Batili. Lipaki za Jehova habaangi kuli mipende imaswe. Lulumela kuli kupendiwa ki keto ya ka butu yatokwa kuikezeza Mukreste ni Mukreste. Lipaki za Jehova babañata baiketezi kupendiwa.

 Luezanga molukonela kaufela kuli lufumane likalafo zende mi lwaitebuha zwelopili yetuna yeezizwe ka za likalafo, ili yetusa hahulu batu kusayambula matuku amatuna. Lwaitebuha musebezi-tuna obasweli kueza licaziba bababona za buiketo bwa batu, sihulu hakubile ni kozi.

 Lipaki za Jehova bamamelanga milao yebafa licaziba bababona za buiketo bwa batu. Ka mutala, kuzwa feela fobukalela butuku bobuyambukela bwa COVID-19, Lipaki za Jehova bazwezipili kufa likupuliso fa webusaiti ye mwa lipuo zeñata-ñata, ili kususueza batu kulatelela ketelelo yefiwa ki maluko a muuso abona za buiketo bwa batu. Taba yeo ikopanyeleza kumamela milao yehanisa batu kuina hahulu bukaufi ni babañwi, kusaba ni mikopano ya batu babañata, kuba lunosi mwa sibaka saluna haiba lukula butuku bobuyambukela, kutapa kwa mazoho, kutina tusila tokukwahela lingo ni mulomo ni kueza lika zeñwi.—Maroma 13:1, 2.

 Kuzwa feela kwamulaho, lihatiso za Lipaki za Jehova likuta-kutezi kubulela litaba zelatelela:

•   Litaba zeama likalafo ki keto ya ka butu.—Magalata 6:5.

   “[Mwa magazini] ye hakuhatiswangi litaba zebonisa mulyani kamba kalafo yaswanela kulatelela mutu kamba kuhana, mi magazini ye haifangi likelezo ka za likalafo. Mulelo wayona ki kutalusa litaba ni kutusa mubali kuikezeza likatulo.”—Muzuhe! ya Sikuwa ya February 8, 1987.

   “Ki ku mina kuiketela haiba mina ni bana bamina mukapendiwa kamba kutokwa.”—Muzuhe! ya Sikuwa ya August 22, 1965.

•   Luyanga kwa sipatela halukulile bakeñisa kuli luunga bupilo kuba bwa butokwa.—Likezo 17:28.

   “Lipaki za Jehova habakula bayo bonananga ni baalafi babali licaziba kuli babatuse. Balata kupila mi baezanga mobakonela kaufela kubukeleza bupilo bwabona, ibile feela muhato obaanga walumelelana ni likuka za mwa Bibele.”—Tawala ya Mulibeleli ya Sikuwa ya July 1, 1975.

   “Lipaki za Jehova habahanangi kunwa mulyani kamba kuamuhela likalafo. Babata kuba ni buikangulo bobunde kwa mubili ni kupila nako yetelele. Mane, sina feela Luka wa mwa linako za baapositola, Lipaki za Jehova babañwi ki baalafi. . . . Lipaki za Jehova baitebuha hahulu musebezi-tuna obaeza baalafi. Hape baitebuha baalafi kakuli babatusanga habakula.”—Tawala ya Mulibeleli ya Sikuwa ya February 1, 2011.