“Musike mwabilaela za lizazi lelitatama, kakuli lizazi lelitatama litaha ni lipilaelo zalona. Lizazi ni lizazi linani butata bwalona.”—Mateu 6:34, Bibele ya Toloko ya Lifasi Lelinca.

 “Musike mwabilaela za kamuso, kakuli lizazi la kamuso linani lipilaelo za lona. Lizazi ni lizazi linani butata bwalona.”—Mateu 6:34, Bibele ya New International Version.

 Jesu yena yanaabulezi manzwi ao, naasusuelize batu bane bateeleza ku yena kuli basike babilaezwa hahulu ki miinelo yetaata yekaba teñi kwapili. Kono nebatokwa kulemuha kuli lizazi ni lizazi linani butata bwalona.

 Jesu naasatalusi kuli kufosahalile kunahana za kamuso kamba lika za kwapili. (Liproverbia 21:5) Kono naatalusa kuli haluswaneli kubilaela hahulu, kamba kuba ni lipilaelo, ka za lika zekona kuezahala kamuso. Kubilaela hahulu ka za lika zecwalo kwakona kutahisa kuli lufelelwe ki tabo ni kupalelwa kueza lika zeñwi mwa bupilo. Kuba ni lipilaelo ka za miinelo yetaata yekaezahala kwapili hakukoni kutahisa kuli luitatulule ka nako ya cwale. Mi lika zelubilaelanga hañata haliezahalangi, mi haiba liezahala halibangi zemaswe hahulu sina mone lunahanela.

 Manzwi anaabulezi Jesu a, naaabulezi mwa Ngambolo ya fa Lilundu yeñozwi kwa Mateu kauhanyo 5-7. Mwa ngambolo yeo, Jesu naabulezi kuli kuba ni lipilaelo zesa swaneli hakuna kutahisa kuli lube ni tabo mwa bupilo kamba kuekeza kwa bupilo bwaluna. (Mateu 6:27) Jesu hape naabulezi kuli haiba lubeya Mulimu mwa sibaka sapili, haluna kubilaelanga hahulu ka za lizazi lelitatama. Mulimu wababalela limela ni lifolofolo, kacwalo ukababalela ni batu baba musebeleza.—Mateu 6:25, 26, 28-33.