LITIMANA ZA MWA BIBELE ZETALUSIZWE

Isaya 42:8—“Ki na MULENA”

MUBAPALE

“Ki na Jehova. Ki lona libizo laka; hanifi kanya yaka ku yomuñwi, mi hanifi milumbeko yaka kwa maswaniso a kupanga.”—Isaya 42:8, Bibele ya Toloko ya Lifasi Lelinca.

“Ki na MULENA: ki lona libizo la ka: hanina kufa yomuñwi kanya yaka, kamba kufa maswaniso abetilwe zenilumbwa ka zona.”—Isaya 42:8, Bibele ya King James Version.

Taluso ya liñolo la Isaya 42:8

Mulimu ulutaluselize libizo lahae mi uekeza kubulela kuli halukoni kumulapela ni kulapela maswaniso.

Mulimu uipeile libizo le, lelitolokilwe kuli “Jehova” mwa Silozi. a (Exoda 3:14, 15) Nihaike kuli libizo la Mulimu lifumaneha ibato ba ha 7,000 mwa Testamente Yakale (Mañolo A Siheberu ni A Siarami), mwa Libibele zeñata, libizo leo liyolisizwe ka lilumbatina la “MULENA” (leliñozwi mwa litaku zetuna). Mutala obonisa cwalo ki taba ye kwa liñolo la Samu 110:1, ili yepolofita ka za Jehova ni Jesu. Mwa Bibele ya King James Version, kuñozwi kuli: “MULENA [Jehova] naaize ku Mulenaaka [Jesu].” (Likezo 2:34-36) Mwa Bibele ya Toloko ya Lifasi Lelinca, taba yeo itolokilwe ka nzila yesalyanganisi, ili kutaluhanya hande “Malena” bababeli bao ka kubeya libizo la Mulimu foliswanela mwa liñolo leo. Ibulela kuli: “Jehova naaize ku Mulenaaka: ‘Ina kwa lizoho laka la bulyo kufitela nibeya lila zahao sina sipula foahata mahutu ahao.’”

Licaziba babañata ba litaba za mwa Bibele balumela kuli libizo la Mulimu litalusa kuli “Utahisa Kubateñi.” Libizo le litalusa feela Mulimu wa niti, kakuli ki yena feela yakona kuba nto ifi kamba ifi kamba kutahisa kuli pupo yahae ibe nto ifi kamba ifi yetokwahala kuli ataleleze mulelo wahae.

Jehova waswanela kulapelwa feela anosi kakuli ki yena Mubupi waluna ni Mulimu anosi wa niti. Haluswaneli kulapela mutu ufi kamba ufi kamba nto ifi kamba ifi, kukopanyeleza cwalo ni milimu ya maswaniso.—Exoda 20:2-6; 34:14; 1 Joani 5:21.

Litaba zeñwi zeswalisana ni litaba ze kwa Isaya 42:8

Mwa litimana zapili za liñolo la Isaya kauhanyo 42, Jehova naapolofitile musebezi wanaaka eza ‘yaketilwe.’ Mulimu naabulezi kuli mutangaa hae yamutabisa yo “ukatisa katulo yelukile kwa macaba.” (Isaya 42:1) Mulimu naabulezi cwana ka za sepiso yeo: “Cwale nizibahaza lika zenca. Nimizibisa zona lisika ezahala kale.” (Isaya 42:9) Bupolofita bo, bobubulela za ‘yaketilwe’ nebutalelelizwe, hamulaho wa lilimo zeñata kuzwa fo, Mesia, kamba Kreste, hanaatile fa lifasi ni kupeta bukombwa bwahae.—Mateu 3:16, 17; 12:15-21.

Molitolokezwi liñolo la Isaya 42:8 mwa Libibele zeñwi

“Ki na Jehova, ki lona libizo laka; mi hanifi kanya yaka ku yomuñwi, kamba milumbeko yaka kwa maswaniso a kubeta.”—The ‘Holy Scriptures,’ by J. N. Darby

“Ki na Jehova; ki lona libizo Laka; mi hanina kufa kanya Yaka ku yomuñwi, kamba milumbeko Yaka kwa maswaniso a kubeta.”—A Literal Translation of the Bible.

a Mwa Siheberu, libizo la Mulimu liñozwi ka litaku zetuna zesina mwana, ili zeñolwanga sina YHWH mwa Sikuwa. Libizo leo litolokilwe sina “Yahweh” mwa litoloko zeñwi za Sikuwa. Kuli muzibe litaba zeñata, mubone taba yeli, “Libizo la Mulimu Mwa Mañolo A Siheberu” yefumaneha mwa Litaba Zeekelizwe A4 mwa Bibele ya Toloko ya Lifasi Lelinca.