LITIMANA ZA MWA BIBELE ZETALUSIZWE
Maroma 6:23—“Mupuzo wa Sibi ki Lifu, Kono Mpo ya Mulimu ki Bupilo Bobusa Feli”
“Mupuzo wa sibi ki lifu, kono mpo yafa Mulimu ki bupilo bobusa feli ka Kreste Jesu Mulenaa luna.”—Maroma 6:23, Bibele ya Toloko ya Lifasi Lelinca.
“Mupuzo wa sibi ki lifu, kono mpo ya Mulimu ki bupilo bobusa feli ka Kreste Jesu Mulenaa luna.”—Maroma 6:23, Bibele ya New International Version.
Taluso ya Liñolo la Maroma 6:23
Ka kubulela manzwi a, muapositola Paulusi utalusa kuli batu bashwa bakeñisa kuli banani sibi. Nihakulicwalo, Mulimu ufa balapeli bahae babasepahala sepiso yende ya kuli uka bafa mpo yende hahulu ya bupilo bobusa feli.
“Mupuzo wa sibi ki lifu.” Batu kaufela bapepilwe inze basika petahala mi kona libaka habaezanga sibi. a (Samu 51:5; Muekelesia 7:20) Batu kaufela basupalanga ni kushwa bakeñisa kuli bapepilwe inze banani sibi.—Maroma 5:12.
Kuli luutwisise sisupo seo, Paulusi naabapanyize sibi ku mubelekisi ya lifa babeleki lituwelo zabona. Sina feela mubeleki halibelela kufiwa lituwelo zahae, batu nibona bakona kulibelela kuli bakashwa bakeñisa kusapetahala kwabona.
Nihakulicwalo, Paulusi hape utalusa kuli mutu “yashwile ulukuluzwi kwa sibi sahae.” (Maroma 6:7) Mutu hashwa, ulukuluzwi kwa sibi kaufela saezize. Kona libaka halusa swaneli kunahana kuli babashwile bazwelapili kunyanda kwa sibaka sesiñwi bakeñisa libi zene baezize pili basika shwa kale. Mane Bibele ibulela hande kuli babashwile habakoni kunahana, kuutwa, kamba kueza nto ifi kamba ifi.—Muekelesia 9:5.
“Kono mpo yafa Mulimu ki bupilo bobusa feli ka Kreste Jesu.” Ka kushutana ni “mupuzo” wa sibi, Mulimu ufa mpo ya bupilo bobusa feli. Linzwi lelitolokilwe kuli “mpo” hape likona kutolokiwa kuli “mpo yesika libelelwa” kamba “mpo yefiwa ka sishemo.” Iama kwa nto yakona kufiwa mutu asika libelela. Mutu yanani sibi hakoni kupiliswa ni kufumana bupilo bobusa feli. (Samu 49:7, 8) Nihakulicwalo, Mulimu ufa mpo ya butokwa hahulu ya bupilo bobusa feli kwa batu bababonisa tumelo ku Jesu.—Joani 3:16; Maroma 5:15, 18.
Litaba zeñwi zeswalisana ni litaba ze kwa Maroma 6:23
Paulusi naañolezi Bakreste ba kwa Roma liñolo le ibatoba ka 56 C.E. Kubonahala kuli babañwi ba Bakreste bane bapila ka nako yeo nebanani mibonelo yefosahezi ka za sishemo sa Mulimu. Kabakala kukukuezwa ki lituto za butali bwa batu za Sigerike, nebahupula kuli haiba bakuta-kutela kueza sibi Mulimu ni yena uka kuta-kutela kubaswalela. (Maroma 6:1) Babañwi nebanahana kuli nebasa koni kufiwa koto kabakala mafosisa abona bakeñisa kuli nebasiyo mwatasaa Mulao wa Mushe. (Maroma 6:15) Mwa liñolo lahae, Paulusi naakoñomekile kuli Bakreste habakoni kutusiwa ki sishemo sa Mulimu haiba batuhelela sibi kuba zamaisa.—Maroma 6:12-14, 16.
Manzwi a Paulusi akolwisa balapeli ba Mulimu kacenu kuli nihaike kuli bapepilwe inze banani sibi, basanani sepo. Haiba bamamela likuka za Mulimu za muzamao ni kusalatelela litakazo zabona zemaswe, Mulimu usepisa kubafa bupilo bobusa feli.—Maroma 6:22.
Mubuhe vidio yekuswani ye kuli mubone molitaluselizwe ka bukuswani liñolo la Maroma.
a Mwa Bibele, “sibi” sitalusa kezo kamba mukwa ufi kamba ufi osalumelelani ni likuka za Mulimu. (1 Joani 3:4) Mubone taba yeli, “Sibi ki Nto Mañi?”
Hape Mwendi Mwakona Kutabela Litaba Ze
TAWALA YA MULIBELELI
Mwakona Kupila Kuya Kuile fa Lifasi
Bibele ilubulelela mulelo wa Mulimu kwa batu.
LITUTO ZA BUTOKWA ZA MWA BIBELE
Ki Kabakalañi Jesu Hanaashwile?
Mwendi muutwile kuli Jesu naashwezi libi zaluna. Kono kana lifu la mutu alimuñwi lakona kutusa batu babañata-ñata?
LITIMANA ZA MWA BIBELE ZETALUSIZWE
Joani 3:16—“Kakuli Mulimu Naalatile Hahulu Lifasi”
Jehova Mulimu naabonisize cwañi kuli ulata mañi ni mañi waluna mi ubata kuli lupile kuya kuile?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
