Ziizɛ dɛɛni ga pulu veaitiɛ tɛ lɛ ‘zui zu ʋai va.’ (Jɔ̃ 15:​19) Na zu-wulo-zu ɣa ga maa lɛnɛɛni tɔ yee vili kɔɔ wɔɔ ʋaazu ɔɔ ʋoo zaɣa ʋaazu. Gaama zu, tanisu na ɣa ɓaa de ya ga de wulosu leilaa ani ya vilena zui zu ʋai va. Nu taniga ta ɣɛ ŋɛɛzu de ma ani da nii ɣɛɛna. Da leve ɣɛ le de dɛ ga de ɣatagɛ Jehova va na ɣa ɣɛɛna dɛ lɛ yee vilisu zui zu ʋai zu?

1. Zɛɓɛi e ga Kolai Maa Vea ɓɔɔɓɔɔgitiɛ ta ɣi-gaa-ziɛi e vile nu ɓuse wɔmɛtiitiɛ va?

Wũfe-ma ɣa Kolai Maa Veaitiɛ ya nu ɓuse wɔmɛtiitiɛ ʋaa ma. Nii Ziizɛ boni na ɣa gá kɛ “nii é ga Siiza na dɔ a nà ʋe Siiza ya.” Na zu-wulo-zu ɣa ga, ga ziɛ ga tɔgi niitiɛ gɔmɛtii ɣa da. Ta ɣa ga, ya vaana gɔmɛti naʋolo wulo ʋaa wɔ. (Maki 12:​17) Gala Kɔlɔi dɛɛvɛ ga nu ɓuse wɔmɛtiitiɛ ta masada ɣɛɛzu ɓɔvɛlaale Jehova ɓega te va ga te kɛ. (Loomɛitiɛ 13:1) Na zu-wulo-zu ɣa ga, nu ɓuse wɔmɛtiitiɛ ta ɣaa-ɓai wɛ̃ɛ ka ma. Gala Na Masadai ɣa ge ɣi-togɛi ba ga e faa ɓaagitiɛ ɓɔgapɛ kpea zui zu.

2. Da dɛ ɣɛ le ga dɛ lɛ zui zu ʋai va?

E ɣɛ velei Ziizɛ kɛɛni la, gɛ lɛ yee viliga ʋoo zaɣa ʋaazu. Siɛgi ma numaitiɛ te wɛlɛni la Ziizɛ va yiɛ faa maa wɔlɔ-wɔlɔga ɣɛ, te ɣɛni wõini te kɛ ga masa. Kɛ lɛ ʋaani bu. (Jɔ̃ 6:​15) Zɛɓɛi e kɛɛ lɛ ʋaani bu? Bɔvɛlaale Ziizɛ boni ga, “nà Masadai lɛ ga zui nii zu Masada.” (Jɔ̃ 18:​36) Gaitiɛ ge ga Ziizɛ wulu veaitiɛ ga dɛ pele lamaa zu ga ge yee lɛ zui zu ʋai zu. Ma wo-kɔ̃ɔ-mai ta ɣa ga, gɛ lɛ yee viliga kɔɔ wɔɔ ʋaazu. (Micah 4:3 lodo.) Wũfe-ma ɣa ge ya niitiɛ ʋaa ma gɔmɛtii ɣa kpɛtɛ ga é lo zui ʋaa ma ta ɣa ga ɓedalagi, kɛ gɛ lɛ te ʋelia. (1 Jɔ̃ 5:​21) Gɛ lɛ loga numaa wulu ani te wõini te ɣɛ ga gɔmɛti wũ-tuo vea. Ani wɔnɔ na ɣa te wõini te kɛ gɛ lɛ zilia ga tiɛ. Fai niitiɛ ta dɛɛzu ga Gala Na Masadai nɔ ɣa ge pulu.

 FAA LAMAA MAA WOLI

3. Kolai Maa Vea ɓɔɔɓɔɔgitiɛ tɛ lɛ yee viliga zui zu ʋai zu

Ziizɛ ɓɔga pulu veaitiɛ te po-kɔ̃ɔ-ma zeivɛ de ʋaa ma. A Loomɛitiɛ 13:​1, 5-7 ɓɔga 1 Pite 2:​13, 14 lodo. Na ɣa ɣɛɛna wo ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

• Zɛɓɛi e kɛɛ manɛɛ de wũfe gɔmɛti wũ-tuo veaitiɛ ma?

