“Kono babasepile Jehova bakakutelwa ki maata. Bakafufa kuya mwahalimu sina limbande. Bakamata kono habana kufelelwa ki maata; bakazamaya kono habana kukatala.”—Isaya 40:31, Bibele ya Toloko ya Lifasi Lelinca.

 “Kono babalibelela ku MULENA bakauncafaza maata abona: Bakafufela mwahalimu sina limbande, bakamata kono habana kukatala, bakazamaya kono habana kuwelela.”—Isaya 40:31, Bibele ya New King James Version.

 Jehova a Mulimu ukolwisa batu baba mulapela kuli uka bafa maata aka bakonisa kutula kamba kutiyela butata bufi kamba bufi bobakopana ni bona.

 “Babasepile Jehova bakakutelwa ki maata.” Batu babasepile kuli Mulimu wakona kubatusa mi walata kueza cwalo bakona kuba ni buikolwiso bwa kuli uka batusa. (Liproverbia 3:5, 6) Nzila yeñwi yakona kubafa maata ka yona Mulimu ki ka kuitusisa moya wahae okenile kamba maata asebeza.—Luka 11:13.

 “Bakafufa kuya mwahalimu sina limbande.” Manzwi a abonisa mo maata a Mulimu akona kutuseza mutu. Mbande iitingile fa moya ofutumala osweli kuya mwahalimu kuli ikone kufufa mwahalimu ni kuzwelapili kuba mwa mbyumbyulu. Mbande hase ifumani sibaka fokunani moya ofutumala wo, iyandululanga mafufa ayona ni kufufa inze ipotoloha fa sibaka seo, mi moya wo uishimbanga kuya mwahalimu kufitela ilenda hahulu. Kufufa kuzwa fa sibaka fokunani moya ofutumala kushimbulukela ku sesiñwi kutusanga limbande kuzwelapili kuba mwa mbyumbyulu ka nako yetelele mane ni kufufela kwa sibaka sesiñwi kusina kukatala hahulu.

 “Bakamata kono habana kufelelwa ki maata.” Miinelo yetaata yelukopana ni yona mwa bupilo yakona kulufokolisa kwa mubili mane ni kulukatalisa mwa munahano, kono lwakona kuzwelapili kuitiisa ka maata alufa Mulimu. Maata ao akona kulutusa kueza lika zelukile kusina taba ni miinelo yetaata yelukopana ni yona. Muapositola Paulusi yanaatiyezi miinelo yetaata luli, naañozi kuli: “Nifumana maata mwa lika kaufela ka yena yanifa maata.”—Mafilipi 4:13.

 Mulimu naasusumelize mupolofita Isaya kuñola manzwi a, mwa lilimo za ma 700 B.C.E. Nihaike kuli manzwi a, atusa batanga ba Mulimu kaufela babasepahala, kubonahala kuli Jehova naabata kuli manzwi a asusueze Majuda bane bakaiswa mwa buhapiwa kwa Babilona ka lilimo ze 70. Majuda hane bakutezi kwa naha yahabo bona kuzwa mwa buhapiwa, nebaiponezi manzwi a Mulimu hatalelezwa. (Isaya 40:1-3) Mulimu naabafile maata a kuzamaya musipili omutelele otaata b kuzwa kwa Babilona kuya kwa Jerusalema ka 537 B.C.E.—Isaya 40:29.