KALABO 43
Manɛɛ Kolai Maa Veaitiɛ Te Ɣi-Gaa-Ziɛ Ɣɛ Le E Vile Dɔɔ Ɓoale Ʋaa Va?
Zui wɔlɔ-kɔlɔ ma numaa ta ɣi-gaa-ziɛ ga ta ɓalaa e vile dɔɔ ɓoale ʋaa va. Numaa taniga ta wũina kii-ma ta wõi ga te dɔɔ ɓoale ta te vaitiɛ. Fikaa wɔ tɛ lɛ wõini ga dɔɔ ɓoale ʋaa. Taniga te wõini ga dɔɔ ɓakpa ɓoale ʋaa. Kɛ zɛɓɛi Gala Kɔlɔi boga e vile dɔɔ ɓoale ʋaa va?
1. E ɣisu tɔ ga faa yowũ ga nu dɔɔ ɓoale?
Gala Kɔlɔi lɛ boni ga tɔ ga faa yowũ ga nu dɔɔ ɓoale. Gala Kɔlɔi dɛɛvɛ ga faa-nɛɛ niitiɛ zaama Jehova kɛɛ de vɛ ta ɣa ga “dɔi nii ya kɛ nu wuuzu nɛɛ.” (Psalms 104:14, 15) Jehova ʋeli veai niitiɛ Gala Kɔlɔi yɛpɛi e vile te va taniga tɔ dɔɔ ɓoale.—1 Temete 5:23.
2. Tɛnɛ sɛɓɛi Gala Kɔlɔi fea niitiɛ ya ta dɔɔ ɓoale?
Jehova lɛ wõini ga nui ya dɔɔ ɓoale ga ʋike ɔ nɔ ɣɛ ga e kpoale na so. (Galeesiaitiɛ 5:21) Gala Kɔlɔi ɣɛ: “Mɛlɛ ɣɛ niitiɛ zaama ta dɔɔ ɓoale ga ʋike.” (Proverbs 23:20) Na ma ani da deʋena ga de dɔɔ ɓoale ani ɓalaa de gila nɔɣa de na, de mɛlɛ dɔɔ ɓoale ga ya kɛ dɛ lɛ ɣi-gaa-ziɛa ga pagɔ. Towa kɛ wɔnɔ dɛ lɛ luɓoa ga pagɔ, ɔɔ ɣeeta e faa vɛɛ de lɔtɔi va. Pagɛ ga de ɓe dɔɔ ɓoale ʋai va ani tɔɔ kɛɛzu diɛ faa taniga ɣɛ lɛ pele ma.
3. Da leve ɣɛ le de wũfe de vaaniga ma ani ya vaana dɔɔ ɓoale ʋaa wɔ?
Manɛɛ nu ɓɔgapɛ ge deʋe wo e vile dɔɔ ɓoale ʋaa va. De mɛlɛ ɣi-gaa-ziɛ ga yowũa e vile niitiɛ va ta da ɣisu ga te dɔɔ ɓoale tɔwɔ ɛ lɛ kɛɛzu tɔ luɓo ga yowũa. Tɔwɔ de mɛlɛ ɓoei nu la ga e dɔɔ ɓoale ani manui lɛ wõini. (Loomɛitiɛ 14:10) Ani de kwɛ̃ni ga da dɔɔ ɓoalena towa faa vɛɛ numaa ta ɣi-gaa-ziɛi va, da deʋe ga de mɛlɛ dɔɔ ɓoale. (Loomɛitiɛ 14:21 lodo.) Dɛ lɛ faa ɣɛɛ “ɔɔ wulo-nu-ma ʋaa ma, kɛ̀ to mu [da] kɛ bɔɔ nu na kulo-nu-ma ʋaa ma.”—1 Kɔlĩitiɛ 10:23, 24 lodo.
FAA LAMAA MAA WOLI
Wɛlɛ tɛnɛgi taniga va te Gala Kɔlɔi zu ga ta ɓɔ e va ga e deʋe ani ya dɔɔ ɓoale ta dɔi liigoi ya kpoale. Wɛlɛ wɔnɔ nii va ya ɓɔ e va ani ya ɣaa ɓaazu ga e ɓe dɔɔ ɓoale ʋai va.
