LITIMANA ZA MWA BIBELE ZETALUSIZWE
Maroma 12:12—“Mutabe Kabakala Sepo, Mube ni Pilu-telele Mwa Manyando, Mulapele Kamita”
“Mutabe kabakala sepo. Muitiise hamuli mwa manyando. Mutundamene kulapela.”—Maroma 12:12, Bibele ya Toloko ya Lifasi Lelinca.
“Mutabe kabakala sepo, mube ni pilu-telele mwa manyando, mulapele kamita.”—Maroma 12:12, Bibele ya English Standard Version.
Taluso ya Liñolo la Maroma 12:12
Mwa timana ye, muapositola Paulusi naasusuelize Bakreste ba kwa Roma kueza lika zetaalu zeneka batusa kuzwelapili kusepahala ku Mulimu kusina taba ni nyandiso ni miinelo yemiñwi yetaata.
“Mutabe kabakala sepo.” Bakreste banani sepo yende ya kuba ni bupilo bobusa feli, babañwi ikaba kwa lihalimu mi buñata bwa batu ikaba fa lifasi lelikaba paradaisi. (Samu 37:29; Joani 3:16; Sinulo 14:1-4; 21:3, 4) Sepo yeo ikopanyeleza kubona Mubuso wa Mulimu a hauka felisa manyando kaufela obakopana ni ona batu. (Daniele 2:44; Mateu 6:10) Batanga ba Mulimu bakona kuba ni tabo niha bakopana ni miinelo yetaata bakeñisa kuli bakozwi kuli sepo yabona ki ya luli ni kuli bakatabisa Mulimu haiba bazwelapili kuitiisa.—Mateu 5:11, 12; Maroma 5:3-5.
“Muitiise hamuli mwa manyando.” Mwa Bibele, linzwi la Sigerike lelitalusa kezo lelitolokilwe kuli “muitiise” hañata litalusa “kusabaleha; kutundamena; kuzwelapili kusepahala.” Balateleli ba Kreste ‘haki ba lifasi’; b kacwalo, baziba kuli bakanyandiswa mi batokwa kuitiisa. (Joani 15:18-20; 2 Timotea 3:12) Haiba Mukreste asebeleza Jehova ka busepahali nihaikaba kuli kueza cwalo kutokwa kuli atiyele miliko, tumelo yahae ya kuli Mulimu uka mufa mupuzo kwa mafelelezo, ikatiya. (Mateu 24:13) Tumelo yetiile yeo ika mutusa kutiyela miinelo yetaata ka pilu-telele ni tabo.—Makolose 1:11.
“Mutundamene kulapela.” Bakreste basusuezwanga hahulu kuzwelapili kulapela. (Luka 11:9; 18:1) Kamita balatelelanga ketelelo ya Mulimu ni kuitinga ku yena mwa lika kaufela zebaeza mwa bupilo. (Makolose 4:2; 1 Matesalonika 5:17) Banani buikolwiso bwa kuli Mulimu uka bafa zebakupa kakuli bamamela milao yahae mi baeza mobakonela kaufela kumutabisa. (1 Joani 3:22; 5:14) Hape baziba kuli haiba batundamena kulapela, Mulimu uka bafa maata ebatokwa kuli bazwelepili kusepahala kusina taba ni muliko obakona kukopana ni ona.—Mafilipi 4:13.
Litaba zeñwi zeswalisana ni litaba ze kwa Maroma 12:12
Muapositola Paulusi naañolezi liñolo le Bakreste bane bapila kwa Roma ibato ba ka 56 C.E. Mwa kauhanyo 12 ya liñolo leo, ufa kelezo yende ka za mwakuboniseza tulemeno twa Sikreste, mwakuezeza Bakreste babañwi ni batu feela, ni mwakubela ni kozo habanyandiswa. (Maroma 12:9-21) Kelezo yeo neifilwe ka nako yeswanela bakeñisa kuli nebatuha bakopana ni nyandiso yetuna.
Lilimonyana kuzwa fo, ili ka 64 C.E., mulilo omutuna neucisize likalulo zeñata za muleneñi wa Roma. Nekunani mabulatwi a kuli Mubusi Nero ki yena yanaatumbuzi mulilo wo. Caziba yomuñwi wa litaba za kwaikale yabizwa Tacitus, naabulezi kuli Nero naatamelelize Bakreste taba yeo kuli akona kuisileleza. Kaniti, taba yeo neitahisize kuli Bakreste banyandiswe. Kelezo yanaa bafile Paulusi ya mwakutiyela nyandiso nei batusize kutiyela muliko wo ka tumelo mi nebasika eza nto ifi kamba ifi yeneka bashubulisa. (1 Matesalonika 5:15; 1 Pitrosi 3:9) Batomezi batanga ba Mulimu kacenu mutala omunde hahulu wa kulikanyisa.
Mubuhe vidio yekuswani ye kuli mubone litaba zeñwi zefumaneha mwa buka ya Maroma.
a Mubuso wa Mulimu ki mulonga o kwa lihalimu otomilwe ki Mulimu kuli tato yahae ka za lifasi ipetiwe. Kuli muzibe litaba zeñata, mubone taba yeli, “Mubuso wa Mulimu ki Nto Mañi?”
b Mwa Bibele, linzwi la “lifasi” likona kutalusa batu babaikauhanyize ku Mulimu.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Ki Lika Mañi Zekona Kunitusa Kuba ni Sepo?
Kufumana simbule sesisepahala kuka lutusa kuba ni bupilo bobunde cwale ni sepo yende kwapili.
LITUTO ZA BUTOKWA ZA MWA BIBELE
Kana Mulimu Wautwa Litapelo Kaufela?
Kono kucwañi haiba mutu alapela ka mulelo wa buitati? Kucwañi haiba muuna anyandisa musalaa hae, mi kihona akupa kuli Mulimu amufuyole?
LITIMANA ZA MWA BIBELE ZETALUSIZWE
Maroma 15:13 Italusizwe—Maroma 15:13—“Haike Mulimu Yafa Sepo Amitaze Tabo ni Kozo Kaufela”
Kalemeno ka tabo ni ka kozo, tuswalisana cwañi ni sepo ni moya okenile?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
