Bo Virginia, babali Lipaki za Jehova, bakula butuku bwa kwa booko bobutahisa kuli bapalelwe kueza nto ifi kamba ifi. Mubili wabona kaufela ubatile. Bakona kubona ni kuutwa, kutona ni kuitima kwa meeto, ni kushenyisa hanyinyani toho yabona. Habakoni kubulela kamba kuca. Ka nako yeñwi, nebanani buikangulo bobunde bwa kwa mubili mi nebanani maata a kueza lika. Kono zazi leliñwi kakusasana, ka silimo sa 1997, bautwa butuku bobutuna kwa likoshi ka nako yetelele. Bakubona babamatiseza kwa sipatela, mi busihu bo, baba mwa koma. Bawetuluka hamulaho wa lisunda zepeli inze bali mwa sibaka mokuisiwanga batu babakulile hahulu; mubili wabona neubatile, mi nebabuyela ka kuitusisa mushini. Ka mazazi asikai, nebasa hupuli nto ifi kamba ifi, mi mane nebasa zibi kuli neli bona bo mañi.

 Bo Virginia batalusa zeneezahezi hasamulaho. Bali: “Hanyinyani-hanyinyani, nakala kuhupula lika. Nalapela ka taata. Nenisa bati kushwa ni kusiya mwanaaka wamushimani asina me wa kumubabalela. Mi kuli nizwelepili kuitiisa, naeza mone nikonela kaufela kuhupula litimana zeñata za mwa Bibele.

 “Hamulaho wa nako, madokota banizwisa mwa sibaka mokuisiwanga batu babakulile hahulu. Nalukululwa hamulaho wa likweli ze 6 za kuba mwa lipatela zeshutana-shutana. Mubili waka neubatile luli, mi nenitokwa kutusiwa kueza lika. Taba yeo yanizwafisa hahulu! Neniikutwa kuli nenisi wa butokwa ku Jehova ni batu babañwi. Hape neniikalezwi kakuli nenisa koni kubabalela mwanaaka.

 “Nakala kubala zebonwi za Lipaki za Jehova bane bakula butuku bobutuna sina na mi nenitabisizwe hahulu ki taba ya kuli nebaeza mone bakonela kaufela kusebeleza Jehova. Kabakaleo, naikataza kuba ni mubonelo omunde mi naisa pilu kwa lika zene nikona kueza. Pili nisika kula kale, nenisina hande nako ya kueza lika za kwa moya. Kono cwale, ninani lizazi mukatumbi mi senikona kueza lika za kwa moya zazi ni zazi. Kacwalo, kufita kuzwafa, naisa pilu kwa kusebeleza Jehova.

 “Neniitutile kuitusisa kompyuta. Niitusisanga progilamu ya fa kompyuta yeñolanga manzwi ka kuya ka moishenyeza toho yaka. Kueza cwalo kwakatalisa, kono kunitusanga kuba ni kolo ya kuituta Bibele ni kukutaza ku babañwi ka kuitusisa mañolo ni ka e-mail. Mi kuli niambole ni batu babañwi, niitusisanga litapa fokunani sipeleta. Mutu yainzi ni na unisupezanga litaku, iliñwi ka iliñwi. Haiba usupile taku isili, nilutulanga hahulu meeto aka; kono haiba usupile taku yelukile, naitimanga kwa meeto. Luezanga cwalo hañata-ñata mane kufitela lupanga manzwi ni mibamba. Likaizeli babañwi babatandanga nako yeñata ni na, sebaziba hande lika zenibata kubulela mane pili nisika basupeza kale litaku. Mi fokuñwi habambunjanga, lwasehanga.

 “Niikolanga hahulu kuabana mwa misebezi ya puteho. Kamita nifumanehanga kwa mikopano ya puteho ka kuitusisa progilamu yekonahalisa kuli nibonane ni baputehi. Nañolanga likalabo, mi mutu yomuñwi wanibalelanga zona ka nako ya lipuzo ni likalabo. Hape nibuhanga maprogilamu a ka kweli a JW Broadcasting a hamoho ni sikwata sa mizwale ni likaizeli babañwi.

 “Senikulile butuku bo ka lilimo ze 23. Fokuñwi nalembwalanga. Kono nitiyelanga muinelo wo ka kulapela, kuikola siango ni mizwale ni likaizeli, ni kupateha kueza lika za kwa moya. Mane ka tuso ya mizwale ni likaizeli mwa puteho, nikonile kueza bupaina bwa kutusa ka lilimo zefitelela 6. Hape nilikile monikonela kaufela kutomela mwanaaka, Alessandro, mutala omunde, mi cwale unyezi mi ki muuna-muhulu mwa puteho. Hape yena ni musalaa hae ki mapaina ba kamita.

 “Hañata ninahanisisanga lika zenika kona kueza mwa paradaisi. Nto yapili yenibata kueza ki kubulelela babañwi ka za Jehova ka mulomo waka. Nenika tabela kuya kwa sibaka sesiñwi sesifumaneha kwa munanga wa nuka inze nibuha libaka zende. Bakeñisa kuli senitandile lilimo ze 20 inze nica lico za sitipwitipwi ka mupila, nenika tabela kukoyola apule kwa kota ni kuimonkola. Mi bakeñisa kuli nisimuluha kwa Italy, ninyolelwa hahulu kuapeha ni kuca lico za kwa Italy zenitabela hahulu, kukopanyeleza cwalo ni pizza!

 “Kuba ni ‘sepo ya puluso’ kusilelelize munahano waka. (1 Matesalonika 5:8) Kuipona inze nili mwa lifasi lelinca kunitusa kuba ni tabo nihaike kuli hanina buikangulo bobunde bwa kwa mubili, kono ninani buikolwiso bwa kuli nituha nifola kwa butuku bonikula. Ninyolelwa hahulu nako yeo nikaikola kupila ‘bupilo sakata’ bwalusepisize Jehova ka kuitusisa Mubuso wahae.”—1 Timotea 6:19; Mateu 6:9, 10.