KALABO 47

E Ɣavele Ɓɛtɛvɛ Sa Ga E Bataize Maa Zɔlɔwo?

TƐ GÁ

E faa lamaa maa wolia sa e vile Jehova va Gala Kɔlɔ maa woliai nii zu. Ɣeeta e faa taniga maa ʋeli boga ya ŋeteai zu ga e ziɛ ga nii e maa wolia. Kɛ tanisu faa taniga ta dɛ na te kɛɛzu ɛ lɛ dɛ ɓɔɔ ʋeeni Jehova ya ɔ bataize maa zɔlɔwo. Kalabogi nii ɣa vaazu yɛpɛzu e vile faa taniga va ya kɛ na ɓaa nu yee ma ga e bataize maa zɔlɔwo e vɛɛ velei va ya leve la e te yee maazu ɣale.

1. Zɛɓɛi manɛɛ e kwɛ̃ɛ ɔ vɛɛ bataize maa zɔlɔ wosu?

Ga e bataize maa zɔlɔwo manɛɛ e “ɣele-ɣele gaamai maʋaa zu.” (1 Temete 2:4) Na zu-wulo-zu lɛ ga kɛni ya gaa-zaɣa-kɛɛtiɛ ɓɔgapɛ gaa wotegi wɛ̃ɛ Gala Kɔlɔi zu ɔ vɛɛ bataize maa zɔlɔ wosu. Taitiɛ ɓalaa te bataize maa zɔlɔ woga kwena tamaa wuuzu ta dɛ faa maa wolizu Gala Kɔlɔi zu. (Kolasaitiɛ 1:9, 10) Kɛ, kɛni ɓɔɔ e faa ɓigitiɛ maa woli te Gala Kɔlɔi zu. Kuuwu wũ-tuo veaitiɛ ta vaazu ɓɔsu e va e kwɛ̃ɛ ani e ɣavele ɓɛtɛvɛ sa.

2. Zɛɓɛi manɛɛ e kɛ ɔ vɛɛ bataize maa zɔlɔ wosu?

Ɔ vɛɛ bataizei maa zɔlɔ wosu kɛni ya “wulu ɣaa ʋe ya ʋaa yowũitiɛ va . . . e lite wɔnɔ wulu.” (Te Ɣɛɛ Ʋaitiɛ 3:19 lodo.) Nii zu-wulo-zu ɣa ga kɛni ya dɛ ga faa yowũitiɛ ɓɔgapɛ e vɛɛ kɛɛzu e yii lɛ laani maʋaa ma na ɣa ɣɛɛna e Jehova ɣaa-zaɣa-kɛɛ ga e e zu-ʋaa-yɛ. Ya ɓe tuɓo-velei yowũitiɛ va e da ɣisu ga e Gala yii-mai ɣɛ ya ŋeteai zu. Na ɣa wulona ba ya ɣɛ sa liizu gaalɛ-baitiɛ ɓɔgapɛ su yiɛ vɛɛ kuuwui va wiɛ Gala goi wo.

3. Zɛɓɛi e kɛɛ ɛ lɛ ga ɔ luo ga e bataize maa zɔlɔwo?

Numaa taniga ta ɣɛ luozu ga tɛ lɛ vaazu zoosu tɔ Jehova yii-mai ɣɛ. Gaama zu, tanisu da faa yowũ ɣɛ. Gala Kɔlɔi dɛɛvɛ ga Gala feli vea taniga te faa yowũ ɣɛɛni. Jehova kwɛ̃ni ga feli veaitiɛ ta ga faa yowũ ɣɛɛ vea. (Psalms 103:13, 14 lodo.) Kɛ kuuzu ɣa nɛɛ ani ya ɣaa ɓaana ga e zii-mai ɣɛ! Tɔ vaazu ɓɔsu e va. Nii ʋɔlɔ e ba, Jehova boga ga faa “nɛpɛ gɛ lɛ zooga ɔ́ de wulo wõilai nii yee wu [e] boga ga diɛ.”—Loomɛitiɛ 8:38, 39 lodo.

FAA LAMAA MAA WOLI

Wɛlɛ velei va ya leve la ga e faa nɛpɛ yee maazu ɣale e kɛɛzu ɛ lɛ dɛ bataize maa zɔlɔwoni ani ya faa lamaa maa wolina e vile Jehova va, e yee zei na kpɔbai wu.