• Pelei taniga ta ga zɛɓɛ da dɛɛ la ga wũfe-ma ɣa de ya te ʋaa ma?

Ani kɔɔ ɣa vaana, zui taniga ta ɓɔɔ wulo ga te yee lɛ su. Kɛ tanisu ta ɣa ɓɔsu numaitiɛ va ta ɣa wɔɔzu ga ɣii. Ta ɣɛna tea nui nii yee lɛ zui zu ʋai zu su-wulo-zu ɣa ga zɛɓɛ? A Jɔ̃ 17:​16 lodo. Na ɣa ɣɛɛna wo ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

• Ta ɣɛna tea nui nii yee lɛ zui zu ʋai zu su-wulo-zu ɣa ga zɛɓɛ?

Zɛɓɛi manɛɛ de kɛ ani gɔmɛti wũ-tuo nui ta ɣa bona de ma ga de fai ta ɣɛ ɛ lɛ ga Jehova yii-ma? A Te Ɣɛɛ Ʋaitiɛ 5:​28, 29 lodo. Na ɣa ɣɛɛna wo ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

• Ani gɔmɛti wũ-tuoitiɛ ta bona de ma ga de fai ta ɣɛ kɛ ɛ lɛ pele ma Gala Kɔlɔi zu, zɛɓɛi manɛɛ de kɛ?

• E faa ta nɛpɛ kwɛ̃ni ga gɔmɛti wũ-tuoitiɛ ta bo ga de kɛ tɔwɔ Gala Kɔlɔi boga ga de mɛlɛ kɛ?

 4. Dɛ ga e yee lɛ zui zu ʋai zu ya ɣi-gaa-ziɛi ɓɔga e luɓo-velei zu

A 1 Jɔ̃ 5:​21 lodo. Na ɣa ɣɛɛna wo ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote.

• Ʋiliogi nii zu, zɛɓɛi e kɛɛni de ɣaa yɔwũi lɛ vilini gɔmɛti ɓulugi nii ta va ɔ nɔ ɣɛ ga e vɛɛ baitiɛ va te ɓedalagi laa-maa-lɛ?

• E ɣisu nii e kɛɛni e ɣɛni ga faa vagɔ?

Faa zɛɓɛi wɔnɔ ya kɛ na ɓaa ga de dɛ ga dɛ lɛ zui zu ʋai va? ƲILIOGI nii lɛ ga. Yá wolona, wo gaa-zaɣa-kɛɛ nii ɣaa wote

• Ani zuu felegɔ ɣa ɣɛna bɔɔ lowazu da leve ɣɛ le de dɛ ga de yee lɛ zui zu ʋai zu?

• Ani gɔmɛti wũ-tuo nui ta ɣa fai ta leʋena ga da wulo su-nu-ma ɔɔ dɛ lɛ wuloa su-nu-ma, da leve ɣɛ le de dɛ ga dɛ lɛ zui zu ʋai va?

• Ki-daa-wodoi da maa zɔlɔwo e vɛɛ da ziɛ-puluitiɛ va ta faa vɛɛ ɣɛ le da ɣi-gaa-ziɛi va ani ya vaana zui zu ʋai wɔ?

 NII SA È MAA WOLIA

Kolai Maa Veaitiɛ ta ɣaa-ɓaa ɓɔɔ ga te mɛlɛ yee vili zui zu ʋai zu ta ɣi-gaa-ziɛi zu, te yɛpɛ velei zu, e vɛɛ te luɓo-velei va.

Ma-ɓigitiɛ

• Zɛɓɛi e kɛɛ manɛɛ de wũfe gɔmɛti wũ-tuo veaitiɛ ma?

• Zɛɓɛi e kɛɛ maa lɛnɛɛni dɔ yee vili ʋoo zaɣa ʋaazu?

• Zɛɓɛi ya kɛ tanisu na ɓaa de yee ma ga de dɛ ga dɛ lɛ zui maʋaa va?