“Lika kaufela uliezize zende mwa nako yazona. Mane ubeile ni nako ya kamita mwa lipilu zabona; nihakulicwalo, batu habana kukona kuziba misebezi yaezize Mulimu wa niti kuzwa kwa makalelo kuisa kwa mafelelezo.”—Muekelesia 3:11, Bibele ya Toloko ya Lifasi Lelinca.

 “Lika kaufela uliezize zende mwa nako yazona. Hape ubeile ni nako ya kamita mwa lipilu za batu; nihakulicwalo, batu habana kukona kuutwisisa misebezi yaezize Mulimu kuzwa kwa makalelo kuisa kwa mafelelezo.”—Muekelesia 3:11, Bibele ya New International Version.

 “Lika kaufela uliezize zende mwa nako yazona.” Linzwi la Siheberu lelitolokilwe kuli “zende” haliami feela kwa nto yebonahala hande. Hape likona kutolokiwa kuli “kulukisa hande,” “kuluka,” kamba “kuswanela.” (Muekelesia 3:11, litaluso ze kwatasi) Misebezi ya Mulimu yeminde ikopanyeleza lika kaufela zabupile ni lika kaufela zaeza kuli apete tato yahae.—Daniele 2:21; 2 Pitrosi 3:8; Sinulo 4:11.

 “Mane ubeile ni nako ya kamita mwa lipilu zabona.” Mulimu naabupile batu kuli bapile kuya kuile. (Samu 37:29) Ki lona libaka hanaabeile takazo ya kupila kuya kuile mwa lipilu zabona. Nihakulicwalo, bo mutu ni musalaa hae bapili, bo Adama ni Eva, nebasika utwa Mulimu mi kabakaleo, bona ni bana babona nebaka shwa. (Genese 3:17-19; Maroma 5:12) Niteñi, Mulimu usepisa ‘kukulisa takazo ya zepila kaufela,’ kukopanyeleza cwalo ni takazo ya batu ya kupila kuya kuile. (Samu 145:16) Bibele italusa mo Jehova atahiselize kuli batu babe ni sepo ya kupila kuya kuile hape.—Maroma 6:23.

 “Batu habana kukona kuziba misebezi yaezize Mulimu wa niti kuzwa kwa makalelo kuisa kwa mafelelezo.” Butali bwa Mulimu butungile mi ki bobutuna hahulu kuli mane Bibele ibulela kuli ‘habukoni kufumanwa.’ (Maroma 11:33) Nihakulicwalo, Mulimu unyolelwa kupatulula milelo yahae kwa batu bababata kumutabisa.—Amosi 3:7.

 Buka ya Muekelesia neiñozwi ki Mulena Salumoni wa Isilaele wa kwaikale, muuna yanaatumile hahulu kabakala butali bwanaafilwe ki Mulimu. Inani likelezo zetusa ka za lika zeli za butokwa hahulu mwa bupilo ni lika zesi za butokwa. (Muekelesia 1:2, 3; 2:1, 17; 7:1; 12:1, 13) Mwa kauhanyo 3, Salumoni utalusa lika zeñwi zezwelapili kuezahala mwa bupilo bwa batu. Naabulezi ka za misebezi yeshutana-shutana. (Muekelesia 3:1-8, 10) Mulimu ufile batu tukuluho ya kuiketela misebezi yebaka eza ni nako yebaka ieza. (Deuteronoma 30:19, 20; Joshua 24:15) Salumoni utalusa kuli batu bakona feela kuikola misebezi yabona haiba baeza lika ka kulumelelana ni tato ya Mulimu ni kukuteka “nako” Yahae yatomile. Salumoni ubiza taba yeo kuli ki “mpo yezwa ku Mulimu.”—Muekelesia 3:1, 12, 13.

 Mubuhe vidio yekuswani ye kuli muzibe litaba zeñwi ka za buka ya Muekelesia.