ ya kɛ ʋulu vea te ɣaa wɛɛ tɔ ga ani te ta ɣa wɛ̃ɛ-ziɛ bona. Jehova bogɛ ga ani ʋulu veaitiɛ te ta ɣa wɛ̃ɛ-ziɛ bona bɔlɛɛ ɣa wõina ta yɛ kii-ma ɔɔ te ɣaa wɛɛ. a (Mafiyu 19:9) Ŋaza nu lamaa wulo ʋai lɛ ga Jehova yii-ma ʋaa.​​—1 Temete 3:2.

 FAA LAMAA MAA WOLI

5. Deʋe vagɔ wo e vile nui nii va e wõini e fulu

Deʋe wo fai e vile nui nii va e woni e fulu tɔ ga faa ɓigii ta ya ŋeteai zu. A Mafiyu 19:​4-6, 9 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛ maa lɛ nɛɛni Kolai Maa Veaitiɛ tɔ ʋile ga ʋulu ʋai?

Gala Kɔlɔi ɣa ɓɔ e va e tuɓo-velei niitiɛ wɛ̃ɛ manɛɛ e ɣɛ nui nii ya e vaazu fuluzu. Maɓigi ɣa ga nui nii ɣaa-ziɛ wõila zeea Jehova ʋaa ma. b A 1 Kɔlĩitiɛ 7:​39 ɓɔga 2 Kɔlĩitiɛ 6:​14 lodo, wo gaa-zaɣa-kɛɛ niitiɛ ɣaa wote:

• Zɛɓɛi e kɛɛ Kolai Maa Veaitiɛ te ta nɔɣa manɛɛ de fulu?

• E ɣisu Jehova ɣa ɣi-gaa-ziɛ ɣɛ le ani da nui ta ʋuluna tɔwɔ wõila lɛ manui ya faa ma?

 6. Ɣi-gaa-ziɛ e ɣɛ velei Jehova ɣa ɣi-gaa-ziɛ la e vile ʋulu ʋaa va

Wɔlɔ-wɔlɔi zu faa wolo nɔɣa ɔ kɛ Yezɔi zinai taniga te ɓe te ŋazaitiɛ va. A Malachi 2:​13, 14, 16 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛ Jehova lɛ wõini ʋulu vea tɔ ɣaa wɛɛ ani te ta lɛ wɛ̃ɛ-ziɛ boni?

ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

• Ani e ŋazai ɔɔ e wɔɔ nu lɛ ga Kolai Maa Veaitiɛ te ta, zɛɓɛi yà kɛ ga kuuzu nɛɛ ɣɛ wo ya?

7. Ziɛ ga nii Jehova boga e vile ʋulu ʋaa va

 NII SA È MAA WOLIA

Kaɓawɔ lai ɓɔga ʋulu ʋai ɣa ga faa-nɛɛ kuloai Jehova ya. Ʋulu veaitiɛ ɓɔga kaɓawɔitiɛ ta zoo te kuuzu nɛɛ maa zɔlɔwo ani ta ta ŋeteai ɣɛɛna e ɣɛ velei nɔ Jehova boga la.

Ma-ɓigitiɛ

• Kaɓawɔitiɛ ta leve ɣɛ le te tii lamaa ɣɛ?

• Zɛɓɛi e kɛɛ ani Kolai Maa Veaitiɛ te ta wõini e ʋulu ʋaa ɣɛ, manɛɛ e nui ta ʋulu e ga Jehova ʋeli nui ta.

• Zɛɓɛi Gala Kɔlɔi boga ga ya kɛ ʋulu vea te ɣaa wɛɛ?