Kamita lubonanga teñi kuli litaba zelulumela zaswalisana ni zeibulela Bibele; kacwalo, lucincize litumelo zaluna hane luutwisisize hande Bibele. a

 Neluezize licinceho zecwalo ka kulumelelana ni sikuka sa mwa Bibele sesi kwa Liproverbia 4:18, sesili: “Nzila ya babalukile iswana sina liseli lelibenya la kakusasana lelinze liekezeha kufitela iba musihali omutuna.” Sina feela mokubelanga kakusasana lizazi halipazula, halubonangi hande lika zeñwi. Kono nako hainze iya, lukala kubona hande lika hanyinyani-hanyinyani. Mulimu ni yena ulutusanga kuutwisisa niti ya mwa Bibele hanyinyani-hanyinyani, ka nako yatomile. (1 Pitrosi 1:10-12) Mi sina mone kupolofitezwi mwa Bibele, mwa “nako ya mafelelezo” ye, Mulimu ulupatululezi litaba zeñata luli.​—Daniele 12:4.

 Kacwalo, hakuba ni licinceho ka za moluutwisiseza niti ya mwa Bibele, taba yeo haiswaneli kulukomokisa kamba kulusitatalisa. Balapeli ba Mulimu ba kwamulaho ni bona nebasika utwisisa litaba zeñwi mi nebatokwa kucinca mubonelo wabona.

•   Mushe naanahanile kuli naakona kulamulela sicaba sa Isilaele lilimo ze 40 pili nako yanaatomile Mulimu isika fita kale.​—Likezo 7:23-25, 30, 35.

•   Baapositola nebasika utwisisa bupolofita bone bubulela za lifu ni zuho ya Mesia.​—Isaya 53:8-12; Mateu 16:21-23.

•   Bakreste ba kwa makalelo babañwi nebanani mibonelo yefosahalile ka za fone likatela “lizazi la Jehova.”​—2 Matesalonika 2:1, 2.

 Kono hasamulaho, Mulimu naabatusize kuutwisisa hande taba yeo, mi Jehova ni luna uka lutusa kuutwisisa litaba za mwa Linzwi lahae.​—Jakobo 1:5.