Linawenga za Lipaki za Jehova hañata libanga zesatuli mi lieziwanga ka nzila yeswanela. Kubanga ni ngambolo yekuswani ili yetomile fa Bibele. Hamulaho wa ngambolo, kukona kuba ni mukiti, mi kwateñi kukona kulukiswa lico. a Kwa makalelo a bukombwa bwahae bwa fa lifasi, Jesu naafumanehile kwa mukiti oswana sina wo mwa muleneñi wa Kana.—Joani 2:1-11.

•  Ki lika mañi zeezahalanga ka nako ya mukiti wa linyalo?

•  Linawenga za Lipaki za Jehova liezezwanga kai?

•  Ki bo mañi babaswanela kufumaneha?

•  Babamemilwe kwa mukiti baswanela kuapala cwañi?

•  Kana babamemilwe baswanela kushimba limpo?

•  Kana kukananulelwa likomoki mwahalimu hakunwiwa veine?

•  Kana batu babanyalana bakahasiwa laisi ni kuposiwa tupepa?

•  Kana kwa mukiti kukaba ni lico ni lino?

•  Kana kukaliziwa lipina ni kubiniwa?

•  Kana Lipaki za Jehova baezanga mukiti wa kuhupula lizazi la sinawenga sabona?

 Nto ya butokwa hahulu yeezahalanga kwateñi ki ngambolo ya linyalo yefiwanga ka mizuzu yebato eza 30 ki yomuñwi wa Lipaki za Jehova. Ngambolo yende yeo, ikoñomekanga mo Bibele ikona kutuseza batu babanyalana bao kuzwelapili kulatana, kuba ni tabo mwa linyalo labona, ni kutusa kuli linyalo labona liine nako yetelele.—Maefese 5:33.

 Mwa linaha zeñata, muuso walumelezanga Lipaki za Jehova babañwi kuezisa buitamo bwa linyalo. Mwa muinelo ocwalo, ngambolo hainze ifita kwa mafelelezo, batu babanyalana bakaeza buitamo bwa linyalo. Mi bakona kutinisana masale kwa minwana ya kwa mazoho. Hamulaho wa fo, Paki ya Jehova yalumelelizwe ki muuso kuzamaisa za manyalo ukazibahaza batu bao kuli banyalani.

 Mwa linaha zeñwi, muuso utokwanga kuli batu bayo nyalanela kwa ofisi ya muuso. Bo mutu ni musali bababata kunyalana baezanga cwalo nakonyana pili ngambolo ya linyalo isika fiwa kale. Haiba muuna ni musali babanyalana nebasika eza buitamo kwa ofisi ya muuso, bakona kueza cwalo ngambolo hainze ifita kwa mafelelezo. Haiba nese baezize kale buitamo, bakona kukutela kueza cwalo, mi bakabulela ka nzila yebonisa kuli baezize kale buitamo. Kwa mafelelezo a ngambolo, kukafiwa tapelo ya kukupa kuli Mulimu afuyaule batu babasazo nyalana bao.

 Lipaki za Jehova babañata batabela kuezeza linawenga zabona kwa Ndu ya Mubuso haiba yafumaneha mwa sibaka sebapila ku sona. b Haiba batu babanyalana bakaeza mukiti hasamulaho, bakona kuketa sibaka sisili sebatabela.

 Haiba ngambolo ya sinawenga ikafelwa kwa Ndu ya Mubuso, batu kaufela balukuluhile kufumaneha kwateñi, ibe kuli ki Lipaki za Jehova kamba kutokwa. Mi haiba kukaba ni mukiti hasamulaho, batu babanyalana bakona kuketa babaka memiwa kwa mukiti wo.

 Nihaike kuli hakuna mulao otomilwe wa mwakuapalela kwa ngambolo ya sinawenga yekafelwa kwa Ndu ya Mubuso, Lipaki za Jehova balatelelanga sikuka sa mwa Bibele sa kuapala hande ka likute. Neikaba hande haiba batu kaufela baapala ka nzila yeo habafumaneha kwa ngambolo ya sinawenga. (1 Timotea 2:9) Mi baswanela kueza cwalo niha baya kwa mukiti wa sinawenga haiba ukaba teñi hasamulaho wa ngambolo ya linyalo.

 Bibele ilususueza kuba ni bufani. (Samu 37:21) Lipaki za Jehova batabelanga kufa ni kufiwa limpo za sinawenga. (Luka 6:38) Nihakulicwalo, Lipaki habakupangi limpo kamba kuzibahaza fa nyangela mabizo a babafile limpo. (Mateu 6:3, 4; 2 Makorinte 9:7; 1 Pitrosi 3:8) Kwandaa kuli taba yeo haki ya ka mañolo, kueza cwalo kukona kutahisa kuli batu babatile kwa mukiti baikutwe maswabi.

 Batili. Lipaki za Jehova habananulelangi likomoki mwahalimu hakunwiwa veine, kakuli sizo sa kunanulela likomoki mwahalimu sisimuluha mwa bulapeli bwa buhata. c Lipaki babonisanga ka linzila zeñwi kuli babata kuli batu babanyalana bao babe ni tabo.

 Batili. Mwa libaka zeñata, batu bahasanga laisi, kuposa tupepa, kamba mane lika zeñwi cwalo kwa batu babasazo nyalana. Balumela kuli kueza cwalo kukatahisa kuli batu bao bakone kuba ni matohonolo, tabo, mane ni kupila nako yetelele. Kono Lipaki za Jehova habaezangi lika zetomile fa litumelo za kusaba lika zesiyo. Mi litumelo zeo likopanyeleza kulakaleza mutu matohonolo, ili nto yelwanisana ni likuka za mwa Bibele.—Isaya 65:11.

 Kwa ngambolo ya sinawenga yefelwanga kwa Ndu ya Mubuso, hakubangi ni lico ni lino. Batu babanyalana babañwi, baketanga kueza mukiti wa sinawenga hamulaho wa ngambolo, mi kwa mukiti wo kubanga ni lico ni lino. (Muekelesia 9:7) Haiba kukaba ni bucwala, habafangi batu bucwala bobuñata-ñata, mi bafanga feela babahulu.—Luka 21:34; Maroma 13:1, 13.

 Haiba kukaba ni mukiti hamulaho wa ngambolo, batu babanyalana bakona kuketa kuli kube ni lipina zekaliziwa ni kubina. (Muekelesia 3:4) Bakaketa lipina zeswanela hande kulikana ni sizo sabona, mi habana kuketa lipina zekatahisa kuli batu babamemilwe basitatale. Hañata kwa linawenga zeezezwa kwa Ndu ya Mubuso kuliziwanga lipina zetomile fa Mañolo a mwa Bibele.

 Bakeñisa kuli likuka za mwa Bibele halihanisi kamba kulumeleza batu kuhupula lizazi la sinawenga sabona, Lipaki baiketelanga kuhupula lizazi la sinawenga sabona kamba kutokwa. Haiba baikatulela kueza cwalo, baezezanga cwalo kwa mukunda kamba bakona kuba ni balikani ni lubasi lwabona feela.