“Hakuna muliko omitahezi konji otahela batu kaufela. Kono Mulimu wasepahala, mi hana kumituhelela kuli mulikwe ki muliko omusa koni kutiyela, kono hamutahelwa ki muliko uka mifa ni nzila ya kuzwa ku ona ilikuli mukone kuutiyela.”—1 Makorinte 10:13, Bibele ya Toloko ya Lifasi Lelinca.

 “Hakuna muliko omitahezi konji otahela batu kaufela; kono Mulimu wasepahala, yena yasike amituhelela kuli mulikwe ki muliko omusa koni, kono hamutahelwa ki muliko uka mifa ni nzila ya kuzwa ku ona ilikuli mukone kuutiyela.”—1 Makorinte 10:13, Bibele ya New King James Version.

 Timana ye ibonisa kalemeno kanani kona Mulimu kakatahisa kuli lumulate, kona ka busepahali. Batanga ba Mulimu babasepahala bakona kuba ni buikolwiso bwa kuli Mulimu uka batusa, sihulu habatalimana ni miinelo yetaata.

 “Hakuna muliko omitahezi konji otahela batu kaufela.” Batanga ba Mulimu bakona kulikiwa kueza nto yesa mutabisi. Miliko yecwalo, nihaike kuli itaata, batu babañata batalimananga ni yona. a Kacwalo, batanga ba Mulimu bakona kuba ni buikolwiso bwa kuli ni bona bakona kutiyela miliko yecwalo.

 “Mulimu wasepahala.” Jehova b Mulimu wasepahala. Uzwezipili kutaleleza sepiso yahae ya kuli haana kuyubeka batu baba mulata, baba muutwa ni babazwelapili kusepahala ku yena. (Deuteronoma 7:9; Samu 9:10; 37:28) Kabakaleo, batu baba mulapela bakona kusepa kuli uka taleleza ni lisepiso zepeli ze mwa timana ye.

 “Hana kumituhelela kuli mulikwe ki muliko omusa koni kutiyela.” Mulimu ubonisanga kuli wasepahala ka kusa tuhelelanga miliko kuli ibe yetaata hahulu kuli mane mutu hakoni kuitiyela. Waziba lika zakona ni zasakoni kueza yomuñwi ni yomuñwi wa batanga bahae.—Samu 94:14.

 “Hamutahelwa ki muliko uka mifa ni nzila ya kuzwa ku ona ilikuli mukone kuutiyela.” Mulimu wakona kufelisa muliko kamba kufa batanga bahae lika zebatokwa kuli bautiyele. Ka mutala, wakona kubaetelela ka kuitusisa moya okenile, kubaomba-omba ka kuitusisa mañolo a mwa Bibele, kamba kuitusisa mizwale ni likaizeli kuli babatuse.—Joani 14:26; 2 Makorinte 1:3, 4; Makolose 4:11.

 Timana ye ifumaneha mwa liñolo lanaañozi muapositola Paulusi kwa Bakreste ba mwa puteho ya kwa Korinte. Mwa liñolo le, Paulusi naaitusisize zeneezahezi kwa Maisilaele kuli alute Makorinte zene basaswaneli kueza. (1 Makorinte 10:11) Paulusi naabulezi za miliko yene batalimani ni yona Maisilaele, kukopanyeleza cwalo ni kulapela milimu ya maswaniso ni muzamao wa buhule. (1 Makorinte 10:6-10) Babañwi ku bona nebapalezwi kutula miliko yeo. Ka kuitusisa mutala wabona, Paulusi uhupulisa Bakreste kuli habaswaneli kuisepa hahulu, ka kunahana kuli habana kukena mwa muliko. (1 Makorinte 10:12) Nihakulicwalo, uzwelapili kubatusa kusepa manzwi a kwa 1 Makorinte 10:13. Batanga ba Mulimu babasepahala bakona kutiyela muliko ufi kamba ufi.

 Mubuhe vidio yekuswani ye kuli mubone molitaluselizwe ka bukuswani liñolo la 1 Makorinte.