4. Faa lamaa maa woli e vile Jehova va

Zɛɓɛi manɛɛ e kwɛ̃ɛ e vile Jehova va ɔ vɛɛ bataizei maa zɔlɔ wosu? Manɛɛ e Jehova wɛ̃ɛ ɓɔɔ ga pagɔ wõila ɣɛ e ya faa ma yiɛ ɣaa-ɓaa ga e zii-mai ɣɛ. ƲILIOGI nii lɛ ga, e wɛlɛ velei va taitiɛ te Gala Kɔlɔi maa wolizu zui wɔlɔ-kɔlɔ ma te ɣaa ɓaani la ga te nii ɣɛ. Yá wolona, wo gaa-zaɣa-kɛɛ nii ɣaa wote.

ƲILIOGI: Niitiɛ Ya Kɛ Ga E Bataizei Maa Zɔlɔwo (3:56)

Ʋiliogi nii zu, zɛɓɛi e ɓɔni numaitiɛ va ga te ɣavele ɓɛtɛ te bataize maa zɔlɔwo?

A Loomɛitiɛ 12:2 lodo, wo gaa-zaɣa-kɛɛ niitiɛ ɣaa wote:

E ɣi-daa-viligɛ e vile niitiɛ va e maa wolizu Gala Kɔlɔi zu ɔɔ ga ani Jehova Na Seeleitiɛ ta gaamai lɛɛzu?
Ani vele ɣana e ɣi-gaa-ziɛzu la zɛɓɛi manɛɛ e kɛ?

5. Niitiɛ yee maazu ɣale te kɛɛzu ɛ lɛ dɛ bataize maa zɔlɔwoni

Da ɓɔɔ ʋeena Jehova ya de bataize maa zɔlɔwo faa ɓaa taniga ta la de ma. Ga e wɛlɛ ma wo-kɔ̃ɔ-mai ta va, ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Wõilai E De Ya Jehova Ʋaa Ma Towa Ɓɔ De Va De Faa Nɛpɛ Zee Maazu Ɣale (5:22)

Ʋiliogi nii zu, zɛɓɛi de ɣaa yɔwɔ̃i nii zee maazu ɣaleni ga e Jehova ʋeli?
Wõilai e ɣɛni zeea Jehova ʋaa ma e ɓɔni ba ɣɛ le ga e fai niitiɛ yee maazu ɣale?

A Proverbs 29:25 ɓɔga 2 Temete 1:7 lodo, wo gaa-zaɣa-kɛɛ nii ɣaa wote:

Zɛɓɛi ya ɓɔ de va ga de zoo de faa ɓaa nɛpɛ yee maazu ɣale?

6. Yee la Jehova na kpɔbai ma

Jehova ɣa ɓɔ e va ga e zii-mai ɣɛ. ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Jehova Ɣa Vaazu Ɓɔsu E Va (2:50)

Ʋiliogi nii zu, zɛɓɛi e kɛɛ na ɓai e ɣɛni ga Gala Kɔlɔ maa woli nui nii bataize maa zɔlɔwo?
Zɛɓɛi e maa wolini ga e ɓɔni ba e na zee-la-mai zu-ɓaa e vile Jehova va?

A Isaiah 41:10, 13 lodo, wo gaa-zaɣa-kɛɛ nii ɣaa wote:

Zɛɓɛi e kɛɛ manɛɛ e laala ga Jehova ɣa zoo e ɓɔ e va e zii-mai ɣɛ?

7. Dɛ ga e wuuzu nɛɛvɛ wõilai nii ʋaa ma Jehova dɛɛ ga yiɛ

Ɣi-gaa-ziɛ e vile wõilai nii ma Jehova dɛɛ ga yiɛ. Ya na ɣɛɛna towa ɓɔ e va e dɛ ga e wuuzu nɛɛvɛ nii ma e kɛɛ de ʋaa ma. Ya wõi wɔnɔ ga e zii-mai ɣɛ wɔlɔ-wɔlɔ ta wɔlɔ-wɔlɔ. A Psalm 40:5 lodo, wo gaa-zaɣa-kɛɛ niitiɛ ɣaa wote:

Faa-nɛɛ zɛɓɛi Jehova kɛɛ e vɛ ga e e wuuzu nɛɛ ɓɔɔ ga ʋike?

Wõila ɓɔɔɓɔɔ ge ɣɛni Gala daa woo wo nui Jɛlɛmaiya ya Jehova ʋaa ma e vɛɛ daa woi va. Kuuzu nɛɛ ɓɔɔ e ɣɛni ga ʋike ga e ɣɛ ga Jehova ʋeli veaitiɛ te ta. E ɣɛni tea: “E laa woi kɛɛni kuuzu nɛɛni na ɣa ɣɛɛna e zii-laani. Ɓɔvɛlaale ya laa-zeigi ɣa ba, Jehova.” (Jeremiah 15:16) A gaa-zaɣa-kɛɛ niitiɛ ɣaa wote: