Bo Maud bapila kwa France mi fa sikolo fobasebeleza, batusanga bana ba sikolo babali liyanga ka nako ya lituto. Mi cwanoñu fa, bana ba sikolo mwa kilasi yeñwi nebaituta za Pulao Yetuna ya ba Nazi ni ka za minganda yabona ya tukufazo. Mapantiti ba mwa minganda yeo nebatinanga yunifomu fone kulukezwi sisupo sa mubala omuñwi. Mubala wa sisupo seo ni mone sibupehezi nelibonisa libaka latamezwi mutu.

 Muluti yomuñwi naabulezi cwana ka za mapantiti babañwi bane batinanga yunifomu fokunani sisupo sa mubala wa pulipela: “Ninahana kuli mapantiti ba nebafilwe sisupo se bakeñisa kuli nebali ba kalombe.” Hamulaho wa lituto, bo Maud baatumela muluti yo ni kumutaluseza kuli ba Nazi nebafile mapantiti bao sisupo sa mubala wa pulipela kuli bazibahale kuli neli Lipaki za Jehova. a Bo Maud bataluseza muluti yo kuli nebaka mutiseza litaba zeñwi zenepaka taba yeo. Bo muluti bao balumela mi bakupa bo Maud kutaluseza bana ba sikolo litaba zeo.

 Mwa kilasi yeñwi, bana ba sikolo hane baituta za taba yeswana, yomuñwi wa baluti naaitusisize chati yenebonisa lisupo zeshutana-shutana zenebanga fa yunifomu yene batinanga masole. Chati yeo neibonisize ka kunepahala kuli sisupo sa mubala wa pulipela nesizibahaza Lipaki za Jehova. Hamulaho wa tuto yeo, bo Maud babuza muluti yo haiba naakatabela kuziba litaba zeñata ka za taba yeo. Muluti yo alumela mi alukisa kuli bo Maud bataluseze bana ba sikolo litaba zeo.

 Bo Maud balukisa kuli nebaka nyakisisa taba yeo ni bana ba sikolo ka mizuzu ye 15, kono nako yabona hase ifitile, muluti yo abataluseza kuli: “Mufilwe hora ya kulutaluseza litaba kaufela.” Bo Maud bakala ka kubuhisa vidio yenebulela za Lipaki za Jehova bane banyandisizwe ki ba Nazi. Mwa vidio hane kubulezwi za taba ya kuli ba Nazi nebaamuhile bashemi babali Lipaki bana babona ba 800, bayemisa vidio ni kubala litaba zebonwi za banana babalaalu kwa banana bao. Hamulaho wa kubuhisa vidio yeo, bo Maud bafeza ka kubala liñolo lene liñozwi ka silimo sa 1940 ki yomuñwi wa Lipaki za Jehova wa kwa Austria yabizwa Gerhard Steinacher, ili yanaanani lilimo ze 19. Naañozi liñolo leo lihora lisikai pili asika bulaiwa kale ki ba Nazi b kuli alaeze bashemi bahae.

 Bo Maud nebabulezi litaba zeswana ni mwa kilasi yeñwi. Bakeñisa kuli bo Maud nebabile ni bundume, baluti bababeli bao cwale sebapundanga Lipaki za Jehova nako kaufela habaluta litaba ka za batu bane banyandisizwe mwa minganda ya ba Nazi.