LITIMANA ZA MWA BIBELE ZETALUSIZWE

Jeremia 29:11—“Niziba Seni Milelezi, Senihupuzi ka Mina”

MUBAPALE

“‘Niziba hande mihupulo yeni minahanela,’ kubulela Jehova a, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo.’”—Jeremia 29:11, Bibele ya Toloko ya Lifasi Lelinca.

“‘Niziba seni milelezi, senihupuzi ka mina,’ kubulela MULENA, ‘milelo ya kumitusa kukondisa, isi ya bumaswe, kuli kwapili nimife zenisepisize.’”—Jeremia 29:11, Bibele ya New International Version.

Taluso ya Liñolo la Jeremia 29:11

Jehova Mulimu usepisize balapeli bahae kuli ubata kubafa kozo ni bupilo bobunde kwapili. Nihaike kuli manzwi ao naañolezwi batu ba mwa linako za kwamulaho, abonisa mihupulo yanani yona Mulimu. Jehova ki “Mulimu yafa sepo.” (Maroma 15:13) Mane naaboni teñi kuli lisepiso zecwalo zañolwa mwa Bibele ilikuli “lukone kuba ni sepo” ya kupila bupilo bobunde kwapili.—Maroma 15:4.

Litaba zeñwi zeswalisana ni litaba ze kwa Jeremia 29:11

Manzwi ao, afumaneha mwa liñolo lene lilumezwi Maisilaele bane bali mwa Babilona, ili bane baisizwe mwa buhapiwa kuzwa mwa Jerusalema. b (Jeremia 29:1) Mulimu naabulelezi bahapiwa bao kuli nebakaba mwa buhapiwa ka nako yetelele mi nebaswanela kuyaha mandu, kulima masimu, ni kuba ni mabasi. (Jeremia 29:4-9) Niteñi, Mulimu naaekelize kubulela kuli: “Lilimo ze 70 hase likwanile munze muli mwa Babilona, nikasikuluhela ku mina, mi nikataleleza sepiso yaka ka kumikutiseza mwa [Jerusalema].” (Jeremia 29:10) Mulimu naasepisize kuli naasike abalibala mi nebaka kutela kwa naha yahabo bona.—Jeremia 31:16, 17.

Mulimu naatalelelize sepiso yahae kwa Maisilaele. Sina feela mone kupolofitezwi, Mulena Sirusi wa Peresia naatuzi muleneñi wa Babilona. (Isaya 45:1, 2; Jeremia 51:30-32) Hasamulaho, Sirusi alumeleza Majuda kukutela kwa naha yahabo bona. Bakutela kwa Jerusalema hamulaho wa kuba mwa buhapiwa ka lilimo ze 70.—2 Makolonika 36:20-23; Ezira 3:1.

Kutalelezwa kwa sepiso ye kwa Jeremia 29:11 kufa sepo batu babanani tumelo mwa lisepiso za Mulimu kacenu. Lisepiso zeo likopanyeleza kozo yebaka ikola batu mwa lifasi kaufela muta Mubuso wa Mulimu ukabusa lifasi ka Kreste Jesu.—Samu 37:10, 11, 29; Isaya 55:11; Mateu 6:10.

Mibonelo yefosahezi ka za Jeremia 29:11

Mubonelo ofosahezi: Mulimu ulelezi cimo zekaezahala ku mañi ni mañi.

Niti ya taba: Mulimu ufile batu tukuluho ya kuiketela za kueza. Naañolezi sikwata sa Maisilaele bane bali mwa Babilona manzwi a kwa Jeremia 29:11, mi naahupulela sikwata seo kupila bupilo bobunde bwa kozo kwapili. (Jeremia 29:4) Niteñi, Mulimu naafile mañi ni mañi kolo ya kuiketela kueza lika zeneka tahisa kuli atusiwe ki sepiso yahae kamba kutokwa. (Deuteronoma 30:19, 20; Jeremia 29:32) Bane baiketezi kubata Mulimu nebaezize cwalo ka kulapela ku yena ka pilu yabona kaufela.—Jeremia 29:12, 13.

Mubonelo ofosahezi: Mulimu ukatusa balapeli bahae kukondisa ka kubafa sifumu.

Niti ya taba: Linzwi la “kukondisa” leliitusisizwe kwa Jeremia 29:11 mwa Libibele zeñwi, litolokilwe fa linzwi la Siheberu lelitalusa “kozo, buikangulo bobunde bwa kwa mubili, ni kupila hande.” Ka kuya ka litaba zeñwi zeswalisana ni liñolo le, Mulimu naasepisize kufa Maisilaele bane bali mwa buhapiwa kozo ni kupila bupilo bobunde isiñi sifumu. Nebaka zwelapili ni bupilo bwabona bwa ka zazi ni zazi mi hasamulaho nebaka kutela kwa Jerusalema.—Jeremia 29:4-10.

Mubale Jeremia kauhanyo 29 hamoho ni litaluso ze kwatasi, mi mubone ni mañolo abonisizwe fa litaku zelibisa kwa mañolo amañwi.

a Jehova ki lona libizo la Mulimu.—Samu 83:18.

b Hatiso ya The Expositor’s Bible Commentary ibulela cwana ka za liñolo la Jeremia 29:11: “Mwa Bibele, hakuna sepiso yende hahulu yefita sepiso yebonisizwe kwa liñolo le, yebonisa mukekecima ni lilato lanani lona Yahweh [Jehova] kwa bahapiwa ba ni kubatusa kuba ni sepo ya kuli lika nelikaba hande kwapili mi nebaka kutela kwa naha yahabo bona.”—Volyumu 7, likepe 360.