Basali ba libizo la Yanmei babapila kwa Asia, ili babali Lipaki za Jehova, nebatusize basali bababizwa Mingjie babali libofu kutula mukwakwa. a Bo Mingjie baitumela ku bona, bali: “Niitumezi. Haike Mulimu amifuyole!” Hasamulaho, bo Yanmei babuza bo Mingjie haiba nebaka tabela kuli bakopane hape kuli baikambote ni bona litaba za mwa Bibele. Hamulaho wa nako, bo Mingjie nebabulezi kuli zazi ni zazi nebalapelanga kuli bafumane bulapeli bwa niti. Ki kabakalañi hane balapelanga cwalo?

 Bo Mingjie batalusa kuli ka silimo sa 2008, mulikanaa bona wa sibofu naabamemile kuya kwa keleke yetusanga batu babali liyanga. Hamulaho wa kuteeleza kwa kutazo yanaafile muprisita, bo Mingjie bamukupa kubataluseza kuli litaba zanaabala nelizwa mwa buka mañi. Muprisita yo aalaba kuli nelizwa mwa Bibele, lona Linzwi la Mulimu la niti. Bo Mingjie habautwa cwalo, baba ni takazo yetuna ya kubala Bibele. Kacwalo, bafumana Bibele ya libofu ya mwa puo ya Sichainizi mi bafeza kubala livolyumu zayona ze 32 mwa likweli zebato eza 6. Bo Mingjie hane banze bazwelapili kubala Bibele, balemuha kuli tuto ya Silaalu yene baluta kwa bulapeli kone bayanga neli ya buhata, mi baituta kuli Mulimu unani libizo, lona la Jehova.

 Hamulaho wa nako, bo Mingjie bazwafiswa hahulu ki likezo zene baeza batu bane bakena bulapeli bo. Nebalemuhile kuli nebasa pili ka kuya ka litaba zene babala mwa Bibele. Ka mutala, nebakalanga pili kufa batu bane baiketile lico zende kihona bafa cwale libofu lico zesiyezi. Ketululo yeo yasitatalisa hahulu bo Mingjie, mi bakala kubata bulapeli bobuñwi mwa sibaka sene bapila ku sona. Ki lona libaka bo Mingjie hane balapelanga kuli bafumane bulapeli bwa niti.

 Bakeñisa kuli bo Yanmei neba babonisize sishemo, bo Mingjie balumela kuituta Bibele ni bona. Hamulaho wa nako, bo Mingjie bafumaneha kwa mukopano wa Lipaki za Jehova lwapili. Batalusa kuli: “Hanina kulibala lizazi lene niile kwa mukopano lwapili. Mizwale ni likaizeli kaufela neba nilumelisize ka lilato. Taba yeo nei nisusuelize hahulu. Nihaike kuli ni sibofu, nenilemuhile kuli batu balatana luli mi hakuna ketululo mwahalaa bona.”

 Bo Mingjie baeza zwelopili mi bakala kufumanehanga kwa mikopano kamita. Nebaikolanga hahulu kuopela lipina za Mubuso, kono neku babelanga taata kueza cwalo kakuli nekusina buka ya lipina mwa muñolo wa libofu one babalanga. Ka tuso ya mizwale ni likaizeli mwa puteho, bo Mingjie balukisa buka yabona ya lipina. Neku baangezi lihora ze 22 kuli bafeze kuñola lipina kaufela ze 151! Mwa April 2018, bo Mingjie bakala kukutazanga hamoho ni puteho mi kuzwa feela nako yeo, batandanga lihora zebato eza 30 mwa simu kweli ni kweli.

 Bo Yanmei nebatusize bo Mingjie kuitukiseza kukolobezwa ka kulukisa litaba za kuteeleza za lipuzo ni litimana za mwa Bibele zebonisizwe mwa buka ya Moluswalisanezi Kueza Tato ya Jehova. Mwa July 2018, bo Mingjie bakolobezwa. Batalusa kuli: “Nenisusuelizwe hahulu ki lilato lene babonisani mizwale ni likaizeli kwa mukopano omutuna. Nenitabile hahulu kuli cwale nenili mwa bulapeli bwa niti kuli mane nalotisa miyoko.” (Joani 13:34, 35) Cwale bo Mingjie basebeza sina bakutazi ba kamita kuli babonise babañwi lilato leliswana lene babonisizwe.