Kana Nikatokwa Kuba Yomuñwi wa Lipaki za Jehova Haiba Niituta Bibele ni Bona?
Batili, hamusika tameha kueza cwalo. Batu babañata-ñata baikolanga kuituta Bibele kusina kuba yomuñwi wa Lipaki za Jehova. a Mulelo wa tukiso yeo ki kutusa batu kuziba zeiluta Bibele. Cwale hase muzibile zeiluta Bibele, ki ku mina kueza katulo kulikana ni zemuitutile. Lwaziba kuli mañi ni mañi unani tukelo ya kuiketela bulapeli bwakaswalisana ni bona.—Joshua 24:15.
Kana nakona kuitusisanga Bibele yaka haluituta?
Eni. Nihaike kuli lutabela kuitusisa Bibele ya Toloko ya Lifasi Lelinca yeñozwi mwa puo ya miteñi ye, mi lwakona kumifa Bibele yeo kusina kulifa sesiñwi haiba mwatabela, mulukuluhile kuitusisa Bibele yamina, haiba mubata kueza cwalo. Mwakona kuituta lushango lwa mwa Bibele lolufa sepo ni lolupilisa ibato ba mwa toloko ifi kamba ifi ya Bibele.
Ki kabakalañi hamuitutanga Bibele ni batu babasi mwa bulapeli bwamina?
-
Libaka la butokwa hahulu kikuli lwalata Jehova Mulimu, yena yabata kuli Bakreste balute babañwi litaba zebaitutile. (Mateu 22:37, 38; 28:19, 20) Luikutwa kuli hakuna tohonolo yetuna yefita ‘kusebeza hamoho ni Mulimu’ ka kuluta batu zelibulela Linzwi lahae.—1 Makorinte 3:6-9.
-
Libaka leliñwi kikuli lwalata batu babañwi. (Mateu 22:39) Lubanga ni tabo yetuna halunze lutaluseza babañwi litaba zende zeluitutile.—Likezo 20:35.
a Ki ze litaba zebonisa mouzamaela musebezi waluna wa kuluta batu Bibele: Mwa silimo sa 2023 luzamaisize lituto za Bibele ze 7,281,212 kweli ni kweli, mi buñata bwa lituto zeo nelu lizamaisize ka kuituta ni batu babashutana-shutana ka nako yeswana. Kono ki batu ba 269,517 feela bane bakolobelizwe ni kuba Lipaki za Jehova silimo seo.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Ki Lika Mañi Zebalumela Lipaki za Jehova?
Mubale ka bukuswani litaba ze 15 zebonisa litumelo zaluna.
KA ZA LUNA
Tuto ya Bibele I Eziwanga Cwañi?
Mwa lifasi kaufela, Lipaki za Jehova bazibahala ka musebezi wabona wa kuitutanga Bibele ni batu kusina tifo. Mubone moiezezwanga tuto ya Bibele.
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
