Ka kuba Lipaki za Jehova, lueza molukonela kaufela kutiisa mabasi, ibe kuli ki aluna kamba ki a batu boluyahile ni bona. Lwakuteka Mulimu, yena yatahisize kuli kube ni mabasi. (Genese 2:​21-​24; Maefese 3:​14, 15) Mwa Bibele, Jehova ulufile likuka zetusize batu mwa lifasi kaufela kukondisa mwa manyalo abona ni kuba ni tabo.

 Lueza molukonela kaufela kupila ka kuya ka likuka za mwa Bibele bakeñisa kuli kueza cwalo kulutusa kuba baana babanyezi babande, basali babanyezwi babande, mane ni kuba bashemi babande. (Liproverbia 31:10-​31; Maefese 5:⁠22–​6:4; 1 Timotea 5:8) Butali bobufumaneha mwa Bibele bukona kutusa nihaiba mabasi ali mwa bulapeli bobushutana. (1 Pitrosi 3:​1, 2) Mulemuhe zene babulezi batu babañwi babasi Lipaki za Jehova kono ili bao bakubona nebabile Lipaki za Jehova hasamulaho:

•   Bo Clauir babapila kwa Brazil nebabulezi kuli: “Mwa lilimo ze 6 zapili kuzwa feela folunyalanela, neluomananga hahulu, mi nelusina tabo. Kono bo musalaaka bo Ivete hase babile yomuñwi wa Lipaki za Jehova, nebakalile kubonisa hahulu lilato ni pilu-telele. Licinceho zene baezize nelitahisize kuli linyalo laluna litiye.”

•   Bo Agness babapila mwa Zambia nebabulezi kuli: “Nenisika tabela muta bo muunaaka bo Chansa nebakalile kuituta Bibele ni Lipaki za Jehova, kakuli neninahana kuli Lipaki za Jehova batahisa lifapahano mwa mabasi a batu. Kono kuzwa feela ka nako yeo, nenilemuhile kuli kuituta Bibele mane kutusize kuli lube ni linyalo lelinde.”

 Halunze lukutaza, lutusanga batu boluyahile ni bona kuziba mo kusebelisa likuka zefumaneha mwa Bibele kukona kubatuseza

•   Kuketa hande mutu wa kunyalana ni yena

•   Kukondisa mwa silimo sapili mwa linyalo

•   Kupilisana hande ni makwenyanaa bona

•   Kuitusisa hande masheleñi

•   Kutuhela kuomana

•   Kuswalelana

•   Kuluta hande bana babona

 Niti kikuli, kwabanga cwalo fokuñwi. Ka mutala, ka silimo sa 1998 kampani yebatisisanga litaba yebizwa Sofres neifumani kuli kwa batu ba 20 baba mwa manyalo, ki alimuñwi feela ku bona yanaanani butata bobutuna mwa linyalo bakubona hane babile Paki ya Jehova.

 Jesu naapolofitile kuli babalatelela lituto zahae nebaka kopana ni butata mwa lubasi ka linako zeñwi. (Mateu 10:32-​36) Caziba yomuñwi wa litaba za kwaikale yabizwa Will Durant naabulezi kuli ka nako yene ubusa Mubuso wa Roma, “Bakreste nebatamelelizwe kuli nebatahisa lifapahano mwa mabasi a batu,” a mi ni kacenu Lipaki za Jehova babañwi batamelezwa taba yeswana. Kono kana taba yeo italusa kuli Lipaki za Jehova ki bona babatahisa lifapahano mwa mabasi?

 Kuta ya Mwa Europe Yetalima Litaba Zeama Liswanelo za Sicaba (European Court of Human Rights) hane italima taba yene batamelelizwe Lipaki za Jehova ya kuli batahisa lifapahano mwa mabasi, neibulezi kuli hañata ba lubasi babasi Lipaki za Jehova ki bona babatahisanga lifapahano “ka kusalumeleza wahabo bona yali Paki kuba ni tukuluho ya kulapela ni kueza lika zeñwi za bulapeli bwahae.” Kuta yeo neiekelize kubulela kuli: “Butata bo, buatile hahulu kwa mabasi ali mwa bulapeli bobushutana, mi Lipaki za Jehova babañwi ni bona ba mwa muinelo oswana.” b Nihaike kuli balwaniswanga bakeñisa bulapeli bwabona, Lipaki za Jehova balika mobakonela kaufela kulatelela kelezo ya mwa Bibele yeli: “Musike mwakutiseza mutu bumaswe . . . . Mueze ka momukonela kaufela kuli mupilisane ka kozo ni batu kaufela.”​—Maroma 12:17, 18.

 Lipaki za Jehova balatelela taelo ya mwa Bibele ya kunyalela ‘feela ku Mulena,’ ili kutalusa kuli mutu uswanela kunyala kamba kunyalwa feela ku mutu yanani litumelo zeswana ni zahae. (1 Makorinte 7:​39) Taelo ya mwa Bibele yeo yatusa. Ka mutala, taba yefumaneha mwa hatiso yeñwi ya mwa 2010 yebulela za linyalo ni lubasi (Journal of Marriage and Family) neibulezi kuli “batu babanyalani, ili baba mwa bulapeli bobuswana, babaezanga lika ka nzila yeswana, mi banani litumelo zeswana,” hañata babanga ni swalisano yende luli. c

 Kono Lipaki za Jehova habasusuezangi batu babaswalisana ni bulapeli bwabona kukauhana ni mutu yebanyalani ni yena yasi Paki. Bibele ibulela kuli: “Haiba musalaa muzwale haki yalumela mi musali yo walata kupila ni yena, asike amusiya; mi haiba musali unyezwi ki muuna yasalumeli mi muuna yo walata kupila ni yena, asike asiya muunaa hae.” (1 Makorinte 7:​12, 13) Lipaki za Jehova balatelela taelo ye.