Ka kuba Lipaki za Jehova, lulikanga molukonela kaufela kupila ka kuya ka likuka zanaalutile Jesu ni kulikanyisa mutala oba lutomezi baapositola. Taba ye ikanyakisisa lituto lisikai zelulumela.

1.   Mulimu. Lulapela feela Mulimu anosi wa niti, yena Mulimu Yamaata Kaufela ni Mubupi waluna, wa libizo la Jehova. (Samu 83:18; Sinulo 4:​11) Ki yena Mulimu wa Abrahama, Mushe, ni Jesu.​—Exoda 3:6; 32:11; Joani 20:17.

2.   Bibele. Lulumela kuli Bibele ki Linzwi la Mulimu leliñozwi ka ketelelo ya moya wahae, mi neiñozwi kuli ituse batu. (Joani 17:17; 2 Timotea 3:16) Litaba zelulumela litomile fa mañolo a mwa Bibele kaufela a 66, akopanyeleza “Testamente Yakale” ni “Testamente Yenca.” Caziba yomuñwi wa litaba za bulapeli yabizwa Jason D. BeDuhn naabulezi niti hanaañozi kuli litaba zebalumela Lipaki za Jehova ni lika zebaezanga “litomile fa litaba zeibulela Bibele luli, isiñi fa litaba zebanahana kuli ki zona zeibulela Bibele.” a

    Lwalumela litaba kaufela zeibulela Bibele. Nihakulicwalo, likalulo zeñwi za Bibele litalusa lika ka nzila ya swanisezo; kacwalo mutu utokwa kueza lipatisiso kuli aliutwisise.​—Sinulo 1:1.

3.   Jesu. Lumamela lituto zanaalutile Jesu Kreste mi lulikanyisa mutala wahae. Lwamukuteka kakuli ki yena Mupilisi waluna mi ki Mwanaa Mulimu. (Mateu 20:28; Likezo 5:31) Kacwalo, lu Bakreste. (Likezo 11:26) Kono luitutile kuzwelela mwa Bibele kuli Jesu haki yena Mulimu Yamaata Kaufela mi luitutile kuli tuto ya Silaalu haki ya mwa Mañolo.​—Joani 14:28.

4.   Mubuso wa Mulimu. Wo ki mulongo oliteñi luli mwa lihalimu, haki muinelo wa mwa lipilu za Bakreste. Mubuso wo ukayolisa mibuso ya batu mi ukatahisa kuli mulelo wa Mulimu ka za lifasi upetwe. (Daniele 2:44; Mateu 6:9, 10) Hona cwale-cwale fa, mubuso wo ukaanga muhato wo kakuli mane Bibele ibonisa kuli lupila mwa “mazazi a mafelelezo.”​—2 Timotea 3:1-5; Mateu 24:3-14.

    Jesu ki yena Mulena wa Mubuso wa Mulimu o kwa lihalimu. Ukalisize kubusa ka 1914.​—Sinulo 11:15.

5.   Puluso. Bakeñisa kuli Jesu naafanile bupilo bwahae sina sitabelo sa tiululo, lwakona kuliululwa kwa sibi ni lifu. (Mateu 20:28; Likezo 4:12) Kuli batu batusiwe ki sitabelo seo, habatokwi feela kubonisa tumelo ku Jesu, kono hape baswanela kucinca mikwa yabona ni kukolobezwa. (Mateu 28:19, 20; Joani 3:16; Likezo 3:19, 20) Misebezi yaeza mutu ibonisa kuli tumelo yahae yapila. (Jakobo 2:24, 26) Kono mutu haakoni kufumana kupiliswa ka misebezi kakuli lukona feela kupiliswa ka “sishemo sa Mulimu.”​—Magalata 2:16, 21.

6.   Lihalimu. Jehova Mulimu, Jesu Kreste, ni mangeloi asepahala bapila kwa lihalimu. b (Samu 103:19-21; Likezo 7:55) Palonyana ya batu, ili ba144,000, bakazusezwa kwa lihalimu ilikuli babuse ni Jesu mwa Mubuso wa Mulimu.​—Daniele 7:27; 2 Timotea 2:12; Sinulo 5:9, 10; 14:1, 3.

7.   Lifasi. Mulimu naabupile lifasi ilikuli batu bapile ku lona kuya kuile. (Samu 104:5; 115:16; Muekelesia 1:4) Mulimu ukafuyaula batu babaipeya kuutwa mi uka bafa mibili yepetehile ni bupilo bobusa feli mwa paradaisi fa lifasi.​—Samu 37:11, 34.

8.   Bumaswe ni manyando. Bumaswe ni manyando nelikalisize kubateñi muta leliñwi la mangeloi a Mulimu neli mukwenuhezi. (Joani 8:44) Lingeloi leo lene likwenuhezi Mulimu, lona lene litilo bizwa “Satani” ni “Diabulosi” hasamulaho, nelipumile bo muuna ni musali bapili kuli baswalisane ni lona, ili nto yetahiselize bana babona manyando amañata. (Genese 3:1-6; Maroma 5:12) Mulimu utuhelezi bumaswe ni manyando kuli taba yanaazusize Satani itatululwe, kono haana kutuhelela kuli lika zeo lizwelepili kuya kuile.

9.   Lifu. Batu habashwa habazwelangipili kupila kwa sibaka sesiñwi. (Samu 146:4; Muekelesia 9:5, 10) Babashwile habayangi mwa lihele la mulilo.

