Batili, Lipaki za Jehova haki sikwata sa batu babaluta tuto yekeluhile. Kono lu Bakreste babaeza molukonela kaufela kulikanyisa mutala walutomezi Jesu Kreste ni kusebelisa lituto zahae mwa bupilo bwaluna.

 Batu babañata bautwisisa pulelo ya kuli “tuto yekeluhile” ka linzila zeshutana-shutana. Niteñi, halunyakisiseñi litaba zepeli zebalumela batu babañata ka za pulelo yeo ni libaka pulelo yeo haisa talusi luna.

•   Batu babañwi baanga kuli tuto yekeluhile iama kwa bulapeli bobunca kamba bobushutana ni bwa babañwi. Lipaki za Jehova habasika kalisa bulapeli bobunca. Mane, lulikanyisa mone balapelela Bakreste ba mwa linako za baapositola, ili bao mutala wabona ni lituto zabona liñozwi mwa Bibele. (2 Timotea 3:16, 17) Lulumela kuli Mañolo Akenile ki ona aswanela kutusa batu kuziba haiba zebaeza mwa bulapeli bwabona zaswanela kamba kutokwa.

•   Babañwi baanga kuli tuto yekeluhile iama kwa bulapeli bwa batu babasabisa, ili babanani mutu yabaetelela. Lipaki za Jehova habaangi mutu ufi kamba ufi kuba mueteleli wabona. Kono, lulatelela mutala wanaatomezi balatiwa bahae Jesu, hanaabulelezi kuli: “Mueteleli wamina ki alimuñwi, yena Kreste.”​—Mateu 23:10.

 Lipaki za Jehova haki sikwata sa batu babasabisa, kono ki balapeli babaeza lika zetusa bona ni batu babapila ni bona mwa silalanda. Ka mutala, musebezi waluna wa kukutaza utusize batu babañata kutuhela kueza lika zenekona kubatahiseza butata, inge cwalo kuitusisa maswe milyani yekola ni kunwa maswe bucwala. Hape, mwa lifasi kaufela, lulutanga batu kubala ni kuñola, ili nto yesetusize batu babañata-ñata kueza cwalo. Mi lutusanga batu babawezwi ki likozi. Luezanga molukonela kaufela kutusa batu babañwi, sina feela Jesu mwanaalaelezi balateleli bahae kuli baeze cwalo.​—Mateu 5:13-16.