LITIMANA ZA MWA BIBELE ZETALUSIZWE
Joani 14:27—“Nimisiyela Kozo”
“Nimisiyela kozo; nimifa kozo yaka. Hani mifi yona ka moli mifela yona lifasi. Musike mwatuhelela lipilu zamina kuziyeleha kamba kulituhelela kukenelwa ki sabo.”—Joani 14:27, Bibele ya Toloko ya Lifasi Lelinca.
“Nimisiyela kozo; nimifa kozo yaka; hani mifi yona ka mukwa wa lifasi. Pilu yamina isike yaziyeleha, mi isike yasaba”—Joani 14:27, Bibele ya American Standard Version.
Taluso ya Liñolo la Joani 14:27
Jesu naaitusisize manzwi ao kukolwisa baapositola bahae kuli nebasa tokwi kubilaela hahulu hane bakakopana ni manyando. Sina yena, ni bona nebakona kuba ni kozo ya mwa munahano ka tuso ya Mulimu.
Ki kozo yecwañi yanaasiile Jesu, kamba yanaafile baapositola bahae? Jesu naabafile kozo yahae, ili kozo yanaabile ni yona. Kozo yeo haitalusi kusaba ni mifilifili kamba ñalelwa. (Joani 15:20; 16:33) Nihaike kuli Jesu naaezizwe maswe mi naabulailwe hasamulaho, naanani kozo ya mwa munahano. (Luka 23:27, 28, 32-34; 1 Pitrosi 2:23) Naabile ni kozo ya mwa munahano kakuli naaziba kuli Ndatahe, yena Jehova, naamulata mi zanaaeza neli mutabisa. a—Mateu 3:16, 17.
Jesu naafile baapositola bahae kozo ka kubataluseza kuli yena ni Ndatahe neba balata mi zene baeza neli batabisa. (Joani 14:23; 15:9, 10; Maroma 5:1) Kozo yeo, yenetomile fa tumelo yabona ku Jesu sina Mwanaa Mulimu, nei batusize kusaikalelwa hahulu ni kusabilaela hahulu. (Joani 14:1) Nihaike kuli Jesu naasike azwelapili kuba hamoho ni bona fa lifasi, naabasepisize kuli moya wa Mulimu okenile neuka batusa kuba ni bundume ni kozo ya mwa munahano. (Joani 14:25-27) Balateleli ba Jesu nebaka tiyela miinelo yetaata ka bundume, ka kuziba kuli zene baeza nelitabisa Jehova mi naabatusa.—Maheberu 13:6.
Jesu hanaali fa lifasi, batu nebalakalezanga babañwi kozo haba balumelisa. (Mateu 10:12, 13) Niteñi, Jesu naasika lakaleza feela baapositola bahae kozo; naabafile kozo. Kutuha fo, kozo yanaa bafile Jesu yashutana ni kozo ifi kamba ifi yebakona kufumana batu mwa lifasi b. Mwa lifasi, batu bakona kuba ni kozo yelikani habaswalisana hande ni babañwi, kuba ni sifumu, libubo, kamba situlo. Kono kozo yafa Jesu haisika itinga fa miinelo yebali ku yona batu. Ki kozo ya mwahali yeina nako yetelele.
Litaba zeñwi zeswalisana ni litaba ze kwa Joani 14:27
Jesu naabulezi manzwi ao kwa baapositola bahae bane basepahala, fa busihu bwahae bwa mafelelezo pili asika bulaiwa kale. Fa busihu bo, naababulelezi kuli naatuha abasiya. (Joani 13:33, 36) Baapositola bahae nebaikutwile hahulu bumaswe kabakala taba yeo. (Joani 16:6) Kacwalo, Jesu naabaomba-ombile ni kubataluseza libaka hane basaswaneli kubilaela ka za zeneka ezahala hanaaka basiya.
Manzwi a Jesu akona kususueza Bakreste ni kacenu. Ni luna lwakona kuba ni kozo. (2 Matesalonika 3:16) Haluba balutiwa ba Jesu, lufita fa kuziba kuli yena ni Ndatahe, Jehova, balulata mi lika zelueza zabatabisa. (Makolose 3:15; 1 Joani 4:16) Kabakaleo, halutokwi kubilaela hahulu. Libaka? Bakeñisa kuli Mulimu u kwa lineku laluna.—Samu 118:6; Mafilipi 4:6, 7; 2 Pitrosi 1:2.
Mubuhe vidio yekuswani ye kuli muzibe litaba zeñwi ka za buka ya Joani.
a Jehova ki lona libizo la Mulimu. (Samu 83:18) Mubone taba yeli, “Jehova ki Mañi?”
b Mwa Bibele, linzwi la “lifasi” likona kutalusa batu babaikauhanyize ku Mulimu.
Hape Mwendi Mwakona Kutabela Litaba Ze
JESU KI YENA NZILA, NITI, NI BUPILO
Jesu ki Yena Nzila, Niti, ni Bupilo
Jesu uluta tuto ya butokwa yeama mwa kuatumelela Mulimu.
LITUTO ZA BUTOKWA ZA MWA BIBELE
Ki Kabakalañi Jesu Hanaashwile?
Mwendi muutwile kuli Jesu naashwezi libi zaluna. Kono kana lifu la mutu alimuñwi lakona kutusa batu babañata-ñata?
LITIMANA ZA MWA BIBELE ZETALUSIZWE
Mafilipi 4:6, 7 Italusizwe—“Musike Mwabilaezwa ki Sesiñwi”
Ki litapelo zecwañi zekona kutusa batanga ba Mulimu kufelisa lipilaelo ni kubatusa kuba ni kozo ya mwa munahano?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
