Bo Madián ni bo musalaa bona bo Marcela nebapila bupilo bwa simbombo mwa Medellín, kwa Colombia. Musebezi one baeza bo Madián neu bafumanisa masheleñi amañata; kacwalo, nebapila mwa ndu yende hahulu. Kono kwaezahala nto yeñwi yene batusize kunyakisisa zene baswanela kuunga kuba za butokwa hahulu mwa bupilo bwabona, ka kuba batanga ba Jehova Mulimu. Batalusa kuli: “Mwa silimo sa 2006, nelufumanehile kwa mukopano oipitezi wa lizazi lililiñwi, one unani toho ya taba yeli, ‘Mu Be Ni Liito Le Li Bona Hande.’ Buñata bwa lingambolo zenefilwe neli lususuelize kunolofaza bupilo bwaluna kuli lusebeleze Mulimu ka kutala. Hane luzwa fa sibaka sa mukopano, lwalemuha kuli nelusa ezi cwalo. Nako kaufela nelutabela kuleka-leka lika zene lusatokwi, niha nelusina masheleñi a kulilifela; kacwalo nelunani likoloti zeñata.”

 Lingambolo zenefilwe kwa mukopano wo nelitusize bo Madián ni bo Marcela kulemuha kuli nebatokwa kueza licinceho, mi bakala kunolofaza bupilo bwabona. Batalusa kuli: “Nelutuhezi kulekanga lika zeñata. Lwatutela mwa ndu yenyinyani, lwalekisa mota yaluna, mi lwaleka mutututu.” Hape nebatuhezi kuyanga kwa libaka kone bakona kukenelwa ki muliko wa kuleka lika zene basatokwi. Bakala kutandanga nako yeñata kushaela lushango lwa mwa Bibele ku bane bapila bukaufi ni bona. Mi bakala kuswalisana hahulu ni mizwale ni likaizeli bane bali mapaina babaipitezi, a ili bane batandanga nako yeñata kuluta batu za Jehova.

 Nakonyana kuzwa fo, bo Madián ni bo Marcela baikatulela kuekeza kwa bukombwa bwabona ka kututela kwa puteho yenyinyani yenefumaneha kwa sibaka sa mwa matakanyani, ili kone kutokwahala hahulu bakutazi ba Mubuso. Mi kuli batutele kwa sibaka seo, bo Madián nebatuhezi musebezi wabona. Bo muzamaisi babona nebapalelwa kuutwisisa libaka hane babata kutuhela musebezi omunde wo. Kacwalo, bo Madián babatusa kuutwisisa libaka hane baangile muhato wo, ka kubabuza kuli: “Musebezi omueza umifumanisa masheleñi amañata, nji cwañi? Kono kana munani tabo mwa bupilo?” Bo muzamaisi babona baitumelela kuli nebasina tabo mwa bupilo kakuli nebakopana ni miinelo yetaata yemiñata yene basakoni kutatulula. Bo Madián cwale babataluseza kuli: “Sa butokwa mwa bupilo haki kuba ni masheleñi amañata. Kono ki kuziba lika zetahisa kuli mube ni tabo. Kuluta batu za Mulimu ki kona kokutahisa kuli na ni musalaaka lube ni tabo, mi lubata kuba ni tabo yetuna ka kuitusisa nako yaluna yeñata kueza musebezi wo.”

 Bo Madián ni bo Marcela cwale sebanani tabo sakata kabakala kuli baitusisa nako yabona yeñata kusebeleza Mulimu. Mwa lilimo ze 13 zefelile, basebelelize kwa liputeho zefumaneha kwa mutulo-wiko wa Colombia, ili kokutokwahala hahulu bakutazi ba Mubuso. Mi cwale baikola tohonolo ya kusebeza sina mapaina babaipitezi.