“Kanya ibe mwa mahalimu ku Mulimu, mi kozo ibe fa lifasi kwa batu babashemubilwe.”—Luka 2:14, Bibele ya Toloko ya Lifasi Lelinca.

 “Mulumbeke Mulimu ya mwa lihalimu! Kozo ibe fa lifasi kwa batu kaufela babatabisa Mulimu.”—Luka 2:14, Bibele ya Contemporary English Version.

 Manzwi a kulumbeka Mulimu anaabulezwi ki mangeloi ka nako ya kupepwa kwa Jesu, abonisa kuli batu babanani tumelo ku Jesu bakona kuba ni silikani sesinde ni Mulimu ni kuikola kozo.

 “Kanya ibe mwa mahalimu ku Mulimu.” Mangeloi anaabulela manzwi a, naakoñomeka taba ya kuli Mulimu waswanela kufiwa kanya kaufela. Manzwi a hape abonisa kuli kupepwa kwa Jesu ni bukombwa bwahae bwa fa lifasi nelika tahisa kanya ku Jehova a Mulimu. Jesu hanaalutanga kamita naafanga tumbo ku Mulimu, ka mutala naabulezi kuli: “Litaba zeniluta, haki zaka, kono ki za yanilumile.” (Joani 7:16-18) Jesu hanaaezanga limakazo, hañata batu ‘nebakanyisanga Mulimu.’ (Luka 5:18, 24-26; Joani 5:19) Mane nihaiba lifu la Jesu nelitahisize kuli Mulimu akanyiswe. Kakuli nelikonahalisize kuli mulelo wa Mulimu omutuna ona wa kutaza lifasi ka batu babalukile ni babalata kozo ukone kuto talelezwa kwapili.—Genese 1:28.

 “Kozo ibe fa lifasi.” Kozo ye iama lika zeñata kwandaa feela kupila kusina lindwa. Kozo ye iama kozo ya mwa munahano yakona feela kuba ni yona mutu haiba atabisa Jehova. Kabakala Jesu, batu bakona kuba ni silikani sesinde ni Mulimu. (Jakobo 4:8) Mi ka kuba Mulena wa Mubuso wa Mulimu, Jesu ukatahisa kozo mwa lifasi kaufela kuya kuile.—Samu 37:11; Luka 1:32, 33.

 “Batu babashemubilwe.” Pulelo ye iama kwa batu babashemubilwe ki Mulimu kabakala kuba ni tumelo ya niti ku yena ni ku yanaalumile, yena Jesu. Haiami kwa sishemo sa Mulimu sakona kubonisa batu kaufela kusina taba ni mibonelo yabona kamba likezo zabona mi hape haiami ni kwa sishemo sebakona kubonisa batu. Litoloko zeñwi za Bibele, zecwale ka King James Version, litolokile pulelo yeo kuli “batu bashemubwe.” Nihakulicwalo, miputo yakale ya Sigerike yalumelelana ni Bibele ya Toloko ya Lifasi Lelinca mane ni Libibele zeñwi zeñata za mwa miteñi ye, ili zetolokile pulelo yeo kuli kozo ibe kwa batu babatabisa Mulimu.—Mubone “Moitolokezwi  Luka 2:14 Mwa Litoloko Zeñwi za Bibele.”

 Luka kauhanyo 2 italusa makalelo a bupilo bwa Jesu fa lifasi. Nakonyana kuzwa fapepelwa Jesu, lingeloi latobonahala kwa balisana “bane bapila mwa naheñi banze balibelela mitapi yabona busihu.” b (Luka 2:4-8) Lingeloi nelishaezi za ‘taba yende ya tabo yetuna’ kwa balisana, ka kubabulelela kuli: “Kacenu, mwa muleneñi wa Davida, mupepezwi mupilisi, yena Kreste Mulena.” (Luka 2:9-11) Balisana nebataluselizwe kone bakayo fumana mbututu yene isazo pepwa yeo mi nebaiponezi Mangeloi amañata-ñata hanzaa lumbeka Mulimu. Balisana hane bayo fita mwa Betelehema bafumana Maria ni Josefa inze bainzi hamoho ni mbututu, yena Jesu. (Luka 2:12-16) Balisana hase batalusize ka za lika zemakaza zene bataluselizwe ki mangeloi ka za mwanaa yo, bakutela kwa mitapi yabona “banze bakanyisa ni kulumbeka Mulimu kabakala zene bautwile kaufela ni zene baboni.”—Luka 2:17-20.

 “Kanya ku Mulimu ya kwa lihalimu leli pahami hahulu mi kozo ibe fa lifasi kwa batu babashemubilwe ki yena.”—Luka 2:14, Bibele ya New International Version.

 “Kanya ku Mulimu ya kwa lihalimu leli pahami hahulu mi kozo ibe fa lifasi kwa batu baba mutabisa!”—Luka 2:14, Bibele ya Good News Translation.

 “Kanya ku Mulimu ya mwa mahalimu mi kozo ibe fa lifasi kwa batu baba mutabisa!”—Luka 2:14, Bibele ya English Standard Version.

 Mubuhe vidio yekuswani ye kuli mubone litaba zeñwi zefumaneha mwa buka ya Luka.