KALABO 44
E Ɣisu Ɣaa-Wogitiɛ Numaa Ta Bo Te Pɛ Ka Ta Gala Yii-La?
Jehova wõini de ŋeteai maɣaa-nɛɛ wulo na ɣa ɣɛɛna de ɣaa-wo bo siɛ taniga. Kɛ e ɣisu gaalɛ-baitiɛ ɓɔgapɛ numaa ta kɛ ga te ɣaa-wo bo te pɛ ka ta Gala yii-la? Da leve ɣɛ le de dɛ ga wõila ɣa de ya Jehova ʋaa ma ani ya vaana ɣaa-wo bo faa wɔ?
1. Zɛɓɛi e kɛɛ gaalɛ-baitiɛ numaa ta kɛ ga te ɣaa-wo bo, bɔɔlɔzu lɛ ɣɛɛ ga Jehova yii-ma ʋaa?
Ɣeeta towa wulo ga yiɛ ani ya kwɛ̃na ga gaalɛ-bai niitiɛ bɔɔlɔzu, Gala Kɔlɔi bogɛ ga tɛ lɛ ga gaalɛ-ba vagɔ. Gaalɛ-bai niitiɛ bɔɔlɔzu vilegɛ zɛɛ ʋaa ɣala-feli ʋaa va. Taniga te vilegɛ sale yeke kɛɛ ʋaa va ɔɔ ta dɛ ga nu ɣa zaana mawɔʋɛ ɣa ma. Fikaa wɔnɔ te vilegɛ zɛɛ ʋaa va. (Isaiah 65:11) Jehova ɣa feli veaitiɛ lɛnɛsu ga te: “Wulo te zaama . . . [te] mɛ lɛ ʋowũ niitiɛ va te maa lɛ ziɣini.”—2 Kɔlĩitiɛ 6:17. a
2. Jehova ɣa ɣi-gaa-ziɛzu ɣɛ le e vile gaalɛ-bai niitiɛ va numaa ta kɛ ga te nu ɓuse laa-maa-lɛ?
Jehova de lɛnɛgɛ ga de mɛlɛ yee “la nu ɓuse ma.” (Jeremiah 17:5 lodo.) Numaa ta ɣaalɛ-ba tanisu ga te masagi taniga laa-maa-lɛ ɔɔ te kɔɔ wɔɔ veaitiɛ laa-maa-lɛ. Ta gaalɛ-bai taniga ɣɛ wɔnɔ ga te ɣi-zɛ siɛgi zu ta yui wuloni la duola zu. (1 Jɔ̃ 5:21) Numaa taniga wɔnɔ ta gaalɛ-ba ɣɛ pilegɛi gɔmɛti ʋaa va ɔɔ ɓulugi taniga va. Da Jehova yii ɣaa-wãla ani da ɣɛna nu ɓuse laa-maa-lɛɛzu ɔɔ diɛ ɓulugi niitiɛ lo naa luo tɛ lɛ wõini zii-mai ɔ ɣɛ.
3. Zɛɓɛi ya kɛ gaalɛ-bai taniga tɛ lɛ ɣɛɛ ga Jehova yii-ma ʋaa?
Gala Kɔlɔi bogɛ ga tuɓo-velei niitiɛ tɛ lɛ vani “ŋɛni-wõi-leve-ma, dɔɔ-ɓakpa-ɓoalea, zɔɔ-zɔɔ gaa-wo-boga, [ta] dɔɔ-ɓoale wuu-ɣaa.” (1 Pite 4:3) Gaalɛ-bai taniga zu numaa ta wɛ̃ɛ-ziɛ bo te faa ta nɛpɛ kɛ na, tɔ nɛpɛ gɛ lɛ ɣɛɛ te ma. Daitiɛ de ga Jehova na siɛ-puluitiɛ manɛɛ de maa wooza maa-wuo-lala ʋai niitiɛ va.
FAA LAMAA MAA WOLI
Wɛlɛ velei va ya deʋe vagɔ wo la ga e Jehova yii-la ya vaana gaalɛ-bai niitiɛ wɔ numaa ta kɛ ga te ɣaa-wo bo.