    Mulimu ukazusa batu babañata-ñata babashwile. (Likezo 24:15) Kono batu babaka hana kulatelela likuka za Mulimu hamulaho wa kuzusiwa kwa bafu, bakatimezwa kuya kuile mi habana kuzusiwa nikamuta.​—Sinulo 20:14, 15.

10.   Lubasi. Lupila ka kulumelelana ni mulelo wa Mulimu wa kwa makalelo wa kuli muuna uswanela feela kunyala musali alimuñwi, mi libaka feela linosi lelikona kufeza linyalo ki muzamao wa buhule. (Mateu 19:4-9) Lunani buikolwiso bobutuna bwa kuli zeibulela Bibele zakona kutusa mabasi kukondisa.​—Maefese 5:22–6:1.

11.   Bulapeli bwaluna. Halulapelangi sifapahano kamba maswaniso afi kamba afi. (Deuteronoma 4:15-19; 1 Joani 5:21) Ki ze lika zeñwi za butokwa zeluezanga mwa bulapeli bwaluna:

    •   Kulapela ku Mulimu.​—Mafilipi 4:6.

    •   Kubala ni kuituta Bibele.​—Samu 1:1-3.

    •   Kunahanisisa litaba zeluituta mwa Bibele.​—Samu 77:12.

    •   Lukopananga hamoho kuli lulapele, kuituta Bibele, kuopela, kubulela za tumelo yaluna, ni kususueza Lipaki babañwi hamohocwalo ni batu babañwi.​—Makolose 3:16; Maheberu 10:23-25.

    •   Lukutazanga ‘taba yende ya Mubuso.’​—Mateu 24:14.

    •   Lwatusanga babanyandile.​—Jakobo 2:14-17.

    •   Lwayahanga ni kulukisa Mandu A Mubuso ni miyaho yemiñwi yeitusiswa kuli ituse mwa musebezi wa kuluta batu Bibele.​—Samu 127:1.

    •   Lwatusanga babatahezwi ki likozi.​—Likezo 11:27-30.

12.   Kopano yaluna. Kaufelaa luna lufumaneha mwa liputeho, mi puteho ni puteho iokamelwa ki sitopa sa baana-bahulu. Kono sitopa sa baana-bahulu haki bona babazamaisa puteho mi habalifiwangi masheleñi kabakala musebezi obaeza. (Mateu 10:8; 23:8) Batu babatahanga kwa mikopano yaluna habatokwiwangi kuli bafe za bulishumi mi hakueziwangi likoleko. (2 Makorinte 9:7) Misebezi yaluna kaufela ilifelwa ka linubu za kuitatela, mi babafanga linubu ze habatabeli kuzibahala.

     Sitopa Sesietelela, ili sikwatanyana sa Bakreste babahulile kwa moya babasebeleza kwa ofisi yetuna yezamaisa musebezi waluna mwa lifasi kaufela, bafanga ketelelo kwa Lipaki za Jehova mwa lifasi kaufela.​—Mateu 24:45.

13.   Swalisano yaluna. Litaba zelulumela zaswana mwa lifasi kaufela. (1 Makorinte 1:10) Hape luezanga ka taata kuli lufelise moya wa ketululo otahisanga kuli batu basike baswalisana kabakala simuluho yabona, mushobo, mubala kamba mayemo abona. (Likezo 10:34, 35; Jakobo 2:4) Kono niha luswalisani cwalo, mutu ni mutu ulukuluhile kuikezeza likatulo. Yomuñwi ni yomuñwi wa Lipaki za Jehova uezanga likatulo ka kuetelelwa ki lizwalo lahae lelilutilwe ka Bibele.​—Maroma 14:1-4; Maheberu 5:14.

14.   Mikwa yaluna. Lulikanga molukonela kaufela kubonisa lilato mwa lika kaufela zelueza. (Joani 13:34, 35) Haluezangi lika zesatabisi Mulimu, zecwale ka kuitusisa maswe mali ka kuapompela mwa mubili waluna. (Likezo 15:28, 29; Magalata 5:19-21) Lubata kupila ka kozo ni babañwi mi haluyangi kwa lindwa. (Mateu 5:9; Isaya 2:4) Lukuteka muuso wa mwa naha yelupila ku yona mi lwalatelelanga milao yelufilwe ibile feela milao yeo haitahisi kuli lulobe milao ya Mulimu.​—Mateu 22:21; Likezo 5:29.

15.   Swalisano yaluna ni batu babañwi. Jesu naalaezi kuli: “Ulukela kulata wahenu mouitatela.” Hape naabulezi kuli Bakreste “haki ba lifasi.” (Mateu 22:39; Joani 17:16) Kacwalo, lulikanga molukonela kaufela ‘kueza zende kwa batu kaufela,’ kono haluikenyangi mwa litaba za lipolitiki nihaiba hanyinyani, mi haluzwakanyangi bulapeli bwaluna ni bulapeli busili. (Magalata 6:10; 2 Makorinte 6:14) Kono lwakutekanga likatulo zebaeza batu mwa litaba zeo.​—Maroma 14:12.

 Haiba mubata kuziba zeñata ka za litaba zebalumela Lipaki za Jehova, mwakona kuipalela litaba zeo fa webusaiti yaluna, kupotela yeñwi ya maofisi aluna, kuya kwa mukopano wa puteho kwa Ndu ya Mubuso yeli bukaufi ni komupila kamba kuambola ni yomuñwi wa Lipaki za Jehova yafumaneha mwa sibaka semupila ku sona.