LITIMANA ZA MWA BIBELE ZETALUSIZWE
Samu 37:4—“Utabe Kabakala MULENA”
“Utabe hahulu kabakala Jehova, mi uka kufa zeilakaza pilu yahao.”—Samu 37:4, Bibele ya Toloko ya Lifasi Lelinca.
“Utabe kabakala MULENA, mi uka kufa zeilakaza pilu yahao.”—Samu 37:4, Bibele ya English Standard Version.
Taluso ya Liñolo la Samu 37:4
Walisamu ususueza balapeli ba Mulimu kuli batabe kabakala kuba ni silikani sesitiile ni Mulimu. Batu kaufela babaikola silikani sesinde ni Jehova a Mulimu bakona kukolwa kuli uka kulisa litakazo zabona zende.
“Utabe hahulu kabakala Jehova.” Manzwi a hape akona kutalusa kuli “ufumane tabo yetuna hahulu kabakala Jehova,” “utabe kabakala kusebeleza MULENA,” kamba “utabe kabakala lika zakusepisize MULENA.” Zeitalusa taba ye kikuli luswanela ‘kufumana tabo yetuna’ kabakala kulapela Mulimu wa niti. (Samu 37:4, litaluso ze kwatasi) Ki kabakalañi halubulela cwalo?
Batu babalapela Jehova banani mubonelo oswana ni wahae, sina mokuboniselizwe mwa Bibele. Baziba Mulimu mi hape baziba kuli baswanela kumuutwa. Ka lona libaka leo, banani lizwalo lelinde mi baezanga mobakonela kaufela kuambuka kueza lika zemaswe. (Liproverbia 3:5, 6) Ka mutala, habafilikanangi kamba kushwela muna batu babamaswe habakondisa milelo yabona. (Samu 37:1, 7-9) Batu ba Mulimu batabile kuziba kuli honacwale-cwale fa, Mulimu akatuha afelisa lika kaufela zemaswe ni kufuyola batu babasepahala kabakala mupilelo wabona omunde. (Samu 37:34) Hape batabile kabakala kuziba kuli batabisa Ndataa bona wa kwa lihalimu.—Samu 5:12; Liproverbia 27:11.
“Uka kufa zeilakaza pilu yahao.” Manzwi a hape akona kutolokiwa kuli “uka alaba litapelo zahao” kamba “uka kufa lika zeulakaza hahulu.” Kwautwahala kuli, Jehova haana kulufa lika kaufela zelumukupa. Kono sina mushemi yomunde, Jehova waziba lika luli zebatokwa bana bahae. Hape, lika zelukupa ni mupilelo waluna liswanela kulumelelana ni likuka za Mulimu mane ni tato yahae. (Liproverbia 28:9; Jakobo 4:3; 1 Joani 5:14) Halueza cwalo, lwakona kuatumela “Yautwa litapelo” inze lunani buikolwiso bwa kuli ukateeleza ku luna.—Samu 65:2; Mateu 21:22.
Litaba zeñwi zeswalisana ni litaba ze kwa Samu 37:4
Samu 37 neiñozwi ki Mulena Davida yanaabusa Isilaele wa kwaikale. Naañozi samu ye ka kuya ka molitatamanela litaku za Siheberu. b
Hañata Davida naanyandiswanga kamba kuezwa maswe ki batu babañwi. Mulena Saule ni batu babañwi bane bamutoile neba muzumanga kuli bamubulaye. (2 Samuele 22:1) Niteñi, Davida kamita naasepanga Mulimu ka kutala. Davida naaziba kuli “kusiyezi feela nakonyana” kuli Jehova afe koto batu babamaswe. (Samu 37:10, 11) Batu babamaswe niha bakabonahala kukondisa sina “bucwañi bobunca bobutala,” bakayundiswa.—Samu 37:2, 20, 35, 36.
Samu 37 ibulela ka za zekaezahala kwa batu babamamela likuka za Mulimu ni kwa batu babasa mameli likuka za Mulimu. (Samu 37:16, 17, 21, 22, 27, 28) Ka mukwa ocwalo, samu ye ilutusa kuba ni butali ni kuba batu babatabisa Mulimu.
Mubuhe vidio yekuswani ye kuli mubone litaba zeñwi zefumaneha mwa buka ya Lisamu.
a Jehova kona molibizezwanga libizo la Mulimu la Siheberu mwa Silozi. Kuli mubone libaka Libibele zeñata haliitusisa lilumbatina la Mulena kufita kuitusisa libizo la Mulimu, mubone taba yeli, “Jehova ki Mañi?”
b Mwa samu ye, litimana zepeli zapili likala ni taku yapili mwa sipeleta sa Siheberu, mi litimana zepeli zetatama likala ni taku yabubeli, mi lizwelapili honacwalo. Muñolelo wo mwendi neutusanga batu kuhupula samu ye ka bunolo.
Hape Mwendi Mwakona Kutabela Litaba Ze
TAWALA YA MULIBELELI
Kana Mulimu Wautwanga Litapelo Zaluna?
Bibele ilukolwisa kuli Mulimu wautwanga halulapela ku yena ka nzila yeswanela.
MAVIDIO A LITUTO ZA BUTOKWA ZA MWA BIBELE
Kana Kwakonahala Kuba Balikani ba Mulimu?
Ka lilimo zeñata, batu sebaikutwile kuli babata kuziba Mubupi wabona. Bibele yakona kulutusa kuba balikani ba Mulimu. Bulikani bo bukona kukala ka kuziba libizo la Mulimu.
LITIMANA ZA MWA BIBELE ZETALUSIZWE
Mateu 11:28-30 Italusizwe—“Hamutahe ku na, . . . mi Nika Mikatulusa”
Kana Jesu naasepisa kuli naakafelisa manyando ni kusaluka kaufela honafo feela?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
