“Mutuhele kuya ka mikwa ya lifasi le, kono mufetuhe ka kucinca munahano wamina, kuli mulemuhe tato ya Mulimu yende ni yeamuheleha ni yepetehile.”—Maroma 12:2, Bibele ya Toloko ya Lifasi Lelinca.

 “Musike mwalikanyisa mupilelo wa lifasi le, kono mufetuhe ka kucinca munahano wamina. Mi mukaziba ni kulemuha kuli tato ya Mulimu ki ifi—yende ni yetabisa ni yepetehile.”—Maroma 12:2, Bibele ya New International Version.

 Bababata kutabisa Mulimu habaswaneli feela kuhana likukuezo zemaswe, kono hape baswanela kucinca butu bwabona. Mulimu haabahapelezi kucinca butu bwabona, kono baeza cwalo kabakala kuli bamulata, mi baziba kuli lika zabata kuli baeze ki zende mi haki zetaata, ni kuli kueza cwalo kwatusa luli.—Isaya 48:17.

 “Mutuhele kuya ka mikwa ya lifasi le.” “Mikwa ya lifasi,” ili kutalusa mupilelo wa batu mwa lifasi kacenu, likezo zabona, ni mikwa yabona halitabisi Mulimu. (1 Joani 2:15-17) Lifasi likukueza batu kueza lika zemaswe, mi lakona kucinca mikwa ni butu bwabona. Kuli mutu alapele Mulimu ka nzila yemutabisa, uswanela kuhana kukukuezwa ki lifasi, kakuli haiba asaezi cwalo, ukakala kuba ni mikwa yemaswe yeka mukenya mwa butata ni yesatabisi Mulimu.—Maefese 2:1-3; 4:17-19.

 “Mufetuhe ka kucinca munahano wamina.” Hape mutu uswanela kulika ka taata kucinca mubonelo wahae ni maikuto ahae. Linzwi la Sigerike lelitolokilwe kuli “mufetuhe,” libonisa cinceho yetuna yaswanela kueza mutu, inge cwalo molicincezanga liungu kuba kokwani yebizwa sipulumuki. Batu babasebeleza Mulimu baswanela “kuapala butu bobunca.”—Maefese 4:23, 24; Makolose 3:9, 10.

 “Mulemuhe tato ya Mulimu yende ni yeamuheleha ni yepetehile.” Mulimu ubata kuli batu baba musebeleza babe ni buikolwiso bobutuna ka za lika zebalumela. Kuli babe ni buikolwiso bobucwalo, baswanela kuituta Linzwi la Mulimu, kusebelisa zebaituta, ni kulemuha mo kupila ka kulatelela likuka za Mulimu kukona kubatuseza. Mi haiba baeza cwalo, bakabonisa kuli kupila ka likuka za Mulimu kwatusa luli.—Samu 34:8.

 Liñolo la Maroma kauhanyo 12 libonisa zekutalusa kulapela Mulimu ka nzila yelukile. Kusebeleza Mulimu ka nzila yeo kuama lika kaufela zelueza mwa bupilo bwaluna, mi mutu uswanela kuitusisa “maata [ahae] a kunahana” mwa sibaka sa kulumela feela litaba kusina kulibatisisa. (Maroma 12:1, 3) Mwa kauhanyo ye, kunani liakalezo zende zebonisa molukona kuboniseza tulemeno totuswana ni twanani tona Mulimu, molukona kupilisanela ni batu babañwi, ni zelukona kueza haluezwa maswe ki batu babañwi.—Maroma 12:9-21.