LITIMANA ZA MWA BIBELE ZETALUSIZWE
Liproverbia 16:3—“Ubeye Lika Kaufela Zeueza Mwa Mazoho A MULENA”
“Ubeye lika kaufela zeueza mwa mazoho a Jehova, mi milelo yahao ikakonda.”—Liproverbia 16:3, Bibele ya Toloko ya Lifasi Lelinca.
“Ubeye lika kaufela zeueza mwa mazoho a MULENA, mi ukakondisa milelo yahao.”—Liproverbia 16:3, Bibele ya New International Version.
Taluso ya Liñolo la Liproverbia 16:3
Manzwi a kwa timana ye akolwisa batu babalapela Mulimu wa niti kuli milelo yabona ikakonda haiba baitinga ku yena ka kulatelela ketelelo yahae.
“Ubeye lika kaufela zeueza mwa mazoho a Jehova.” Pili basika eza kale katulo, balapeli ba Jehova a babatanga ketelelo yahae ka buikokobezo. (Jakobo 1:5) Kabakalañi? Libaka leliñwi ki kuli, batu hañata hababangi ni maata a kutibela miinelo yekona kuama bupilo bwabona. (Muekelesia 9:11; Jakobo 4:13-15) Kuzwa fo, mwendi habana butali bobukona kubatusa kueza lika zebalata. Ka mabaka ao, batu babañata babeyanga milelo yabona mwa mazoho a Mulimu kamba kumusepa. Baezanga cwalo ka kukupa ketelelo ku yena ka tapelo ni ka kueza lika ka kulumelelana ni tato yahae sina mokuboniselizwe mwa Linzwi lahae yona Bibele.—Liproverbia 3:5, 6; 2 Timotea 3:16, 17.
Pulelo yeli, “ubeye lika kaufela zeueza mwa mazoho a MULENA b” ikona kutalusa kuli, “upikuluseze misebezi yahao ku MULENA.” Ka kuya ka hatiso yeñwi, pulelo ye italusa “mutu yalula mutiyo fa maheta ahae ni kuulwesa mutu yomuñwi yanani maata ili yakona kuushimba.” Batu babaitinganga ku Mulimu ka buikokobezo, bakona kuba ni buikolwiso bwa kuli uka batusa ni kubafa zebatokwa.—Samu 37:5; 55:22.
Pulelo yeli, “lika kaufela zeueza” haitalusi kuli Mulimu ukalumeleza kamba kufuyaula milelo kaufela yebakona kuba ni yona batu. Kuli bafuyaulwe ki Jehova, milelo yabona iswanela kulumelelana ni likuka zahae hamoho cwalo ni tato yahae. (Samu 127:1; 1 Joani 5:14) Mulimu hafuyaulangi batu babasa muutwi. Mane, “upalelwisa milelo ya babamaswe.” (Samu 146:9) Ka nako yeswana, utusanga batu bababonisa kuli bamuutwa ka kukuteka likuka zahae ze mwa Bibele.—Samu 37:23.
“Mi milelo yahao ikakonda.” Libibele zeñwi litolokile pulelo yeo kuli, “milelo yahao ikatiya.” Mwa Mañolo A Siheberu, ili ebaziba hahulu batu kuli Testamente Yakale, linzwi lelitolokilwe kuli “kutiya” lifa muhupulo wa kutoma mutomo, mi hañata liama kwa misebezi ya Mulimu ya kubupa lika. (Liproverbia 3:19; Jeremia 10:12) Ka nzila yeswana, Mulimu ukatiisa milelo ya batu babaeza zelukile mwa meeto ahae, ili kubatusa kupila bupilo bobunde bwa tabo.—Samu 20:4; Liproverbia 12:3.
Litaba zeñwi zeswalisana ni litaba ze kwa Liproverbia 16:3
Timana ye neiñozwi ki Mulena Salumoni, ili yanaañozi likalulo zeñata za buka ya Liproverbia. Naakonile kubulela mashitanguti amañata kabakala butali bwanaafilwe ki Mulimu.—1 Malena 4:29, 32; 10:23, 24.
Mwa kauhanyo 16, Salumoni ukala ka kulumba butali bwa Mulimu ni kubonisa kuli Mulimu utoile batu babaikuhumusa. (Liproverbia 16:1-5) Kauhanyo yeo cwale kihona itusa mubali kuutwisisa taba ya butokwa yefumaneha mwa buka ya Liproverbia ya kuli: Batu bakona kuba ni butali luli ni kukondisa ibile feela baikokobeza ni kulumeleza Mulimu kubaetelela. (Liproverbia 16:3, 6-8, 18-23) Taba ya niti ye, ikuta-kutezwi hahulu mwa Bibele.—Samu 1:1-3; Isaya 26:3; Jeremia 17:7, 8; 1 Joani 3:22.
Mubuhe vidio yekuswani ye kuli mubone molitaluselizwe ka bukuswani liñolo la Liproverbia.
a Jehova ki lona libizo la Mulimu. (Samu 83:18) Mubone taba yeli, “Jehova ki Mañi?”
b Manzwi a makalelo mwa Bibele ya New International Version Study Bible abulela kuli Bibele ye iitusisize linzwi la “MULENA” (mi “MULENA” iñozwi ka litaku zetuna) fone kuswanela kuba libizo la Mulimu. Kuli mubone libaka kueza cwalo hakukona kulyanganisa babali ba Bibele, mubone taba yeli, “Isaya 42:8—‘Ki na MULENA.’”
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
Liproverbia 3:5, 6 Italusizwe—“Usike Watiyela fa Kutwisiso Yahao”
Mukona kubonisa cwañi kuli musepile Mulimu kufita momuisepezi mina bañi?
TAWALA YA MULIBELELI
Lituto ze Mwa Bibele Lilutusa Kuba ni Butali ka Nako Kaufela
Kusina taba kuli ki buka yakale, Bibele isasebeza ni kacenu kakuli inani likuka zetusa ka nako kaufela
LITIMANA ZA MWA BIBELE ZETALUSIZWE
Jeremia 29:11 Italusizwe—“Niziba Seni Milelezi, Senihupuzi ka Mina”
Kana Mulimu ulelezi cimo zekaezahala ku mañi ni mañi waluna?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
