Eni. Mulimu uisa hahulu pilu batanga bahae babakula. Bibele ibulela cwana ka za mutu yasebeleza Mulimu ka kusepahala: “Jehova uka mutiisa fa mumbeta wahae wa bukuli.” (Samu 41:3) Haiba mukula butuku bobusina kalafo, lika zetaalu zelatelela zakona kumitusa kuitiisa:

1.   Mulapele ku Mulimu kuli amituse kuitiisa. Mwakona kuba ni “kozo ya Mulimu yefita kutwisiso kaufela,” yekona kumitusa kusabilaela hahulu ni kumitusa kuitiisa.​—Mafilipi 4:6, 7.

2.   Mube ni mubonelo omunde. Bibele ibulela kuli: “Pilu yetabile ki mulyani omunde, kono pilu yelobehile ifeza mutu maata.” (Liproverbia 17:22) Mubange ni nako ya kueza lika zekona kumisehisa, ili nto yekamitusa kuitiisa niha mukopana ni butata mane ni kumitusa kuba ni buikangulo bobunde.

3.   Mutiise tumelo yamina ka za lika zekaezahala kwapili. Kuba ni sepo yende ya kwapili kwakona kumitusa kuba ni tabo niha mukula butuku bobusa foli. (Maroma 12:12) Bibele ipolofita za nako ili yeo “hakuna yayahile mwa naya yakali: ‘Nakula.’” (Isaya 33:24) Mulimu ukafelisa matuku kaufela ili ebapalezwi kufelisa batu kusina taba ni zwelopili yebaezize mwa litaba za sayansi. Ka mutala, Bibele isepisa kuli basupali bakakutela kwa bunca, haibulela kuli: “Nama ya mubili wahae ibe yenca kufita ya kwa bunca; akutelwe ki maata a mwa mazazi a bunca bwahae.”​—Jobo 33:25.

 Nihaike kuli baziba kuli Mulimu wakona kubatusa, Lipaki za Jehova hape bayanga kwa sipatela kuli bayo alafiwa kwa matuku abona asa foli. (Mareka 2:17) Nihakulicwalo, halubulelelangi batu milyani yebaswanela kuitusisa; kono luikutwa kuli mañi ni mañi uswanela kuikatulela mulyani wabata kuitusisa.