Mwa 2017, Lipaki za Jehova ba 12 nebatamile musipili ka sisepe kuzwa mwa sibaka sesifumaneha kwa munanga sesibizwa Mosquito (Miskito), mwa naha ya Nicaragua. Sisepe sene bakwezi nesiñozwi kuli Sturi Yamni. Bo Stephen, bane bali mwa sikwata seo, batalusa kuli: “Libaka lelituna hane lutamile musipili wo kikuli, nelubata kususueza sikwatanyana sa Lipaki za Jehova bane bapila mwa sibaka sa matakanyani ni kubatusa kukutaza taba yende mwa sibaka sesituna sene sili kalulo yabona ya simu.”

 Lipaki za Jehova ba 12 bao, batama musipili wabona one ueza likilomita ze 200 kuzwa kwa Pearl Lagoon kuya kwa Río Grande de Matagalpa. Kono nebasa zibi kuli libizo la sisepe sene bakwezi litalusa “Taba Yende” mwa puo ya Simiskito, nelikaba ni taluso yetuna kwa batu bane bapila kwatuko a nuka yeo. Hase bazamaile ka lihora ze 12, lusabali nako yene bapumuzi busihu, Lipaki za Jehova bao bafita kwa sibaka kone baya, ili tolopo ya La Cruz de Río Grande. Lipaki za Jehova ba 6 bane bapila mwa sibaka seo, baamuhela mizwale ni likaizeli babona bao ka tabo.

 Busihu fa lizazi leliswana leo, kwaezahala nto yeñwi yemaswe. Kwaba ni liñungwa lelituna lene litahisize kuli kube ni mezi amañata kwa libaka za kwa makalelo a nuka ya Río Grande de Matagalpa. Mwa lihora feela lisikai, nuka yeo yabayula mi mezi azwelapili kuekezeha ka mazazi amabeli. Ndu ya Mubuso ni mandu amañata mwa La Cruz naatibile. Mizwale bao bane bali baeñi, batusa batu ba mwa sibaka seo kuzwa mwa mandu abona. Hamulaho wa fo, buñata bwabona bayo pila mwa ndu yelundatami ya yomuñwi wa Lipaki za Jehova ka mazazi amabeli.

 Fa busihu bwa bulaalu, mubusisi wa tolopo ya La Cruz ayo potela Lipaki za Jehova kukupa tuso yabona. Bakeñisa kuli sisepe sa Sturi Yamni nesitiile mi ki sona feela sene sikona kuya mwabuse bwa nuka yenebayuzi yeo, mubusisi naabata kuli Lipaki basilise sikwata sa batu sene sikayo tusa batu bane bawezwi ki kozi yeo mwa minzi yemiñwi. Lipaki za Jehova nebatabela kutusa.

 Habusa kakusasana, Lipaki za Jehova babalaalu batama musipili ka sisepe ni sikwata seo. Bo Stephen batalusa kuli: “Ka nako yeo, mezi naabuba ka maata. Likota zetuna zenepumbuzwi ki liñungwa nelinze likuka mwa nuka, nekunani mandinda amatuna, mi mezi mwa nuka naabuba ka lubilo lolufitelela likilomita ze 18 mwa hora iliñwi.” Kusina taba ni miinelo yetaata yeo, sisepe seo nesi lukonisize kuyo fita kwa minzi yemilaalu.

 Lipaki za Jehova babalaalu bao, nebaitusisize kolo yeo kuomba-omba batu bane bapila mwa minzi ya mwa sibaka seo. Hape Lipaki bao bafa batu magazini ya Muzuhe! ya 2017, yenani toya ya taba yeli, “Hakuba ni Kozi—Zemukona Kueza Kuli Musilelezwe.” Litaba zeneli mwa magazini yeo, ki zona luli zene batokwa batu bao mwa muinelo one bali ku ona.

 Batu bane bapila kwatuko a nuka yeo nebaitebuhile hahulu tuso yene babafile Lipaki za Jehova hamohocwalo ni litaba za mwa Bibele zenee baomba-ombile. Bo lyaminzi babañwi nebabulezi kuli: “Lipaki za Jehova batabela kutusa ka nako ya ziyezi.” Babañwi nebabulezi kuli: “Lipaki babonisanga babañwi lilato la niti.” Hamulaho wa kubona buikatazo bobaezize Lipaki za Jehova kuli batuse Lipaki babañwi ni batu babañwi, batu babañata babapila mwa minzi yeo sebatabela kuteeleza kwa lushango lwa mwa Bibele loluomba-omba.