4. Mɛlɛ yee zei gaalɛ-bai niitiɛ wu tɛ lɛ Jehova laa-maa-lɛɛ
A Ɛfɛsɔitiɛ 5:10 lodo, wo gaa-zaɣa-kɛɛ niitiɛ ɣaa wote:
-
Zɛɓɛi manɛɛ de kwɛ̃ɛ dɔɔ vɛɛ liizu gaalɛ-bai niitiɛ zu numaa ta kɛ ga te ɣaa-wo bo?
-
Ɣaa-wogi taniga ta ga zɛɓɛ numaa ta bo vɛ e na?
-
E ɣisu ɣaa-wogi niitiɛ ta Jehova laa-maa-lɛ?
Ɣeeta e ɣi-gaa-ziɛa dɛ e vile velei Jehova ɣa ɣi-gaa-ziɛ la e vile nu ɣaa ʋolo ɣaa-wo bo faa va? Gala Kɔlɔi lɛ boni ga Jehova ʋeli veaitiɛ te nu ɣaa ʋolo ɣaa-wo boni. Kɛ e faa wogɛ e vile nu ɣaa ʋolo ɣaa-wo bo felegɔ va numaa te kɛɛni tɔwɔ tɛ lɛ ɣɛni ga Jehova ʋeli vea. A Genesis 40:20-22 ɓɔga Mafiyu 14:6-10 lodo, wo gaa-zaɣa-kɛɛ niitiɛ ɣaa wote:
-
Nu ɣaa ʋolo ɣaa-wo bo felegɔi niitiɛ te wuloni ga vɛ ɣɛ le?
-
E ɣɛ velei e maa wolia la sa Gala Kɔlɔi zu e ɣisu Jehova ɣa ɣi-gaa-ziɛ ɣɛ le e vile nu ɣaa ʋolo ɣaa-wo bo faa va?
Kɛ tanisu ya dɛ ɣi-gaa-ziɛzu ani tɔ ga faa yowũ ga e li nu ɣaa ʋolo ɣaa-wo bosu ɔɔ ɣaa-wogi niitiɛ zu Gala Kɔlɔi boga ga tɛ lɛ vani. A Exodus 32:1-8 lodo, wo ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.
-
Zɛɓɛi e kɛɛ manɛɛ de niitiɛ wɛ̃ɛ ya Jehova yii-la?
-
Da leve ɣɛ le de na ɣɛ?
Da leve ɣɛ le de ɣaa-wogi niitiɛ wɛ̃ɛ Jehova lɛ wõini la?
-
E ɣisu Gala Kɔlɔi bogɛ ga lɛ vani? Ga e kwɛ̃ɛ, faa maa woli e vile velei ɣaa-wogi na lɔɔ-zeini la.
-
E ɣisu ta ɣaa-wogi ɓɔɔ wosu ga te nu ɓuse, ɓulugi ɔɔ ta yui laa-maa-lɛ? Manɛɛ de Jehova laa-maa-lɛ e leve nu nɛpɛ ba. Jehova nɔɣa de ɣigii ba ga e daa-nɔwɔ-wogi ɓɔgapɛ kpea zui zu.
-
Velei ta ɣaa-wogi na wo da e vɛɛ velei va ta luɓo la, e ɣisu Gala Kɔlɔi dɛɛvɛ ga tɛ lɛ vani? Manɛɛ de ɣɛ ga maa ɣele vea.
5. Ɓɔ numaa va ga te zoo te wũfe nii ma e laila
Ani nui ta ɣa bona e ma ga e li ɣaa-wogi nii ta zu ɛ lɛ ga Jehova yii-ma ʋaa, tanisu na ɣa ɓaa ga e ɣɛ tea ɓa. Maʋai zu-wulo ɓɔɔ ga pagɔ manui ma. Ga e wɛlɛ velei va ya zoo e nii ɣɛɛ la ƲILIOGI nii lɛ ga.
A Mafiyu 7:12 lodo, wo gaa-zaɣa-kɛɛ niitiɛ ɣaa wote:
-
E ɣɛ velei Gala goi nii boga la, e ɣisu manɛɛ e bo ya numaitiɛ ma ga te mɛlɛ li ɣaa-wo nɛpɛ su?
-
Ya dɛ ga ya numaitiɛ ɣɛ le ga velei ɓalaa ɛ lɛ vɛɛzu la te va wɔɔ li ɣaa-wogi na zu kɛ wõila ɣa e ya te ʋaa ma na ɣa ɣɛɛna te maa viivɛ e ɣaazu?
