Lipaki za Jehova bakopananga habeli mwa sunda kwa libaka zabona za kulapelela, zebizwa Mandu A Mubuso. Kuezahalangañi kwateñi, mi mukona kutusiwa cwañi haiba mufumaneha kwa mikopano yeo?

•  Kuezahalangañi kwa Ndu ya Mubuso?

•  Ki kabakalañi hamuswanela kuyo fumaneha kwateñi?

•  Zebabulela batu bomulikana ni bona

 Kwa Ndu ya Mubuso, batu bayo itutanga lituto za mwa Bibele zekona kubatusa mwa bupilo. Mikopano yeo ikona kumitusa:

•   kuituta niti ka za Mulimu.

•   kuutwisisa libaka lika zeezahala mwa lifasi kacenu haliezahala.

•   kuba mutu yomunde.

•    kufumana balikani babande.

 Kana mwaziba? Sibaka sebakopanelanga Lipaki za Jehova sibizwa kuli Ndu ya Mubuso bakeñisa kuli kwa sibaka seo kuambolwanga hahulu za Mubuso wa Mulimu.​—Mateu 6:​9, 10; 24:14; Luka 4:​43.

 Litaba zemukayo ituta lika mitusa. Likuka za mwa Bibele zenyakisiswanga kwa mikopano ya Lipaki za Jehova likamitusa ‘kuipumanela butali.’ (Liproverbia 4:5) Taba yeo italusa kuli Bibele yakona kumitusa kueza likatulo zende mwa bupilo. Hape yakona kumitusa kufumana likalabo kwa lipuzo zetuna zekataza batu, zecwale ka zelatelela:

•   Mulelo wa bupilo ki ufi?

•   Kana Mulimu ki yena yatahisa manyando elukopana ni ona?

•   Kuezahalangañi mutu hashwa?

 Mukoloko olatelela ubonisa feela litoho za litaba lisikai za mufuta wa lingambolo zefiwangwa kwa mikopano yaluna kwa mafelelezo a sunda:

•   Ki Kabakalañi Haluswanela Kuzamaiswa ki Bibele?

•   Mukona Kufumana Kai Tuso Mwa Linako za Ziyezi?

•   Zeuluezeza Mubuso wa Mulimu Cwale.

 “Mutu yenikena ni yena sikolo naafumanehile ku omuñwi wa mikopano yaluna. Naainzi ni lubasi lwaluna mi neluitusisa libuka zeswana. Hamulaho, anibulelela kuli naatabisizwe hahulu ki likalabo zene bafa batu ka nako ya lipuisano za lipuzo ni likalabo. Hape naabulezi kuli kwa keleke yabona hakuna lihatiso zeswana ni zaluna.”​—Brenda.

 Kana mwaziba? Hamutokwi kulifa sesiñwi kuli muine mwa Ndu ya Mubuso, mi hakubangi ni likoleko.

 Batu bomukayo fumana kwateñi bakayo misusueza hahulu. Bibele ibulela kuli libaka leliñwi Bakreste habaswanela kukopananga hamoho ki ‘kususuezana.’ (Maheberu 10:24, 25) Kuswalisana ni batu babalata Mulimu ni babakuteka batu babañwi ki nto yetabisa hahulu mwa lifasi le mokutezi batu babanani buitati.

 “Hamulaho wa kueza misebezi yemiñata, fokuñwi niikutwanga kukatala ni kutokwa tabo kwa mafelelezo a lizazi, kono batu bolukopananga ni bona kwa Ndu ya Mubuso banitusanga kuikutwa hande. Hanikutanga kwa ndu kuzwa kwa mikopano, nibanga ni tabo ni maata a kueza misebezi yemiñwi.”​—Elisa.

 Kana mwaziba? Kunani liputeho za Lipaki za Jehova zefitelela 120,000 mwa lifasi kaufela, ili zekopanela kwa libaka zefitelela 60,000. Ka avareji, silimo ni silimo kuyahiwanga Mandu A Mubuso abato eza 1,500 kuli kube ni makopanelo a batu babañata babazwelapili kuekezeha. a