Lipaki za Jehova bakuteka milonga ni lisupo zayona za naha kaufela. Lwaziba kuli batu babañwi baitamanga kuli bakasepahala kwa naha yabona, kucaela ndembela silutu, kamba kuopela pina ya naha.

 Nihakulicwalo, Lipaki za Jehova baikatulelanga kusaeza lika zeo kakuli balumela kuli zalwanisana ni likuka za mwa Bibele. Luitebuhanga hahulu batu habakuteka zelulumela sina feela ni luna halukutekanga likatulo zebaezize zeshutana ni zaluna.

Ze mwa taba ye:

•  Ki likuka lifi za mwa Bibele zeamiwa?

•  Kucwañi haiba kunani mulao otomilwe wa kuli mutu kaufela utokwa kueza lika zeo?

•  Kana Lipaki za Jehova balika kubonisa kobawela mwa litaba za lipolitiki?

 Litaba zepeli zeiluta Bibele ze ki zona zeelutusize kueza katulo ya kusaikenya mwa mikiti ya naha:

•   Luswanela feela kulapela Mulimu. Bibele ibulela kuli: “Ki Jehova Mulimu wahao yeulukela kulapela, mi ki yena feela anosi yeulukela kufa sebelezo yekenile.” (Luka 4:8) Buitamo bwa kuli mutu ukasepahala kwa naha yahae kamba lipina za naha hañata libanga ni manzwi abonisa kuli mutu usepisa kuli ukalata hahulu naha yahae kufita nto ifi kamba ifi. Kacwalo, Lipaki za Jehova baikutwa kuli kueza cwalo hakusika luka.

   Lipaki za Jehova hape baikutwa kuli kucaela ndembela silutu kuswana feela inge kuilapela kamba kulapela milimu ya maswaniso, ili nto yehaniswa mwa Bibele. (1 Makorinte 10:14) Licaziba babañwi ba litaba zakale balumela kuli lindembela za naha liswana sina lisupo zeyemela bulapeli. Caziba yomuñwi wa litaba zakale yabizwa Carlton J. H. Hayes a naañozi kuli: “Kulata hahulu naha ya mutu kuswana sina bulapeli, mi ndembela ki sona sisupo sesiingiwa kuba sa butokwa hahulu ni sesilapelwa mwa bulapeli bo.” Muñoli yomuñwi yabizwa Daniel P. Mannix ubulela cwana ka za Bakreste ba kwa makalelo, uli: “Bakreste nebahanile kufa . . . sitabelo ku mutu yanaangiwa kuba mubabaleli wa moya wa mubusi [wa Roma], ili nto yeswana ni kuhana kucaela ndembela silutu kacenu.” b

  Nihaike kuli Lipaki za Jehova habacaelingi ndembela silutu, haba isinyangi, kuicisa kamba kusa ikuteka ni kusakuteka sisupo kaufela sesiyemela naha.

•   Mulimu uunga kuli batu kaufela ki ba butokwa ku yena. (Likezo 10:34, 35) Bibele ibulela kuli Mulimu “ka mutu alimuñwi uezize macaba kamukana a batu.” (Likezo 17:26) Kacwalo, Lipaki za Jehova baikutwa kuli kufosahalile kuunga sicaba kamba naha yeñwi kuba ya butokwa hahulu kufita zeñwi. Lwakuteka batu kaufela kusina taba ni kobasimuluha kamba kobapila.—1 Pitrosi 2:17.

 Lipaki za Jehova habalwanisi muuso. Lulumela kuli milonga ki kalulo ya “tukiso ya Mulimu” yalumelelize kuli ibeteñi. (Maroma 13:1-7) Hape lulumela kuli Bakreste baswanela kukuteka mibuso ya lifasi.—Luka 20:25.

 Kono kucwañi haiba milao ya mibuso ya lifasi ilwanisana ni likuka za Mulimu? Mwa miinelo yemiñwi, kwakonahala kuikupela ku ba muuso kuli baeze licinceho kwa milao yeo. c Haiba kueza cwalo hakukonahali, Lipaki za Jehova baikatulelanga “kuutwa Mulimu sina mubusi kufita batu,” mi baezanga cwalo ka likute.—Likezo 5:29.

 Batili. Lipaki za Jehova habaikenyangi mwa litaba zeama mupilelo wa batu ni za lipolitiki. Kusakonka kuli lukasepahala kwa naha yaluna, kusacaela ndembela silutu, kamba kusaopela pina ya naha, hakutalusi kuli lubata kutahisa cinceho mwa litaba za naha. Kono lumamela milao ya mwa Bibele yeama lika zeo.