Maluwo a butokwa acwale ka ndu kamba mota atokwa kubabalelwa. Ka nzila yeswana, lutokwa kubabalela silikani saluna ni Mulimu. Mukona kuzwelapili kutiisa cwañi silikani seo hamulaho wa kukolobezwa?

Ze mwa taba ye

•  Muzwelepili kuituta Linzwi la Mulimu

•  Muzwelepili kulapela ku Jehova

•  Muzwelepili kutaluseza babañwi litaba zemulumela

•  Muzwelepili kufumanehanga kwa mikopano ya Sikreste

 Liñolo lelikona kutusa: “Muzwelapili kubeya muselo mwa musebezi kaufela omunde ni kuhula mwa zibo yenepahezi ya Mulimu.”—Makolose 1:10.

 Zelitalusa Liñolo: Hamulaho wa kukolobezwa, mukatokwa kuzwelapili kubalanga Bibele ni kunahanisisa litaba zemuituta.—Samu 25:4; 119:97.

 Zemuswanela kuziba: Ka linako zeñwi, hamuna kubanga ni takazo ya kuituta Bibele. Mukona kunahana kuli mwendi hamukoni feela za kubala.

 Zemukona kueza: Muitute zeñata ka za litaba za mwa Bibele zemutabela. Mukete nako yemuka ezanga tuto ya ka butu mi haiba muba ni tomahanyo yende mukalemuha kuli kubala ni kuituta Bibele haki musebezi otaata. Hamuituta Bibele, mulelo wamina uswanela kuba wa kutiisa lilato lamina ku Jehova ni mwa Linzwi lahae. Kuituta ka nzila yeo kwatusa mi kwatabisa.—Samu 16:11.

 Akalezo: Kuli mutusiwe hahulu ki tuto yamina, mubate sibaka sesikuzize ili kokusina lika zekona kumifilikanya.

 Kana mutokwa litaba zeñwi zetusa?

•   Mubale litaba zelatelela:

   “Bibele Ikona Kunitusa Cwañi?—Kalulo 2: Muikole Kubala Bibele”

   “How Can I Learn to Focus?”

•   Mubuhe vidio yeli:

   Zebabulela Litaka Zamina—Kubala Bibele

•   Muikungele:

   “Bible-Reading Plans”

 Liñolo lelikona kutusa: “Musike mwabilaezwa ki sesiñwi, kono mwa lika kaufela muzibise Mulimu zemukupa ka tapelo ni ka kupo hamoho ni buitumelo.”—Mafilipi 4:6.

 Zelitalusa Liñolo: Kuambola ni Mulimu kutalusa kuli waambola ni luna mi ni luna lwaambola ni yena: Muteeleza ku yena hamubala Linzwi la hae; muambola ni yena hamulapela. Hamulapela mwakona kukupa Mulimu kuli amituse ni kuitumela ku yena kwa limbuyoti zamifile.

 Zemuswanela kuziba: Ka linako zeñwi, mukana mwakala kuikutwa kuli litapelo zamina halizweleli kwatasaa pilu. Mwendi mukana mwakala kukakanya ka za haiba Jehova wateelezanga kamba kuli watabela kuutwa litapelo zamina.—Samu 10:1.

 Zemukona kueza: Mwa lizazi kaufela, munahane ka za lika zemukona kubeya mwa litapelo zamina. Haiba muinelo omuli ku ona haumilumelezi kulapela ka nako yetelele, mwakona kuketa kulapela ka za taba yeo ka nako isili mwa lizazi leo. Kwandaa kulapela feela ka za lika zemibilaeza, mulapele ni ka za lika zebatokwa babañwi.—Mafilipi 2:4.

 Akalezo: Haiba muikutwa kuli litapelo zamina haki zezwelelanga kwatasaa pilu, mulapele ku Jehova ka zateñi. Ubata kuutwa ka za lika kaufela zemibilaeza, kukopanyeleza cwalo ni zeama litapelo zamina.—1 Joani 5:14.

 Kana mutokwa litaba zeñwi zetusa?

•   Mubale taba yeli:

   “Ki Kabakalañi Haniswanela Kulapelanga?”

•   Muikungele:

   “How to Improve Your Prayers”

 Liñolo lelikona kutusa: “Uzwelepili kutokomela mikwa yahao ni tuto yahao. . . . Ka kueza cwalo ukaipilisa ni kupilisa baba kuutwa.”—1 Timotea 4:16.

 Zelitalusa Liñolo: Hamutaluseza babañwi litaba zemulumela, mutiisa tumelo yamina. Ka kueza cwalo, mwakona kupilisa bupilo bwa batu baba miutwa hamoho cwalo ni bupilo bwamina.

 Zemuswanela kuziba: Ka linako zeñwi, mukaikutwanga kuli hamutabeli kutaluseza babañwi zemulumela. Mwendi mane muka sabanga kueza cwalo, sihulu hamuli kwa sikolo.

 Zemukona kueza: Musike mwalumeleza maikuto amaswe acwale ka sabo, kumizamaisa. Muapositola Paulusi naañozi kuli: “Haiba [nishaela taba yende] ka kuikapeleza, ni fona fo, nisanani bukombwa bonifilwe.”—1 Makorinte 9:16, 17.

 Akalezo: Ka tumelezo ya bashemi bamina, mufumane mutu yakona kumitusa ni yakona kumitomela mutala omunde, mi mutu yo uswanela kuba paki yali mutala omunde mwa bukombwa.—Liproverbia 27:17.

 Kana mutokwa litaba zeñwi zetusa?

•   Mubale taba yeli:

   “Why Am I Afraid to Share My Faith?”

 Liñolo lelikona kutusa: “Luisezane pilu kuli lususuezane kuba ni lilato ni misebezi yeminde, lusike lwakeshebisa kukopana hamoho.”—Maheberu 10:24, 25.

 Zelitalusa Liñolo: Mulelo omutuna oluyelanga kwa mikopano ki kuyo lapela Jehova. Kono kunani lika zeñwi zepeli zende zekona kuezahala haiba lufumaneha kwa mikopano. Sapili, mukasusuezwa ki mizwale ni likaizeli kwa mikopano. Sabubeli, haiba mufumaneha kwa mikopano ni kuabana ku yona muka basusueza.—Maroma 1:11, 12.

 Zemuswanela kuziba: Ka linako zeñwi, mwendi munahano wamina uka yaululwanga ki lika lisili hamuli kwa mikopano ili nto yekona kumipaleliswa kuituta lika za butokwa zelutiwa. Kamba mwendi mukana mwatuhela kufumanehanga kwa mikopano kaufela ilikuli muise hahulu pilu kwa lika zeñwi zecwale ka musebezi wa kwa sikolo.

 Zemukona kueza: Muikatulele kufumanehanga kwa mikopano kamita mi muitomele sikonkwani sa kuitutanga zeñata ku yona, ka nako yeswana inze mueza musebezi wa kwa sikolo. Muabanange kwa mikopano ka kualaba. Hamulaho wa mikopano, mubabaze muzwale kamba kaizeli alimuñwi kabakala ngambolo kamba kalabo yende yafile.

 Akalezo: Muitukisezange pili musikaya kale kwa mikopano. Muikungele Progilamu ya JW Library^®, mi musine fa kalulo yeli “Meetings” kuli mubone zekanyakisiswa kwa mukopano ni mukopano.

 Kana mutokwa litaba zeñwi zetusa?

•   Mubale taba yeli:

   “Ki kabakalañi haluswanela kuyanga kwa mikopano ya Sikreste?”