Musali yabizwa Ong-Li ki yomuñwi wa Lipaki za Jehova mi upila kwa Bulgaria. Naaitutanga Bibele ni musali yomuñwi yabizwa Zlatka, ili yo muunaa hae naasaituti Bibele. Bo Ong-Li batalusa kuli: “Zazi leliñwi hane luituta za lubasi, nakoñomeka butokwa bwa kubulelela batu bolunyalani ni bona ni bana baluna kuli lwabalata. Bo Zlatka banitalimela ka maswabi mi banitaluseza kuli balikuba babulelele bo muunaa bona kamba mwanaa bona wamusizana wa lilimo ze 9 kuli babalata!”

 Bo Zlatka banitaluseza kuli: “Nakona kubaezeza nto ifi kamba ifi, kono hanikoni feela kubulela manzwi ao.” Baekeza bali: “Bo ma balikuba banibulelele kuli banilata, mi bo kuku habasika bulelela kale fateñi bo ma kuli babalata.” Bo Ong-Li babonisa bo Zlatka liñolo lelitalusa kuli Jehova naabulezi ka kutumusa kuli naalata Jesu. (Mateu 3:17) Basusueza bo Zlatka kulapela ku Jehova ka za teñi ni kuli baitomele sikonkwani sa kubulelela bo muunaa bona ni mwanaa bona wamusizana kuli babalata.

 Bo Ong-Li bali: “Hamulaho wa mazazi amabeli kuzwa fo, bo Zlatka banitaluseza ka tabo kuli nebalapezi ku Jehova kukupa kuli abatuse. Bo muunaa bona hane bakutile kone baile, babataluseza kuli mwa tuto yabona ya Bibele nebaitutile kuli ki kwa butokwa kuli musali akuteke muunaa hae ni kubonisa kuli wamulata. Mi hamulaho wa kukutumana ka nakonyana, babataluseza kuli neba balata hahulu! Mwanaa bona wamusizana hanaakutile kwandu, bo Zlatka bamukumbata ni kumutaluseza kuli neba mulata! Bo Zlatka bali ku na: ‘Cwale seniikutwa kuimuluha luli. Mwa lilimo zefelile ze kaufela, nenipalelwa kutaluseza lubasi lwaka mone niikutwela ka za bona, kono niitumela ku Jehova kuli unitusize kubataluseza moni balatela.’

 Bo Ong-Li bazwelapili, bali: “Hamulaho wa sunda iliñwi kuzwa fo, nakopana ni bo muunaa bo Zlatka, mi banitaluseza kuli: ‘Batu babañata banikupile kuli nisike nalumeleza bo Zlatka kuituta Bibele ni mina, kono nalemuha kuli tuto yabona ya Bibele ilutusize luli sina lubasi. Cwale seluli balikani babatuna mi lunani tabo mwa linyalo laluna.’”