Luungeñi kuli semubile mwa libato ka nakonyana, kono mukalisa kukakanya mutu yemuli ni yena mwa libato. Kana muswanela kuzwelapili kuba mwa libato leo kamba muswanela kulifelisa? Taba ye ilelezwi kumitusa kueza katulo yende.

Ze mwa taba ye

•  Hamukakanya mutu yemuli ni yena mwa libato

•  Kueza katulo

•  Haiba muikatulela kufelisa libato

 Hamulaho wa kuba mwa libato ka nakonyana, muuna ni musali bakona kulemuha kuli banani tulemeno totushutana ni kuli batabela lika zeshutana kufita mone banahanela hane bakalisa libato. Ka mutala:

•   Yomuñwi utabela kuba kwa likamba; yomuñwi yena utabela kuzamaya-zamaya.

•   Yomuñwi unani silikani; yomuñwi yena ki mutu ya kuzize.

•   Yomuñwi hañata wapumanga; yomuñwi yena wasepahalanga kamita.

 Mulemuhe kuli miinelo yeo yashutana. Muinelo wapili uama kushutana kwa lika zebatabela; wabubeli uama kushutana kwa mikwa yebanani yona; muinelo wabulaalu uama kushutana kwa lika zebaanga kuli lilukile kamba halisika luka.

 Za kunahanisisa: Kwa miinelo yemilaalu yeo, ki ufi muinelo one uka mibela hahulu taata kuutiyela hane mukanyalana? Ki ufi kwa miinelo yeo, one mukatabela kueza licinceho ka za teñi kaufelaa mina?

 Muuna ni musali babanyalani bakona kutabela lika zeshutana kamba kuba ni mikwa yeshutana, kono basakona kuba ni tabo mwa linyalo. Mane, kuswanelana hakutalusi kuli muswanela kutabela lika zeswana kamba kuba ni mikwa yeswana. Mwa miinelo yemiñwi, muuna ni musali babanyalani bakona kuituta kutabela lika zatabela yomuñwi kamba mane kulikanyisa mikwa yeminde yanani yona yomuñwi. a

 Kono ki kwa butokwa hahulu kuli mutu yemubata kunyalana ni yena wamamela lika zeengiwa kuba zelukile ni zesika luka sina mina, ili litaba zemulumela mwa bulapeli bwamina ni likuka za muzamao zemulatelela. Haiba mutu yemuli ni yena mwa libato hamameli lika zeo, seo ki sisupo sesibonisa kuli muswanela kufelisa libato lamina.

 Ka mutala, munyakisise taba yeama kushutana kwa litaba zemulumela. Buka yebizwa Fighting for Your Marriage ibulela kuli: “Lipatisiso likuta-kutela kubonisa kuli muuna ni musali babanyalani ili babali mwa bulapeli bobushutana kukona kubabela hahulu bunolo kufelisa linyalo.”

 Sikuka sa mwa Bibele: “Musike mwalwala coko iliñwi ni babasa lumeli, ili coko yesalikaneleli.”—2 Makorinte 6:14.

 Bibele ibulela kuli babanyala kamba kunyalwa “bakautwa butuku ni kulila.” (1 Makorinte 7:28, Bibele ya The New English Bible) Kacwalo, musike mwakomoka haiba mukopana ni miinelo yecwalo ka nako ya cwale hamuli mwa libato.

 Kuba ni lifapahano zenyinyani hakutalusi kuli hamukoni kukondisa mwa libato lamina. Mwakona kuipuza kuli, kana hakubanga ni butata lubutatululanga ka kozo? Sibeli samina mukatokwa kutatululanga butata bomukopana ni bona ka kozo haiba munyalana.

 Sikuka sa mwa Bibele: “Mubonisane sishemo, mube ni mukekecima, inze muswalelana ka pilu kaufela.”—Maefese 4:32.

 Kono hape kufapahananga kamita, kukona kubonisa kuli sibeli samina hamuswanelani feela. Haiba kona muinelo omuli ku ona, neikaba hande kulemuha kuli hamuswanelani pili musika nyalana kale kufita kuyo lemuha taba yeo hase munyalani!

 Sisupo sa butokwa: Haiba mwakakanya mutu yemuli ni yena mwa libato kamba mane muikutwa kuli hamusika itukiseza kukena mwa linyalo, musike mwaicanganisa ni kuzwelapili kuba mwa libato leo!

 Sikuka sa mwa Bibele: “Yabutali ubona kozi mi waipata, kono babasina zibo bazwelapili cwalo mi hasamulaho bautwa butuku.”—Liproverbia 22:3.

 Kufelisa libato kwakona kumiutwisa butuku kwa pilu. Nihakulicwalo, haiba muzwelapili kukakanya ka za mutu yemuli ni yena mwa libato, neikaba hande kulifelisa.

 Muswanela kufelisa cwañi libato lamina? Musike mwafelisa libato lamina ka kuñolela feela mutu yemuli ni yena mwa libato kashango kamba kumulizeza feela luwaile konji haiba kunani libaka leliutwahala. Kono mukete nako ni sibaka sesi swanela kuli muikambote taba ya butokwa hahulu ye hamoho.

 Sikuka sa mwa Bibele: “Mubulelelane niti.”—Zakaria 8:16.

 Kana kufelisa libato kutalusa kuli mupalezwi kupeta mulelo wamina wa kubata kukena mwa linyalo? Batili. Muhupule kuli kuba mwa libato kuswanela kumitusa kueza katulo ya kunyalana ni mutu yo kamba kutokwa. Nihaikaba kuli libato lamina lafela, kunani lituto za butokwa zemukona kuituta kwa lika zemukopani ni zona mwa libato leo.

 Muipuze kuli: ‘Libato le, linilutileñi ka za moniinezi? Kana zenikopani ni zona mwa libato libonisa kuli kunani lika zeñwi zenitokwa kueza pili nisika itukiseza kale kukena mwa linyalo? Ki lika mañi zeniswanela kubelekela ku zona haiba niketa kuba mwa libato hape?’