LITIMANA ZA MWA BIBELE ZETALUSIZWE

Joani 3:16—“Kakuli Mulimu Naalatile Hahulu Lifasi”

MUBAPALE

“Kakuli Mulimu naalatile hahulu lifasi kuli mane naafile Mwanaa hae wa libanda, kuli mutu kaufela yabonisa tumelo ku yena asike atimezwa kono abe ni bupilo bobusa feli.”—Joani 3:16, Bibele ya Toloko ya Lifasi Lelinca.

“Kakuli Mulimu ulatile lifasi hahulu, mane ufile Mwanaa hae wa libanda, kuli mutu ufi kamba ufi yalumela ku yena asike ashwa, kono abe ni bupilo bobusa feli.”—Joani 3:16, Bibele ya King James Version.

Taluso ya Liñolo la Joani 3:16

Mulimu walulata mi ubata kuli lupile kuya kuile. Kabakaleo, naalumile Mwanaa hae, Jesu Kreste, fa lifasi. Jesu hanaali fa lifasi, naaezize lika zeñata. Ka mutala, naalutile balateleli bahae ka za Mulimu wahae ni Ndatahe. (1 Pitrosi 1:3) Hape naafanile bupilo bwahae kuli aliulule batu. Kuli lube ni bupilo bobusa feli, lutokwa kuba ni tumelo ku Jesu.

Lwaiponela lilato lelituna lanani lona Mulimu mwa manzwi a, aali: “Naafile Mwanaa hae wa libanda.” a Jesu ki Mwanaa Mulimu yaipitezi. Ka mukwa ufi? Jesu ki yena feela yabupilwe ki Mulimu anosi. (Makolose 1:17) Ki yena “mweli wa pupo kaufela.” (Makolose 1:15) Lika zeñwi kaufela zebupilwe, kukopanyeleza cwalo ni mangeloi, libile teñi ka Jesu. Nihakulicwalo, Jehova b Mulimu naaitatezi kuluma Mwanaa hae yalatwa kuli “asebeleze ni kufa bupilo bwahae sina tiululo kuli aliulule babañata.” (Mateu 20:28) Jesu naanyandisizwe ni kubulaiwa ilikuli aluliulule kwa sibi ni lifu zeluhozize ku mutu wapili, yena Adama.—Maroma 5:8, 12.

Kubonisa tumelo ku Jesu hakutalusi feela kulumela ku yena kamba kuziba zaluezelize. Luswanela kubonisa kuli lunani tumelo ku Mwanaa Mulimu ka kumuutwa ni kumulikanyisa. (Mateu 7:24-27; 1 Pitrosi 2:21) Bibele ibulela kuli: “Yabonisa tumelo ku Mwana uba ni bupilo bobusa feli; yasautwi Mwana hana kubona bupilo.”—Joani 3:36.

Litaba zeñwi zeswalisana ni litaba ze kwa Joani 3:16

Jesu naabulezi manzwi ao hanaanzaa ambola ni mueteleli wa bulapeli bwa Sijuda yabizwa Nekudema. (Joani 3:1, 2) Mwa ngambolo yeo, Jesu naapatuluzi litaba ka za Mubuso wa Mulimu c ni za ‘kupepwa sinca.’ (Joani 3:3) Hape naapolofitile ka za mwanaaka shwela. Naabulezi kuli: “Mwanaa mutu, . . . ulukela kupahekwa [fa kota ya linyando], kuli mutu kaufela yalumela ku yena abe ni bupilo bobusa feli.” (Joani 3:14, 15) Mi cwale kihona akoñomeka sisupo sa kuli batu bakafumana bupilo kabakala lilato lelituna lanani lona Mulimu kwa batu. Jesu naafelize ka kubulela kuli lutokwa kubonisa tumelo ni kueza lika zetabisa Mulimu kuli lufumane bupilo.—Joani 3:17-21.

a Linzwi la Sigerike la monogenes lelitolokilwe kuli “libanda,” litalusa “inosi, . . . yeshutana ni zeñwi kaufela, kamba yeipitezi.—Hatiso yebizwa A Greek-English Lexicon of the New Testament and Other Early Christian Literature, like. 658.

b Jehova ki lona libizo la Mulimu.—Samu 83:18.

c Mubuso wa Mulimu, hape obizwa kuli “Mubuso wa mahalimu,” ki mubuso wa kwa lihalimu. (Mateu 10:7; Sinulo 11:15) Mulimu uketile Kreste kuba yena Mulena wa Mubuso wo. Mubuso wa Mulimu ukapeta mulelo wa Mulimu ka za lifasi. (Daniele 2:44; Mateu 6:10) Kuli muzibe litaba zeñata, mubone taba yeli, “Mubuso wa Mulimu ki Nto Mañi?”