Mulimu haki yena yatahisa likozi za ka taho zesweli kuezahala kacenu, kono mane waiyakatwa batu babatahezwi ki likozi zeo. Mubuso wa Mulimu ukafelisa lika kaufela zetahiseza batu manyando kukopanyeleza cwalo ni likozi za ka taho. Ka nako ya cwale, Mulimu usweli kuomba-omba batu babatahezwi ki likozi za ka taho.—2 Makorinte 1:3.

•  Ki lika mañi zelukolwisa kuli likozi za ka taho haki koto yezwa ku Mulimu?

•  Kana likozi za ka taho ki sisupo sesibonisa kuli lupila mwa mazazi a mafelelezo?

•  Mulimu utusanga cwañi batu babatahezwi ki likozi za ka taho?

•  Kana Bibele yakona kulutusa kuitukiseza likozi za ka taho?

•  Litimana za mwa Bibele zekona kuomba-omba batu babatahezwi ki likozi za ka taho

 Mwa Bibele, Mulimu naaitusisize maata a lika zebupilwe kuli afe koto batu babamaswe. Nihakulicwalo, likozi za ka taho zeezahala kacenu zashutana ni mwaitusisezanga Mulimu maata a lika zebupilwe.

•   Likozi za ka taho za bulayanga ni kuholofaza batu, ibe kuli ki batu babamaswe kamba ki babande. Ka kushutana, Mulimu hanaaitusisize maata a lika zebupilwe kuli afe koto, neli batu feela babamaswe bane bayundisizwe. Ka mutala, Mulimu hanaayundisize mileneñi ya kale ya Sodoma ni Gomora, naapilisize muuna yomunde Lota ni bana bahae bababeli babasizana. (Genese 19:29, 30) Mulimu naatatubile lipilu za batu ba mwa miteñi yani mi naayundisize feela batu babamaswe.—Genese 18:23-32; 1 Samuele 16:7.

•   Hañata likozi za ka taho liezahalanga ka nako yelusika libelela. Ka kushutana, Mulimu yena naalemusanga batu babamaswe pili asika itusisa kale maata a lika zebupilwe kuli abafe koto. Batu bane bautwile ni kumamela litemuso zeo nebasika yundiswa kono nebapunyuhile likozi zeo.—Genese 7:1-5; Mateu 24:38, 39.

•   Lika zebasweli kueza batu litahisize likozi za ka taho mane ni kutahisa kuli likozi zeñwi litotobele hahulu. Ka mukwa ufi? Ka kusinya lika ze mwa lifasi ni kupila mwa libaka mokuezahalanga likozi zecwale ka lizikinyeho, miunda, ni mwa libaka mokubata hahulu kamba kucisa hahulu. (Sinulo 11:18) Haluswaneli kunyaza Mulimu kabakala lika zebaezanga batu zetahisanga likozi za ka taho.—Liproverbia 19:3.

 Eni, bupolofita bwa mwa Bibele bubonisa kuli mwa “nako ya kufela kwa lifasi,” kamba “mwa mazazi a mafelelezo” kukaba ni likozi za ka taho. (Mateu 24:3; 2 Timotea 3:1) Ka mutala, Jesu hanaabulela ka za nako yelupila ku yona, naaize: “Lico likataela mi kukaba ni lizikinyeho kuzwa mwa sibaka sesiñwi kuya ku sesiñwi.” (Mateu 24:7) Honacwale-cwale fa, Mulimu ukafelisa lika kaufela zetahisa kuli batu bautwe butuku ni zetahisa manyando, kukopanyeleza cwalo ni likozi za ka taho.—Sinulo 21:3, 4.

•   Mulimu uomba-ombanga batu babatahezwi ki likozi za ka taho ka kuitusisa Linzwi lahae, yona Bibele. Bibele ilukolwisa kuli Mulimu waluisa pilu ni kuli wautwanga bumaswe halukopana ni miinelo yetaata. (Isaya 63:9; 1 Pitrosi 5:6, 7) Hape ibulela ka za sepiso ya Mulimu ya kuli kukaba nako yekusike kwaba ni likozi za ka taho.—Mubone “ Litimana za mwa Bibele zekona kuomba-omba batu babatahezwi ki likozi za ka taho.”

•   Mulimu uitusisanga batanga bahae kuli batuse batu babatahezwi ki likozi za ka taho. Mulimu uitusisanga batanga bahae ba fa lifasi kuli balikanyise mutala wanaatomile Jesu. Nekupolofitilwe kuli Jesu naaka omba-omba “babalobehile lipilu” ni “babalila kaufela.” (Isaya 61:1, 2) Batanga ba Mulimu baezanga mobakonela kaufela kuli baeze nto yeswana.—Joani 13:15.

   Hape Mulimu uitusisanga batanga bahae kuli batuse batu babatahezwi ki likozi za ka taho ka kubafa lika za kuitusisa mwa bupilo.—Likezo 11:28-30; Magalata 6:10.

 Eni. Nihaike kuli Bibele haki buka yebulela ka za zelukona kueza kuli luitukiseze likozi za ka taho, inani likuka zekona kulutusa. Ka mutala:

•   Mulukiseleze cimo zemuka eza haiba kuba ni kozi ya ka taho. Bibele ibulela kuli: “Yabutali ubona kozi mi waipata.” (Liproverbia 22:3) Ki kwa butokwa kulukiseleza cimo zelukona kueza pili kozi isika ezahala kale. Kueza cwalo kukopanyeleza kulukiseleza cimo mukotana mokuinzi lika za butokwa ni sibaka komukayo kopanela ni lubasi lwamina haiba kuba ni kozi ya ka taho.

•   Muunge bupilo bwamina kuba bwa butokwa hahulu kufita maluwo amina. Bibele ibulela kuli: “Hakuna selutisize mwa lifasi, mi halukoni kulwala sesiñwi kuzwa ku lona.” (1 Timotea 6:7, 8) Lulukela kuba batu babaitukiselize kusiya mandu ni maluwo aluna kuli lupilise bupilo bwaluna hakuba ni kozi ya ka taho. Luswanela kuhupula kuli bupilo bwaluna ki bwa butokwa hahulu kufita lika lifi kamba lifi zeluluwile.—Mateu 6:25.