Bo Artur, babali muokameli wa mupotoloho kwa Armenia, nebapotela puteho yeñwi ya Lipaki za Jehova. Nebalemuhile kuli puteho yene bapotela neisika itusisa kale mukutalezo wa fa nyangela, okopanyeleza kuitusisa tukalani twa lihatiso zetomile fa Bibele. Bo Artur ni bakubona bo Anna, hamohocwalo ni Paki yomuñwi wa libizo la Jirayr, batoma kakalani ka lihatiso mwa tolopo yeñwi yenyinyani ilikuli basusueze bahasanyi babañwi mwa puteho yeo. Batoma kakalani kao mwa sibaka mone kufita hahulu batu babañata.

 Honafo feela, batu bane basweli kufita mwa nzila babonisa kutabela, mi babañwi bakalisa kuunga lihatiso. Niteñi, nakonyana kuzwa fo, balwanisi ni bona balemuha kakalani ka lihatiso kao. Baprisita bababeli bataha kwa kakalani kao, mi yomuñwi ku bona alaha kakalani kusina kubuza, mi kakalani kao kawa. Hasamulaho, anata bo Artur lubaka kwa pata, mi magilasi abona awela fafasi. Bo Artur, ni bo Anna, hamohocwalo ni bo Jirayr balika kueleza muprisita yo kono apala. Baprisita bao bahatikela kakalani kao ni kushandaula lihatiso zeneli fateñi. Hamulaho wa kulwahaka Lipaki za Jehova bao ni kubabemba, baprisita bao bafunduka.

 Bo Artur, bo Anna, ni bo Jirayr bayo biha taba yeo kwa polisi ya mwa sibaka seo. Batalusa zeneezahezi, mi bakutaza ka bukuswani kwa mapokola basikai ni batu babañwi ka za litaba za mwa Bibele. Hasamulaho, Lipaki za Jehova babalaalu bao baisiwa kwa ofisi ya yomuhulu wa mapokola. Kwa makalelo, mupokola yo naabata kuziba zeneezahezi. Hasaalemuhile kuli bo Artur, muuna yanaali sinata, nebasika kutisa misuha hane banatilwe lubaka, mupokola yo atuhela kubuza za taba yeo, mi akalisa kubuza bo Artur ka za litaba zebalumela Lipaki za Jehova. Puisano yabona neitandile lihora zeene! Mupokola yo naatabezi hahulu zanaautwile kuli mane abulela kuli: “Bulapeli bo ki bobunde luli! Nibata kuswalisana ni bona ni na!”

 Lizazi lene litatami, bo Artur hane baeza bupaki bwa fa nyangela hape, baatumelwa ki muuna yomuñwi yanaaboni zeneezahezi lizazi lelifelile. Muuna yo ababaza bo Artur bakeñisa kuli nebasika kutiseza misuha hane balwaniswa ki baprisita. Muuna yo aekeza kubulela kuli zene baezize baprisita nelitahisize kuli asike abasepa hape.

 Manzibwana a lizazi leo, yomuhulu wa mapokola abiza bo Artur kuli bakutele kwa polisi. Kono mwa sibaka sa kuli baambole za taba yeo, mupokola yo abuza lipuzo zeñwi ka za Bibele. Mapokola babañwi bababeli bato teeleza kwa puisano yeo.

 Habusa, bo Artur baya kuyo potela mupokola yo hape, mi fa musipili wo, bamubonisa mavidio abonisa litaba za mwa Bibele. Mupokola yo abiza mapokola babañwi kuli bato buha mavidio ao ni bona.

 Lika zemaswe zene baezize baprisita nelitahisize kuli mapokola babañata bautwe taba yende lwapili mwa bupilo bwabona. Mi taba yeo neitahisize kuli mapokola babe ni mubonelo omunde ka za Lipaki za Jehova.