Basali ba libizo la Irma, bapila kwa Germany, mi banani lilimo zebato eza 90. Nebabile mwa kozi habeli mi nebaholofezi hahulu kuli mane nebanani kupazulwa hasikai. Ka nako ya cwale habasa kona kueza musebezi wa kukutaza fa ndu ni ndu sina mone baezezanga kwamulaho. Kacwalo, bakutazanga ka kuñolela bahabo bona ni batu babañwi mañolo. Batu baitebuhanga hahulu mañolo abona asusueza ni aomba-omba kuli mane hañata babalizezanga luwaile mi babatanga kuziba fobaka amuhela mañolo amañwi hape. Hape bo Irma baamuhelanga mañolo amañata a buitumelo ni kubakupa kuli bañole mañolo amañwi. Bo Irma bali: “Lika zeo kaufela linitahiseza tabo yetuna ni kunisusueza kuzwelapili kukutaza.”

 Hape bo Irma bañolelanga basupali babañata mañolo. Batalusa kuli: “Musali yomuñwi wa musupali naanilizelize luwaile mi anitaluseza kuli liñolo lene nimuñolezi, muunaa hae hasatimezi, neli muomba-ombile hahulu. Ubeile liñolo leo mwa Bibele yahae mi wakuta-kutelanga kulibala manzibwana. Musali yomuñwi yanaasazo shwelwa ki muunaa hae, naabulezi kuli liñolo lene nimuñolezi neli mutusize hahulu kufita kutazo yanaafile muprisita. Naanani lipuzo zeñata zanaabata kubuza mi anikupa kuli ato nipotela.”

 Musali yomuñwi yanaasi Paki yene bakopani ni yena bo Irma, naatutile kuyo pila kwa sibaka sa kwahule, mi abakupa kuli bamuñolele liñolo. Bo Irma batalusa kuli: “Musali yo naabulukile mañolo ane nimuñolezi kaufela. Hasatimezi, mwanaa hae wamusizana anilizeza luwaile. Anitaluseza kuli naabalile mañolo kaufela ane niñolezi bo mahe mi akupa kuli ni yena nimuñolele mañolo ka za litaba za mwa Bibele.”

 Bo Irma baikola hahulu bukombwa bwabona. Batalusa kuli: “Nalapelanga ku Jehova kuli azwelepili kunitusa kuba ni maata a kumusebeleza. Nihaike kuli hanisa kona kukutaza fa ndu ni ndu, nizwelapili kukutaza ka monikonela kaufela.”