Litaba zelulumela ka za maswabi ni lika zeluezanga ka nako yeo litomile fa lituto za mwa Bibele, zecwale ka litaba zelatelela:

•   Hakusika fosahala kulila haiba mutu yomuñwi yolulata atimela. Balutiwa ba Jesu nebalilile balatiwa babona hane bashwile. (Joani 11:33-35, 38; Likezo 8:2; 9:39) Kacwalo, ka nako ya maswabi haluezangi mukiti. (Muekelesia 3:1, 4; 7:1-4) Kono hakuba ni maswabi, lulikanga kuomba-omba batu babashwezwi.​—Maroma 12:15.

•   Babashwile hakuna sebaziba. Kusina taba ni simuluho yaluna kamba sizo saluna, luambukanga lizo kamba likezo zetomile fa litumelo zesi za ka Mañolo, ili zebonisa inge kuli babashwile bapila mi bakona kutusa kamba kuholofaza batu babapila. (Muekelesia 9:5, 6, 10) Lizo zeo likopanyeleza mitande, mikiti yeezwa fa maswabi ni mikiti ya ka silimo ya kuhupula mutu yashwile, kuezeza matabelo mutu yashwile, kuambola ni kukupa tuso kwa batu babashwile, ni lizo zeezezwa mutu yashwezwi ki muunaa hae kamba musalaa hae. Haluikenyangi mwa lizo zeo kamba kueza lika zeo kakuli lubata kumamela taelo ya mwa Bibele ye, yeli: “Muikauhanye ku bona, . . . mi mutuhele kuswala nto yesilafezi.”​—2 Makorinte 6:17.

•   Lunani sepo ya kuli babashwile bakapila hape. Bibele iluta kuli kukaba ni zuho ya bafu mi nako yataha muta lifu halisana kubateñi. (Likezo 24:15; Sinulo 21:4) Mi sina Bakreste ba kwa makalelo, kuba ni sepo ya kuli babashwile bakapila hape kulutusa kuambuka kueza lika zebaezanga batu babañwi za kulila mutu ka nzila yetulile tikanyo.​—1 Matesalonika 4:13.

•   Bibele ilususueza kuba ni buishuwo. (Liproverbia 11:2) Hakuba ni maswabi, halunahanangi kuli yeo ki yona kolo ya “kuiponahaliseza” mayemo anani ona mutu kamba sifumu sahae. (1 Joani 2:16) Halulukisangi mikiti ya fa maswabi, ili yelukisezwanga kutabisa batu, mi halulekangi makwati a bafu atula hahulu kamba kuapala liapalo zehoha hahulu mamelelo ya batu.

•   Halubatangi kuhapeleza babañwi kulumela litumelo zaluna ka za maswabi. Kacwalo, lulatelelanga sikuka se, sesili: “Yomuñwi ni yomuñwi waluna ukaikalabela ku Mulimu.” (Maroma 14:12) Niteñi, halubanga ni kolo, lwatalusezanga babañwi litaba zelulumela “ka bunolo ni ka likute lelituna.”​—1 Pitrosi 3:15.

 Sibaka: Haiba lubasi lueza katulo ya kuli kufiwe ngambolo ya malilo, ikona kufelwa kobaka keta kaufela, ikona kuba kwa Ndu ya Mubuso, kwa ndu ya maswabi, kwa ndu yeñwi, kamba kwa matutaeti.

 Sebelezo: Kufiwanga ngambolo yeomba-omba babashwezwi ka kubataluseza zeibulela Bibele ka za lifu ni sepo yelunani yona ya zuho. (Joani 11:25; Maroma 5:12; 2 Pitrosi 3:13) Mi kukona kunyakisiswa tulemeno totunde twanaanani tona mufu, mi mwendi ni kukoñomeka lika zende zebakona kuituta batu kwa mutala wahae wa busepahali.—2 Samuele 1:​17-​27.

 Batu bakona kuopela pina yetomile fa Mañolo. (Makolose 3:16) Mi sebelezo ifelanga ka tapelo yeomba-omba.​—Mafilipi 4:6, 7.

 Litifo kamba likoleko: Halulifisangi batu babafumaneha kwa mikopano ya bulapeli bwaluna, mane nihaiba hakuba ni maswabi; mi kwa mikopano yaluna hakueziwangi likoleko.​—Mateu 10:8.

 Batu babaswanela kufumaneha: Batu babasi Lipaki za Jehova balukuluhile kufumaneha kwa ngambolo ya malilo yefelwanga kwa Ndu ya Mubuso. Mi sina mikopano yelubanga ni yona, batu kaufela babatabela bakona kufumaneha kwa ngambolo yeo.

 Paki ni Paki wakona kuikezeza katulo ka kulatelela lizwalo lahae lelilutilwe ka Bibele. (1 Timotea 1:19) Nihakulicwalo, haluikenyangi mwa lisebelezo za bulapeli zesalumelelani ni zeiluta Bibele.​—2 Makorinte 6:14-17.