“Nifumana maata mwa lika kaufela ka yena yanifa maata.”—Mafilipi 4:13, Bibele ya Toloko ya Lifasi Lelinca.

 “Nikona kueza lika kaufela ka Kreste yanitiisa.”—Mafilipi 4:13, Bibele ya New King James Version.

 Manzwi a, anaañozwi ki muapositola Paulusi, akolwisa batanga ba Mulimu kuli uka bafa maata aka bakonisa kueza tato yahae.

 Litoloko zeñwi za Bibele libulela kuli Kreste ki yena yanaafile Paulusi maata. Nihakulicwalo, linzwi la “Kreste” halisika itusiswa mwa timana ye mwa miputo ya Sigerike yakale hahulu. Kacwalo, Libibele zeñata za mwa miteñi ye liitusisize manzwi acwale ka “yena yanifa maata” (Bibele ya Toloko ya Lifasi Lelinca), “yena yanifa maata” (Bibele ya New International Version), ni “yena simbule sa maata aka” (Bibele ya New American Bible). Kacwalo, ki mañi luli yanaafile Paulusi maata?

 Litaba zeñwi zeswalisana ni timana ye libonisa kuli Paulusi naaama ku Mulimu. (Mafilipi 4:6, 7, 10) Kwa makalelo a liñolo leliswana le, Paulusi naataluselize Bakreste ba Mafilipi kuli: ‘Mulimu ki yena . . . yamifa maata, ili kumifa . . . maata a kuunga muhato.’ (Mafilipi 2:13) Mi kwa 2 Makorinte 4:7, naañozi kuli ki Mulimu yanaa mufile maata anaa mukonisize kupeta hande bukombwa bwahae. (Mubapanye 2 Timotea 1:8.) Kacwalo, kunani mabaka autwahala haluswanela kulumela kuli Paulusi naaama ku Mulimu hanaabulezi kuli “yena yanifa maata.”

 Paulusi naatalusañi hanaañozi kuli naakafiwa maata “mwa lika kaufela”? Kubonahala kuli lika zanaatalusa Paulusi ki miinelo yetaata yanaakopana ni yona hanaanzaa eza tato ya Mulimu. Ibe kuli naanani lika zeñata za kwa mubili kamba kutokwa, naaitingile ku Mulimu kuli amubabalele. Kacwalo, Paulusi naaitutile butokwa bwa kukolwa ka lika zanaanani zona kusina taba ni miinelo yanaakopani ni yona.—2 Makorinte 11:23-27; Mafilipi 4:11.

 Manzwi anaañozi Paulusi akona kutusa batanga ba Mulimu kacenu. Mulimu uka bafa maata ebatokwa ilikuli batiyele miliko ni kueza tato yahae. Mulimu ukona kueza cwalo ka kuitusisa moya wahae okenile, balumeli babañwi ni Linzwi lahae, yona Bibele.—Luka 11:13; Likezo 14:21, 22; Maheberu 4:12.

 Paulusi naañozi manzwi a, kwa mafelelezo a liñolo lanaañolezi Bakreste bane bapila mwa muleneñi wa Filipi. Naañozi liñolo le ibato ba ka 60-61 C.E., ili yona nako yanaalengilwe mwa tolongo lwapili kwa Roma. Bakreste ba Mafilipi nebasika kona kutusa muapositola Paulusi ka kumufumanela zanaatokwa kwa mubili mi hakuzibahali kuli muinelo wo neungile nako yekuma kai. Kono ka nako ye, nebakalile kulumela Paulusi limpo zene mutusa kufumana zanaatokwa.—Mafilipi 4:10, 14.

 Paulusi naababalize hahulu Bakreste ba Mafilipi kabakala bufani bwabona ni kubataluseza kuli naanani zanaatokwa. (Mafilipi 4:18) Hape naaitusisize kolo yeo kubataluseza taba ya butokwa ili ya niti yeneama mwakupilela sina Bakreste: Bakreste kaufela, ibe kuli ki bafumi kamba ki babotana, bakona kukolwa ka lika zebanani zona haiba baitinga ku Mulimu kuli abatuse.—Mafilipi 4:12.