4. Deʋe wo e vile dɔɔ ɓoale ʋaa va
Zɛɓɛi e ɣɛni ga Ziizɛ na ki-gaa-ziɛi e vile dɔɔ ɓoale ʋaa va? Ga e gaa-zaɣa-kɛɛ nii ɣaa wotegi wɛ̃ɛ, wɛlɛ faa ma wɔlɔ-wɔlɔ maa wũgi va Ziizɛ kɛɛni. A Jɔ̃ 2:1-11 lodo, wo gaa-zaɣa-kɛɛ niitiɛ ɣaa wote:
-
Faa ma wɔlɔ-wɔlɔgi nii Ziizɛ kɛɛni zɛɓɛi e dɛɛzu ga diɛ e vile Ziizɛ na ki-gaa-ziɛi va e vile dɔɔ ɓoale ʋaa va e vɛɛ niitiɛ va ta dɔɔ ɓoale?
-
Tei lɛ ɣɛni ga faa yowũ Ziizɛ ɣaazu ga nu e dɔɔ ɓoale, manɛɛ Kolai Maa Veaitiɛ te ɣi-gaa-ziɛ ɣɛ le e vile nui nii va e deʋea ga e dɔɔ ɓoale?
Na ɓalaa ɣɛɛvɛ, velei ɓalaa lɛ ga faa yowũ ga Kolai Maa Veaitiɛ te dɔɔ ɓoale, lɛ ga faa vagɔ ga nu dɔɔ ɓoale siɛ nɛpɛ ma. A Proverbs 22:3 lodo, wo wɛlɛ velei va fai niitiɛ ta faa vɛɛ la ya ɣi-gaa-ziɛi va e vile dɔɔ ɓoale ʋaa va ani:
-
Ya ɣɛna liizu ga e kpize ŋɛni ziɛ ɔɔ ga e tii ɣɛ ga koli ŋɛni.
-
Ko ka e va.
-
Te bogɛ e ma sale-vɛlɛi la ga e mɛlɛ dɔɔ ɓoale.
-
Ɛ lɛ kwɛ̃ni vɛ ya wɛ̃ɛna dɔɔ ɓoale ʋai va.
-
Tɔ ga tɔ ga e mɛlɛ dɔɔ ɓoale.
-
Wa nui ta wa kii-ma tɔwɔ manui deʋea ga e ɓe dɔɔ ɓoale ʋai va ɓɔvɛlaale e kwɛ̃ni ga ya dɔɔ ɓoalena towa faa taniga ɣɛ lɛ pele ma.
Numaa ta li ʋulu ɣɛɛzu e vɛɛ sa gaalɛ-ba taniga va. E ɣisu tɔ ga faa vagɔ ga e dɔɔ ʋe numaa ya gaalɛ-bai natiɛ zu? Ga e wɛlɛ nii va ya ɓɔ e va e deʋe vagɔ wo, ƲILIOGI nii lɛ ga.
A Loomɛitiɛ 13:13 ɓɔga 1 Kɔlĩitiɛ 10:31, 32 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:
-
Ani ya ziɛna ga tɛnɛgi niitiɛ towa ɓɔ e va ɣɛ le ga e deʋe vagɔ wo ga e Jehova yii-la?
Kolai Maa Veaitiɛ ta deʋe wo te ɣile-giledaitiɛ ani ta dɔɔ ɓoale ɔɔ tɛ lɛ dɔɔ ɓoalea. Ani ɓalaa manu ɣa dɔɔ wolo ɓoale maa lɛ nɛɛni siɛ nɛpɛ ma sa yiɛ dɔɔ ɓoale
5. Ɣi-gaa-ziɛ dɔi liigoi ma ya kpoale
Ani e deʋea ga e dɔɔ ɓoale ɣi-gaa-ziɛ nii ma: Velei ɓalaa Jehova lɛ boni la ga tɔ ga faa yowũ ga de dɔɔ ɓoale kɛ lɛ wõini ga nui ya dɔɔ ɓoale ga ʋike. Zɛɓɛ ʋaa ma? A Hosea 4:11, 18 lodo, wo gaa-zaɣa-kɛɛ nii ɣaa wote:
-
Zɛɓɛi ya ɣɛ ga nu ani ya dɔɔ ɓoale na ga ʋike?
Zɛɓɛi ya ɓɔ de va ga de mɛlɛ dɔɔ ɓoale ga ʋike? Manɛɛ de kwɛ̃ɛ dɔi liigoi da kpoale. A Proverbs 11:2 lodo, wo gaa-zaɣa-kɛɛ nii ɣaa wote:
-
Zɛɓɛi e kɛɛ e ga faa vagɔ ga e kwɛ̃ɛ dɔi liigoi ya kpoale?
