Bibele ibulela kuli, “Jehova haana kutima nto ifi kamba ifi yende babazamaya ka busepahali.” (Samu 84:11) ‘Kuzamaya ka busepahali’ kutalusañi? Kutalusa kupila ka kulumelelana ni buitamo bone muezize ku Jehova hane muineezi ku yena. (Muekelesia 5:4, 5) Mukona kuzamaya cwañi ka busepahali hamulaho wa kukolobezwa?

Ze mwa taba ye

•  Muzwelepili kutiyela manyando

•  Muzwelepili kuhanyeza miliko

•  Muzwelepili kutukufalelwa

 Liñolo lelikona kutusa: “Lulukela kukena mwa Mubuso wa Mulimu ka manyando amañata.”—Likezo 14:22.

 Zelitalusa liñolo: Niti kikuli Bakreste kaufela bakakopana ni miinelo yetaata. Yemiñwi ya miinelo yetaata yemuka kopana ni yona kabakala kuli mu Bakreste, ki kusheununwa, kamba kulwaniswa. Hape mukakopana ni butata bwa kutokwa masheleñi kamba kukula, ili manyando ebakopana ni ona batu kaufela.

 Zemuswanela kuziba: Ka linako zeñwi, miinelo yamina mwa bupilo ikacinca mi fokuñwi mane ikacinca ka nzila yemusika libelela. Bibele ibulela kuli lika zemaswe zakona kuezahala ku mutu ufi kamba ufi ibe kuli ki Mukreste kamba haki Mukreste.—Muekelesia 9:11.

 Zemukona kueza: Bakeñisa kuli mwaziba kuli mukakopana ni miinelo yetaata, mwakona kuitukiseza cwale momuka talimanela ni yona. Muunge miinelo yetaata sina kolo ya kutiisa ka yona tumelo yamina mi muitinge hahulu ku Jehova. (Jakobo 1:2, 3) Haiba mueza cwalo, ni mina hasamulaho mukakona kubulela sina muapositola Paulusi yanaabulezi kuli: “Nifumana maata mwa lika kaufela ka yena yanifa maata.”—Mafilipi 4:13.

 Akalezo: Muitute ka za Josefa. Mwakona kubala za bupilo bwahae kwa Genese likauhanyo 37 ni 39 kuisa 41. Munyakisise litaba zelatelela: Ki miinelo mañi yetaata yanaakopani ni yona ka kusalibelela, mi naaitiyezi cwañi? Jehova naatusize cwañi Josefa?

 Kana musatokwa tuso?

•   Mubale litaba zelatelela:

   “How Can I Deal With Tragedy?”

   “How Resilient Am I?”

   “Mwakuezeza Miinelo Haicinca”

•   Muikungele taba ya Sikuwa yeli:

   “When a Parent is Sick”

 Liñolo lelikona kutusa: “Mutu ni mutu ulikiwa ka kuhohiwa ni kuhapiwa ki takazo yahae.”—Jakobo 1:14.

 Zelitalusa liñolo: Fokuñwi, kaufelaa luna lubanga ni litakazo zekona kutahisa kuli lueze lika zemaswe haiba lusa lihanyezi.

 Zemuswanela kuziba: Niha semukolobelizwe, mukabanga ni “litakazo za nama.” (2 Pitrosi 2:18) Mwakona kuba ni takazo ya kueza somano mane nihaiba musika kena kale mwa linyalo.

 Zemukona kueza: Muikatulele ka nako ya cwale musika likiwa kale—kuli hamuna kulumeleza litakazo zamina kumikukueza kueza likatulo zemaswe. Muhupule kuli Jesu naabulezi kuli: “Hakuna mutu yakona kusebeleza malena bababeli.” (Mateu 6:24) Mwakona kuiketela yakaba mulenaa mina. Haike muiketele Jehova. Kusina taba kuli mukona kuba ni takazo yetuna ya kueza lika zemaswe, mwakona kuiketela kusakukuezwa ki yona.—Magalata 5:16.

 Akalezo: Muzibe momueza hande ni momufokola. Muitame bulikani ni batu babaka mitusa kuba ni tulemeno totunde. Muambuke batu, libaka, ni miinelo yekona kutahisa kuli kumibele taata kueza zelukile.—Samu 26:4, 5.

 Kana musatokwa tuso?

•   Mubale litaba zelatelela:

   “How Can I Resist Temptation?”

   “How Can I Keep My Mind Off Sex?”

   “Mwa ku Tiyela Kukuezo ya Litaka za Mina”

   “Kana Muunga Lika Sina Mwaliingela Jehova?”

 Liñolo lelikona kutusa: ‘Musebeze cwalo ka taata . . . kuisa kwa mafelelezo, kuli musike mwaba ni buzwa.’—Maheberu 6:11, 12.

 Zelitalusa liñolo: Mutu yasaisi pilu kwa musebezi wahae ukona kukutela mwamulaho ka bunolo mi ukona kuba ni buzwa.

 Zemuswanela kuziba: Mwendi nemutabile hahulu hamulaho wa kukolobezwa mi nemunani mafulofulo. Nemulata hahulu Jehova. Kono hamulaho wa nako, kukona kumibela taata kuzwelapili kuutwa Jehova mwa lika kaufela, mi taba yeo yakona kumizwafisa luli.—Magalata 5:7.

 Zemukona kueza: Muzwelepili kueza zelukile nihaike kuli fokuñwi hamutabelangi kueza cwalo. (1 Makorinte 9:27) Ka nako yeswana musutelele hahulu ku Ndataa mina wa kwa lihalimu ka kufita fa kumuziba hande ni kuambolanga ni yena mwa tapelo kamita. Kutuha fo, mueze silikani ni batu babalata kusebeleza Jehova.

 Akalezo: Muhupule kuli Jehova umilata hahulu mi ubata kumitusa. Musike mwanahana kuli uminyemezi kabakala kuli hamuna tukufalelo ka nako ya cwale. Bibele ibulela kuli: “Ufa yakatezi maata mi ufa maata amatuna ku babasina maata.” (Isaya 40:29) Hamulaho wa nako, uka mitusa mi mukaba ni tukufalelo hape.

 Kana musatokwa tuso?

•   Mubale litaba zelatelela:

   “Babanca—Muzwelepili Kulwanela Kupiliswa Kwamina”

   “How Can I Make Worship of God Enjoyable?”

•   Mubuhe vidio yeli:

   Zebabulela Litaka Zamina—Bupilo Bobunde ka Kufitisisa

 Sisupo sa butokwa: Haiba muzwelapili kuzamaya ka busepahali, mukatabisa pilu ya Jehova! (Liproverbia 27:11) Ukataba hahulu kuli muikatulezi kuba kwa lineku lahae mi uka mifa zemutokwa kaufela kuli muhanyeze Satani.