“Ka kufeza mizwale, muzwelepili kunahanisisa lika kaufela zeli za niti, lika kaufela zeli za butokwa, lika kaufela zelukile, lika kaufela zekenile, lika kaufela zelatiwa, lika kaufela zebulelwa hande, lika kaufela zende, ni lika kaufela zelukela kulumbwa.”—Mafilipi 4:8, Bibele ya Toloko ya Lifasi Lelinca.

 “Ka kufeza banabahesu, linto kaufela zeli za niti, kaufela zekutekeha, kaufela zelukile, kaufela zekenile, kaufela zenani libubo lelinde, kaufela zenani swanelo, ni zelukela kulumbwa, ibe zona zemunze muhupula.”—Mafilipi 4:8, Bibele ya New International Version.

 Mulimu waisa pilu kwa lika zebanahana batu, sihulu bakeñisa kuli luezanga lika ka kuya ka zelunahana. (Samu 19:14; Mareka 7:20-23) Kacwalo, batu bababata kutabisa Mulimu bahanyeza mihupulo yaanga kuli imaswe mi banahana lika zelumelelwa ki yena.

 Timana ye italusa lika ze 8 zende zebaswanela ‘kuzwelapili kunahanisisa’ Bakreste; ka mubulelelo omuñwi, balukela kuba ni mukwa wa kunahananga lika zeo.

•   “Niti.” Linzwi le, litalusa lika zende ni zesepeha, zecwale ka litaba zefumaneha mwa Linzwi la Mulimu, yona Bibele.—1 Timotea 6:20.

•   “Za butokwa.” Pulelo ye iama kwa lika za butokwa hahulu. Haki lika zesina tuso kamba zesina moliinezi. Kono ki lika zetusa Mukreste yaikatulezi kueza zelukile kuba ni maata a kueza cwalo.—Tite 2:6-8.

•   “Zelukile.” Linzwi le, liama kwa milelo ni likezo zelumelelana ni likuka za Mulimu ka za lika zelukile kufita kuitinga fa butali bwa batu bobunani maciñekelo.—Liproverbia 3:5, 6; 14:12.

•   “Zekenile.” Linzwi le, libonisa kuli mihupulo ni milelo iswanela kuba yekenile, isiñi feela mwa litaba za somano, kono mwa lika kaufela.—2 Makorinte 11:3.

•   “Zelatiwa.” Linzwi le, liama kwa lika zende zelususueza kuba ni lilato mwa sibaka sa kuba ni sitoyo, ndimbelela kamba mifilifili.—1 Pitrosi 4:8.

•   “Zebulelwa hande.” Pulelo ye, iama kwa lika zekona kutusa mutu kuba ni libizo lelinde, ili nto yende ni mwa meeto a batu babakuteka Mulimu.—Liproverbia 22:1.

•   “Zende.” Linzwi le, liama kwa lika zende hahulu ka kuya ka likuka za Mulimu. Ki zende hahulu luli.—2 Pitrosi 1:5, 9.

•   “Zelukela kulumbwa.” Linzwi le, liama kwa lika zekona kubabazwa, sihulu mwa meeto a Mulimu. Hape liama kwa likezo za Mulimu zelukela kulumbwa, ili zebaswanela kunahanisisa batu.—Samu 78:4.

 Muapositola Paulusi naatamezwi mwa ndu kwa Roma ka nako yanaañolezi Bakreste ba Mafilipi liñolo le. Nihakulicwalo, batalusi ba litaba za mwa Bibele batalusa liñolo lahae sina “liñolo la tabo” bakeñisa kuli liñozwi ka nzila yebonisa kuli muñoli naanani tabo mi kuitusisizwe manzwi amañata abonisa kuli naabaisa pilu mi naabalata.—Mafilipi 1:3, 4, 7, 8, 18; 3:1; 4:1, 4, 10.

 Paulusi naalata mizwale ni likaizeli bahae ba mwa Filipi, mi naabata kuli ni bona babe ni tabo ni kozo sina yena. (Mafilipi 2:17, 18) Kacwalo, kwa mafelelezo a liñolo lahae, naabasusuelize kuba ni tabo, kuba ni kutwisiso, kuitinga ku Mulimu ka tapelo nako kaufela ni kunahana za lika zetahisa kozo ya mwa munahano ni kozo ni Mulimu.—Mafilipi 4:4-9.

 Mubuhe vidio yekuswani ye kuli muzibe litaba zeñwi ka za buka ya Mafilipi.