LITIMANA ZA MWA BIBELE ZETALUSIZWE
Joshua 1:9—“Utiye mi Ube ni Bundume”
“Kikuli hanisika kulaela? Ube ni bundume mi utiye. Usike wakenelwa ki sabo kamba luwewe, kakuli Jehova Mulimu wahao uinzi ni wena kouya kaufela.”—Joshua 1:9, Bibele ya Toloko ya Lifasi Lelinca.
“Hanili, ki na ya kulaezi? Utiye mi ube ni bundume. Usike wasaba; usike wazwafa, kakuli MULENA Mulimu wahao ukaba ni wena kai ni kai koukaya.”—Joshua 1:9, Bibele ya New International Version.
Taluso ya Liñolo la Joshua 1:9
Ka kubulela manzwi a, Jehova a Mulimu naakolwisa mutangaa hae yasepahala Joshua kuli naakona ‘kuba ni bundume mi naakatiya’ kusina taba ni miinelo yetaata yanaaka kopana ni yona ni miinelo yemiñwi yenekona kumuzwafisa. Joshua naasatokwi kuikalelwa zeneka ezahala kwapili ibile feela naamamela milao ya Mulimu kakuli nekuka swana feela inge kuli Jehova uinzi ni yena inze amutusa kuli akondise. Mulimu naainzi ni Joshua ka kumuetelela ni kumutusa kutula lila zahae.
Ki lika mañi zeneka tusa Joshua kuba ni ‘bundume ni kutiya’? Naakaba ni bundume ni kuba ni maata hanaaka bala litaba zeneñozwi ka kususumezwa ki moya okenile zanaalukisize Jehova ka nako yeo. Litaba zeo nelikopanyeleza ‘Mulao kaufela wanaalaezi Mushe mutangaa [Jehova] [ku Joshua].’ b (Joshua 1:7) Jehova naabulelezi Joshua ‘kubala ni kunahanisisa ze mwateñi [“kuuyeya,” Bibele ya Bibele ya New International Version], musihali ni busihu.’ (Joshua 1:8) Kubala Mulao wo ni kuunahanisisa nekutusize Joshua kuikatulela kueza tato ya Mulimu. Kacwalo, Joshua naatokwa kusebelisa zanaaitutile mwa Linzwi la Mulimu, kuli ‘amamele ka tokomelo zeneñozwi mwateñi kaufela.’ Hanaaka eza cwalo, naakaeza likatulo zende mi naakakondisa. Mi nekubile cwalo luli. Nihaike kuli naakopani ni miinelo yetaata, Joshua naasebelelize Jehova ka busepahali inzaa nani tabo yetuna.—Joshua 23:14; 24:15.
Manzwi a Jehova anaabulelezi Joshua akona kulutusa ni luna kacenu. Abonisa kuli Jehova waisa pilu batanga bahae kaufela, sihulu habakopana ni miinelo yetaata. Ubata kuli bakondise, sina feela Joshua! Mi sina Joshua, bakona ‘kuba ni bundume ni kutiya’ ka kubala ni kunahanisisa Linzwi la Mulimu kamita, yona Bibele, ni kusebelisa ketelelo yefumaneha mwateñi.
Litaba zeñwi zeswalisana ni litaba ze kwa Joshua 1:9
Hamulaho wa lifu la Mushe, Jehova aketa Joshua kuli aetelele sicaba sa Isilaele. (Joshua 1:1, 2) Ka nako yeo, Maisilaele nebaitukiseza kukena mwa Naha ya Sepiso, yona naha ya Kanana. Kono nebatokwa kulwana ni lila zemaata. Ka mutala, Joshua naatokwa kulwana ni Makanana, ili batu bane baeza lika zemaswe hahulu. c (Deuteronoma 9:5; 20:17, 18) Makanana hape neli babañata hahulu mi nebanani lilwaniso za ndwa zeñata kufita Maisilaele. (Joshua 9:1, 2; 17:18) Kono Joshua naanani bundume mi naalatelezi litaelo za Jehova. Mi Mulimu naainzi ni yena luli, kakuli Maisilaele nebatuzi buñata bwa lila zabona mwa lilimo feela ze 6.—Joshua 21:43, 44.
a Libizo la Jehova ki libizo la Mulimu lelitolokilwe kuzwa fa litaku zeene za Siheberu za יהוה (YHWH). Mwa timana ye, libizo leo litolokilwe sina “MULENA” mwa Bibele ya New International Version. Kuli muzibe litaba zeñata ka za Jehova ni libaka libizo leo halisiyo mwa litoloko zeñwi za Bibele, mubone taba yeli, “Jehova ki Mañi?”
b Kubonahala kuli litaba zeneñozwi ka kususumezwa ki moya wa Mulimu zeneli teñi mwa linako za Joshua, ni mwa linako zaluna zefumaneha mwa Bibele, likopanyeleza libuka zeketalizoho zanaañozi Mushe (Genese, Exoda, Livitike, Numere, ni Deuteronoma), buka ya Jobo, ni samu iliñwi kamba zepeli.
c Kuli muzibe libaka Maisilaele hane batokwa kulwanisa lila zabona, mubone taba ya yeli, “Why Did God Wage War Against the Canaanites?” yefumaneha mwa Tawala ya Mulibeleli ya Sikuwa ya January 1, 2010.
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
2 Timotea 1:7 Italusizwe—“Mulimu Haasika Lufa Moya wa Boi”
Mulimu ukona kutusa cwañi mutu kusaba ni boi ni kuba ni bundume bwakueza zelukile?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