6. Jehova wõini kuuzu nɛɛ ɣɛ de ya.
Jehova wõini de kuuzu nɛɛ wulo kii-ma da da numaitiɛ e vɛɛ da ziɛ-puluitiɛ va. A Ecclesiastes 8:15 lodo, wo gaa-zaɣa-kɛɛ niitiɛ ɣaa wote:
-
Gala goi nii dɛɛvɛ ɣɛ le ga Jehova wõini kuuzu nɛɛ ɣɛ de ya?
Jehova wõini na numaitiɛ tiɛ ɣaa-wo bo kii-ma tiɛ wuuzu nɛɛ. ƲILIOGI nii lɛ ga e wɛlɛ velei nii vɛɛ ɣɛɛzu la ga ɣaalɛ-ba walaitiɛ zu.
A Galeesiaitiɛ 6:10 lodo, wo gaa-zaɣa-kɛɛ niitiɛ ɣaa wote:
-
E ɣisu manɛɛ de ɣaa-wo gwalaniga ɣɛ dɔ vɛɛ faa-nɛɛ ɣɛɛzu numaa vɛ?
-
Zɛɓɛi ɓɔɔ ya e wuuzu nɛɛ, ani ya faa-nɛɛ ɣɛɛna nu vɛ ɓɔvɛlaale tɔ ga ɣaa-wo folo ɔɔ ani e wõini e kɛ?
-
Jehova Na Seeleitiɛ taniga ta gaalɛ-ba ɣɛ ga te faa-nɛɛ ɣɛ te leaitiɛ vɛ. Ani lopaa ta yiɛ faa-nɛɛ zɛɓɛi ya kɛ te vɛ?
NUMAA TANIGA TA ƔƐ TEA: “Velei ɣaa-wogi nii maʋai lɔɔ-zeini la ɛ lɛ ga faa ɓi. Tɔ nɔ ga wo kuuzu nɛɛ wulo kii-ma wa ya numaitiɛ e vɛɛ ya ziɛ-puluitiɛ va.”
-
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Jehova wõini de kuuzu nɛɛ wulo kii-ma da da numaitiɛ e vɛɛ da ziɛ-puluitiɛ va. Kɛ ɛ lɛ wõini dɔɔ li ɣaa-wogi niitiɛ zu lɛ ga zii-ma ʋaa.
Ma-ɓigitiɛ
-
Gaa-zaɣa-kɛɛ zɛɓɛi manɛɛ de ɣi-gaa-ziɛ ma ga de kwɛ̃ɛ ani ɣaa-wogi nii ɣa ga Jehova yii-ma ʋaa?
-
Da leve ɣɛ le de ɓɔ da numaitiɛ ɓɔga da ziɛ-puluitiɛ va ga te kwɛ̃ɛ nii e kɛɛ dɛ lɛ lia ɣaa-wogi taniga zu?
-
E levegɛ ɣɛ le e kwɛ̃ɛ ga Jehova wõini de kuuzu nɛɛ wulo?
WƐLƐ FAA LAMAA VA
Wɛlɛ ɣaa-wogi taniga va Kolai Maa Veaitiɛ tɛ lɛ yee viliga su.
“Zɛɓɛi e Kɛɛ Jehova Na Seeleitiɛ Tɛ Lɛ Yee Viliga Ɣaa-Wogi Taniga Zu?” (Kɔlɔi nii ɣa fãga wɔlɔi ma)
Wɛlɛ faa naagɔ va e kɛɛ ge laila ga nu ɣaa ʋolo ɣaa-wo fai lɛ ga Jehova yii-ma ʋaa.
Wɛlɛ velei nu niinɛi niitiɛ wõila te ya Jehova ʋaa ma ta zii-mai ɣɛɛ la ani towa vaana ɣaa-wogi niitiɛ wɔ tɛlɛ ga Gala yii-ma ʋaa.
Kolai Maa Veaitiɛ taniga te deʋea ga tɛ lɛ Kisi-masi wuloa. Ta ɣi-gaa-ziɛ ɣɛ le e vile nii va te deʋea?
“Te Ŋɛnii Ta Vɛtɛga Fize Wogɛi” (The Watchtower, December 1, 2012)
a Wɛlɛ Kɔlɔi Nii Laa Wulozu 5 va ga e faa maa woli e vile nii va ya kɛ ani ya vaana gaalɛ-bai taniga wɔ ɛ lɛ ga Jehova yii-ma ʋaa.