6. Zɛɓɛi ya ɓɔ nu va ga e ɓe dɔɔ ɓoale ʋai va ga ʋike?
Wɛlɛ nii va e ɓɔni zunui nii va ga e ɓe dɔɔ ɓoale ʋai va ga ʋike. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Ʋiliogi nii zu, dɔi faa vɛɛni Dmitry luɓo-velei va ɣɛ le?
-
E ɣisu e ɓeni nɔ dɔɔ ɓoale ʋai va su ɣile?
-
Zɛɓɛi e ɓɔni ba ga e ɓe dɔɔ ɓoale ʋai va ga ʋike?
A 1 Kɔlĩitiɛ 6:10, 11 lodo, wo gaa-zaɣa-kɛɛ niitiɛ ɣaa wote:
-
Zɛɓɛi e kɛɛ da ɣɛ tea tɔ ga faa yowũ ga nu dɔɔ ɓoale ga ʋike?
-
Zɛɓɛi e dɛɛ ga taitiɛ ta dɔɔ ɓoale ga ʋike ta zoo te luɓo-velei maa ʋeli bo?
A Mafiyu 5:30 lodo, wo gaa-zaɣa-kɛɛ nii ɣaa wote:
-
Nii Ziizɛ boni ga manu e yee leve ba su-wulo-zu ɣa ga, kɛni e ɣaa-ɓaa e Jehova yii-mai ɣɛ. Zɛɓɛi manɛɛ e kɛ ani ya ɣaa ɓaazu ga e ɓe dɔɔ ɓoale ʋai va ga ʋike? a
A 1 Kɔlĩitiɛ 15:33 lodo, wo gaa-zaɣa-kɛɛ nii ɣaa wote:
-
Ya ziɛ-puluitiɛ ta faa vɛɛ ya ɣi-gaa-ziɛi va ɣɛ le e vile dɔi liigoi va ya kpoale?
NUMAA TANIGA TA ƔƐ TEA: “E ɣisu tɔ ga faa vagɔ ga nu dɔɔ ɓoale?”
-
Ya gaa-zaɣa-kɛɛ na ɣaa wote ɣɛ le?
NII SA È MAA WOLIA
Dɔi ɣa ga faa-nɛɛ kuloai Jehova ya. Kɛ ɛ lɛ wõini dɔ kpoale ga ʋike ɔ nɔ ɣɛ ga de kpoale e de zo.
Ma-ɓigitiɛ
-
Zɛɓɛi Gala Kɔlɔi boga e vile dɔɔ ɓoale ʋaa va?
-
Zɛɓɛi e kɛɛ lɛ vani ga dɔ dɔɔ ɓoale ga ʋike?
-
Da leve ɣɛ le de wũfe deʋei niitiɛ ma de vaaniga ta bo e vile dɔɔ ɓoale ʋaa va?
WƐLƐ FAA LAMAA VA
Nu niinɛitiɛ ta leve ɣɛ le te deʋe vagɔ wo e vile dɔɔ ɓoale ʋaa va?
Wɛlɛ niitiɛ va ya zoo e kɛ ga e ɓe dɔɔ ɓoale ʋai va ga ʋike.
Tanisu numaa ta ɣɛna dɔɔ ɓoalezu ta ɣɛ kɔpugii zeizu kii va. E ɣisu manɛɛ Kolai Maa Veaitiɛ te na ta ɣɛ?
“Gaa-Zaɣa-Kɛɛ Kɔlɔ Lodo Veaitiɛ Ta Bo” (The Watchtower, February 15, 2007)
Po-kɔ̃ɔ-mai nii zu “Gɔ Dɔɔ Ɓoale Ga Ʋike,” wɛlɛ nii va e ɓɔni zui nii va ga e ɓe dɔɔ ɓoalezu ga ʋike.
“Gala Kɔlɔi Ɣa Da Ŋeteai Maa Ʋeli Bo” (The Watchtower, May 1, 2012)
a Taitiɛ tɛ lɛ zoosu tɔɔ ɓe dɔɔ ɓoale ʋai va kɛni ta kpɔba maa zɔlɔwo numaa ya. Wui sale lii ɣɛɛ vea lamaa te wɛlɛi na va ga taitiɛ na ɓai ga te ɓe dɔɔ ɓoale ʋai va ga ʋike te mɛlɛ dɔɔ ɓoale.
