“Nimibulelezi lika ze kuli ka na, mube ni kozo. Mwa lifasi mukaba ni ñalelwa, kono mutiye lipilu! Nituzi lifasi.”—Joani 16:33, Bibele ya Toloko ya Lifasi Lelinca.

 “Nimibulelezi zeo kuli mube ni kozo ku na. Mukaba ni manyando mwa lifasi; kono mutiye lipilu, nituzi lifasi.”—Joani 16:33, Bibele ya New King James Version.

 Jesu naabulezi manzwi ao kuli atuse balateleli bahae kuba ni buikolwiso bwa kuli bakona kutabisa Mulimu kusina taba ni kukopana ni miliko kamba twaniso.

 “Nimibulelezi lika ze kuli ka na, a mube ni kozo.” Manzwi a mafelelezo mwa timana ye abonisa kuli kuba ni kozo hakutalusi kupila kusina mifilifili. Kono kozo yetaluswa ki kozo ya mwa munahano. Kozo yeo ikonahala “ka” Jesu, yena yanaasepisize kuluma moya okenile. “Mutusi,” ona moya okenile omaata, neuka konisa balutiwa ba Jesu kutiyela muinelo otaata ufi kamba ufi one bakakopana ni ona.—Joani 14:16, 26, 27.

 “Mwa lifasi mukaba ni ñalelwa, kono mutiye lipilu!” Jesu naabulelezi balutiwa bahae ngambu kuli nebaka kopana ni miinelo yetaata, inge cwalo kusaezwa hande ni kunyandiswa. (Mateu 24:9; 2 Timotea 3:12) Nihakulicwalo, nebaswanela ‘kutiya lipilu’ kamba ‘kusazwafa.’—Joani 16:33, Bibele ya New International Version.

 “Nituzi lifasi.” Linzwi la “lifasi” leliitusisizwe mwa timana ye, litalusa batu babasika luka, ili babaikauhanyize ku Mulimu. b Liñolo la 1 Joani 5:19, lili: “Lifasi kaufela li mwa maata a yamaswe,” kamba maata a Satani. Kacwalo, batu mwa “lifasi” le, banahana ni kueza lika ka nzila yesatabisi Mulimu.—1 Joani 2:15-17.

 Satani ni batu ba mwa lifasi lahae nebalikile kupaleliswa Jesu kueza tato ya Mulimu, mi tato yeo neikopanyeleza ni musebezi wanaaezize Jesu wa kuluta batu babañwi ka za Mulimu ni kufana bupilo bwahae bobupetehile sina tiululo. (Mateu 20:28; Luka 4:13; Joani 18:37) Kono Jesu naasika tuhelela lifasi kukukueza mihupulo yahae ni kutahisa kuli afulalele Mulimu. Naazwezipili kusepahala kuisa lifu. Kacwalo, Jesu naakona kubulela kuli utuzi lifasi ni kuli Satani, yena “mubusi wa lifasi,” ‘naasakoni kumuswala.’—Joani 14:30.

 Jesu naaitusisize mutala wahae kubonisa balateleli bahae kuli ni bona nebakona kuzwelapili kusepahala ku Mulimu, busepahali bwabona hane bukalikiwa. Ka mubulelelo omuñwi, Jesu naatalusa kuli: “Haiba nakona kutula lifasi, uzibe ni mina mwakona kueza cwalo.”

 Jesu naabulezi manzwi a fa busihu bwahae bwa mafelelezo pili asika bulaiwa kale. Bakeñisa kuli naaziba kuli naatuha ashwa, naaitusisize kolo yeo kufa baapositola bahae bane basepahala kelezo lwa mafelelezo. Naabataluselize litaba za butokwa zene batokwa kunahanisisa ze: Nebasike bamubona, mi nebaka nyandisiwa, mane nihaiba kubulaiwa. (Joani 15:20; 16:2, 10) Bakeñisa kuli baapositola nebaka ikalelwa hahulu kabakala taba yeo, Jesu afeza ka kubulela manzwi a kwa Joani 16:33 kuli abatiise ni kubaomba-omba.

 Ka mukwa oswana, balateleli ba Jesu kacenu, bakona kususuezwa ki manzwi ahae ni mutala wahae. Bakreste kaufela bakona kuzwelapili kusepahala ku Mulimu kusina taba ni miliko.