Batili, lifasi nikamuta halina kusinyiwa, kucisiwa mwa mulilo, kamba kuyoliswa. Bibele ibulela kuli Mulimu naabupile lifasi kuli liyahiwe ki batu kuya kuile.

•   “Babalukile bakaluwa lifasi, mi bakapila ku lona kuya kuile.”—Samu 37:29.

•   “[Mulimu] utomile lifasi fa mitomo yalona; halina kusutiswa mwa sibaka salona kuya kuile.”—Samu 104:5.

•   “Lifasi liina kuya kuile.”—Muekelesia 1:4.

•   “Yena yaezize lifasi, Mubupi walona yalitiisize, [naasika] libupa feela kusina mulelo, kono [naaliezize] kuli liyahiwe.”—Isaya 45:18.

 Mulimu haana kulumeleza batu kusinya lifasi ka kulisilafaza, ka ndwa, kamba ka nzila yeñwi. Kono “[ukasinya] babasinya lifasi.” (Sinulo 11:18) Ukaeza cwañi cwalo?

 Mulimu ukayolisa milonga ya batu, ili yepalezwi kusileleza lifasi, ka Mubuso wa kwa lihalimu. (Daniele 2:44; Mateu 6:9, 10) Mubuso wo ukabusiwa ki Mwanaa Mulimu, yena Jesu Kreste. (Isaya 9:6, 7) Jesu hanaali fa lifasi, naanani maata amatuna fahalimwaa pupo. (Mareka 4:35-41) Ka kuba Mulena wa Mubuso wa Mulimu, Jesu ukaba ni maata amatuna fahalimwaa lifasi ni ze mwateñi. Ukatahisa kuli miinelo mwa lifasi ibe yeminde hahulu sina feela mone iinezi mwa simu ya Edeni.—Mateu 19:28; Luka 23:43.

 Batili, haibuleli cwalo. Batu babanga ni mubonelo ofosahezi wo kabakala kusautwisisa zelitalusa liñolo la 2 Pitrosi 3:7, lelili: “Mahalimu ni lifasi zeliteñi cwale libulukezwi mulilo.” Halunyakisiseñi lisupo zepeli za butokwa zeka lutusa kuutwisisa taluso ya manzwi ao:

1.   Bibele haibulela za “mahalimu,” “lifasi,” ni “mulilo” haiami feela kwa nto iliñwi. Ka mutala, Genese 11:1 ili: “Lifasi kaufela lazwelapili kuba ni puo iliñwi.” Kwa liñolo le, linzwi la “lifasi” litalusa batu.

2.   Litaba zeñwi zeswalisana ni litaba ze kwa 2 Pitrosi 3:7 lilutusa kuziba taluso ya mahalimu, lifasi, ni mulilo zeitusisizwe kwa liñolo le. Litimana 5 ni 6 libulela za Muunda wa mwa mazazi a Nuwe. Ka nako yeo, lifasi nelisinyizwe, kono pulaneti yona neizwezipili kubateñi. Niteñi, Muunda neuyundisize batu ba mifilifili kamba “lifasi.” (Genese 6:11) Hape neuyundisize mufuta omuñwi wa “mahalimu,” bona batu bane babusa fahalimwaa lifasi. Kacwalo, batu babamaswe nebayundisizwe, isiñi pulaneti yaluna. Nuwe ni lubasi lwahae nebapunyuhile, lifasi hane liyundisizwe, mi hamulaho wa Muunda, bayaha mwa lifasi.—Genese 8:15-18.

 Ka kuswana ni mezi a Muunda, sinyeho kamba “mulilo,” obulezwi kwa 2 Pitrosi 3:7 ukayundisa lifasi la batu babamaswe, isiñi lifasi tenyene. Mulimu usepisa kuli kukaba ni “mahalimu amanca ni lifasi lelinca,” ili mo “kukaba kuluka.” (2 Pitrosi 3:13) “Lifasi lelinca,” kamba batu babalukile, bakabusiwa ki “mahalimu amanca,” kamba puso yenca, ona Mubuso wa Mulimu. Mubuso wo hauka busa Lifasi, lifasi likaba paradaisi mokukaba ni kozo.—Sinulo 21:1-4.